Ilyashi Lya Bakabilisha ba Bufumu

“E lyo Naumfwapo Ici Cintu!”

NGA fintu ciba lyonse, Dorota, Inte ya kwa Yehova kabili umutumikishi wa nshita yonse mu Poland atwele umwana wakwe umwaume uwa myaka 14 ku cipatala ce sukulu ku kupimwa. Ilyo umwana alepimwa, dokota uwe shina lya Janina, * aipwishe Dorota imilimo ya pa ng’anda iyo umwana wakwe abombako.

Dorota ayaswike ati: “Nga nshikwete amaka, umwana wandi alapekanishisha ulupwa lwesu lonse ulwa bantu 6 ica kulya. Alawamya na mu ng’anda no kwafwako ukulungisha ifyonaike. Alitemwa ukubelenga. Kabili alipoosa sana amano ku kusambilila.”

Janina atile: “Ico cintu campesha mano. Nalibomba pano pa myaka 12, kabili nshabalaumfwapo ica musango yo.”

Ilyo amwene ukuti ili lishuko lya kushimikila, Dorota alondolwele ati: “Abafyashi abengi pali lelo balafilwa ukukansha bwino abana babo. E mulandu wine abana babo ilingi line baimwena ukuti tabacindama.”

Janina aipwishe ukuti: “Mwaishibe shani ifi fyonse? Abafyashi abengi tabafishiba iyo.”

Dorota ayaswike ati: “Mu Baibolo e mwaba ifyebo fya musango yo. Ku ca kumwenako, ukulingana na Amalango 6:6-9, ilyo tushilasambilisha abana tufwile intanshi ukuisambilisha fwe bene. Bushe tatufwile ntanshi ukulambatika mu mitima yesu na mu matontonkanyo yesu ifyebo fyacindama ifyo tulefwaya ukulambatika mu bana besu?”

Janina ayaswike ati: “Ala cipesha mano icine cine!” Lyene aipwishe Dorota ifyo Baibolo yamwafwile ukukusha no kusambilisha abana bakwe.

Dorota alondolwele ukuti: “Tulasambilila Baibolo cila mulungu na bana besu. Tubomfya icitabo citila Ifipusho Abacaice Bepusha—Ifyasuko Fibomba.” * Awe akonkenyepo ukulondolola ici citabo na malyashi cilandapo.

Janina atile: “E lyo naumfwapo ici cintu! Kuti natemwa ukumona ico citabo.”

Pa numa ye awala, Dorota alibwelele ne citabo.

Ilyo Janina alebebeta icitabo aipwishe ati: “Bushe mupepa kwi?”

“Ndi Nte ya kwa Yehova.”

“Inte sha kwa Yehova bacita shani nga bali na bapepa kumbi?”

Dorota ayaswike ati: “Bacita fye nga fino fine ndecita—ukucindika bambi.” Alundileko no kuti: “Kwena tufwaisha ukuti baishiba icine ca mu Baibolo.”

Janina tapitile na mu mbali ukusumina ati: “Kale kale ninsambilila ifingi kuli imwe.”

Na pa kulekelesha, Dorota akoseleshe Janina ukulabelenga Baibolo. Atile: “Mukeshiba ubufwayo bwa bumi kabili ikamwafwa mu mulimo wenu.”

Janina asumine ukuti: “Kwena namunenga ukufwaisha nga nshi ukucite fyo.”

Mu kushilimuka kabili no mupampamina, Dorota abomfeshe bwino ilya nshita aletwala umwana ku kumonana na dokota ku kushimikila ubunte bushaiwamina.—1 Petro 3:15.

[Amafutunoti]