“Palameni Kuli Lesa, Na o Akapalama Kuli Imwe”

Pa Ntanshi na pa Numa—Ifyo Baibolo Yaalwile Uyu Mwaume

INYIMBO e co baRolf-Michael bacindamike sana. Balikunkwime ku miti ikola. Ku bwaice mu Germany, balenwa sana ubwalwa kabili balebomfya umuti wa LSD, cocaine, ibange, ne miti imbi iifulunganya itontonkanyo.

Ilyo baRolf-Michael bale-esha ukwingisha imiti ikola mu calo cimo mu Africa mu nshila ya bufumfuntungu, balibekete no kubapoosa mu cifungo pa myeshi 13. Ukuba mu cifungo kwabalengele ukutontonkanya sana pa co twabela abomi.

BaRolf-Michael na bakashi babo baUrsula, balefwaisha ukwishiba ubupilibulo bwa bumi kabili balefwayafwaya icine. Nangu ca kuti balilengelwe insoni ku macalici ayengi ayaleitunga ukuba aya Bwina Kristu, balefwaisha ukwishiba Lesa. Lelo bali na mepusho kabili tabalepokelela amasuko yene yene ukufuma ku macalici yalekanalekana. Kabinge, aya macalici tayakwete umucincisho wakosa uwali no kubalenga ukwalula ubumi bwabo.

Mu kuya kwa nshita, baRolf-Michael na baUrsula baishilekumanya Inte sha kwa Yehova. Ilyo batendeke ukusambilila Baibolo, baRolf-Michael balikoseleshiwe nga nshi pa kukonkomesha kutila: “Palameni kuli Lesa, na o akapalama kuli imwe.” (Yakobo 4:8) Bapampamine pa ‘kufuulo buntu bwa kale umwabelele imyendele yabo iya ntanshi no kufwala ubuntu bupya ubwalengelwe umwabela ukufwaya kwa kwa Lesa mu bulungami bwa cine na bucishinka.’—Abena Efese 4:22-24.

Bushe baRolf-Michael bali no kucita shani pa kuti bafwale ubuntu bupya? Balilangilwe mu Baibolo ukuti “mu kwishiba kwine kwine” ubuntu kuti ‘bwalengwa ubupya ukulingana ne cipasho ca kwa Kalenga wa buko,’ e kutila Yehova Lesa.—Abena Kolose 3:9-11.

Ilyo balenonka ukwishiba kwine kwine, baRolf-Michael balefwaya ukulacita ifilanda ifishinte fyaba mu Cebo ca kwa Lesa. (Yohane 17:3) Taca-angwike ukuleka umupwilapo ukubomfya imiti ikola, lelo baRolf-Michael balicindamike ukupepa kuli Yehova no kwafwa kwakwe. (1 Yohane 5:14, 15) Ukwafwa na kumbi kwafumine mu kubishanya kwapalamisha na baba kale Inte sha kwa Yehova, abalebombesha ukucita ukufwaya kwa kwa Lesa.

Ukwishiba ukuti icalo cileya no kuti abacita ukufwaya kwa kwa Lesa bakekalilila umuyayaya calyafwile baRolf-Michael. Cabalengele ukusala amapaalo ya ciyayaya aya bucibusa bwapalamisha na Lesa wa kutemwa, Yehova, ukucila ukutemwa icalo icileya. (1 Yohane 2:15-17) Amashiwi yaba pa Amapinda 27:11 yafikile baRolf-Michael pa mutima. Yatila: “We mwana wandi, ube uwa mano, ulenge umutima wandi ukusamwa, ukuti njasuke ku ulenseebanya.” Balatasha nga nshi  pali aya mashiwi ati: “Ici cikomo cilanga ifyo ukutemwa kwa kwa Yehova kwashika, pantu alapeela abantunse ishuko lya kulenga umutima wakwe ukusamwa.”

Ukupala baRolf-Michael, abena mwabo, na bana babo batatu, abantu abengi balinonkelamo mu kukonka ifishinte fya mu Baibolo. Aba bantu basangwa mu filonganino fya Nte sha kwa Yehova icalo conse. Nangu cibe fyo, mu fyalo fimo fimo baNte balababepesha ati cakaniko ca mipepele yabipa iipasa indupwa. Lelo ifyacitikila baRolf-Michael te fyo filangilila.—AbaHebere 4:12.

BaRolf-Michael batila ilembo lya kwa Mateo 6:33, ilitukoselesha ukubalilapo ifya ku mupashi, lyaba ni “kampasi” ku lupwa lwabo iibatungulula ku ntunga yalungama. Bena, no lupwa lwabobalatasha nga nshi Yehova pa nsansa baipakisha mu lupwa lwabo ulwa Bwina Kristu. Balasuminisha ifyalandile kemba wa malumbo ati: “Ndebwesesha cinshi kuli Yehova pa fya kutetesa fyakwe fyonse pali ine?”—Amalumbo 116:12.

[Amashiwi pe bula 9]

Lesa alapeela abantunse ishuko lya kulenga umutima wakwe ukusamwa

[Akabokoshi pe bula 9]

Ifyo Ifishinte fya Baibolo Fibomba

Pa fishinte ifingi ifyalenga abantu abengi ukufuma ku kukunkuma kwabipisha paba ifishinte fyakonkapo:

“Mwe batemwa Yehova, pateni ububi.” (Amalumbo 97:10) Pa numa ya kushininwa pa bubi bwa myendele ingalenga imfwa no kupata sana ubo bubi, umuntu alangukilwa ukucita ifisekesha Lesa.

“Enda na ba mano e lyo ukabo wa mano, lelo uucito bunabo ku bawelewele akacula.” (Amapinda 13:20) Nga ca kuti tamulefwaya ukulabomfya imiti ikola ne fintu fimbi ifingalenga ukukunkuma, mufwile ukusala ifibusa mano mano. Ukulundulula icibusa na Bena Kristu abaletungilila ukupingulapo kwenu kukamwafwa icine cine.

“Mwisakamikwa nangu kamo, lelo muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Abena Filipi 4:6, 7) Uyu mutende wa ku mutima na ku muntontokanya tawisa pa mulandu wa kubomfya icili conse cimbi. Kabili ukushintilila pali Lesa mwi pepo kulafwa umuntu ukwishiba ifya kubomba na mafya ya mu bumi ukwabula ukubomfya imiti ikola.