Ifipusho Ukufuma ku Babelenga

Nani Yehova alelandapo mu mashiwi ya kuti “umo wa muli ifwe” aya pa Ukutendeka 3:22?

Cimoneka ukuti Yehova Lesa alelanda pa mwine na pa Mwana wakwe uwafyalwa eka ilyo atile: “Umuntu aba nga umo wa muli ifwe ku kwishibo busuma no bubi.” (Ukutendeka 3:22) Natumone umulandu twasosele fi.

Yehova asosele aya mashiwi pa numa ya kupingula abantunse babili aba kubalilapo. Bamo batila amashiwi ya kuti “umo wa muli ifwe” mucinshi, filya fiine imfumu ingatila “tatutemenwe” ilyo ninshi e ishitemenwe. Na lyo line, ukulanda pa mashiwi yaba pa Ukutendeka 1:26 na 3:22, Donald E. Gowan uwasoma Baibolo atile: “Takwaba ubushininkisho mu [Cipingo ca Kale] ubusuminisha ifyo abantu abengi balondolola ukuti: umucinshi wa cifumu uwa kuti ‘ifwe,’ nelyo ukubomfya ishiwi ‘ifwe’ ku kuicindika, nelyo ukuti cilangililo ca kuti muli Lesa wa finso fitatu mwaba abantu ukucila pali umo. . . . Ubu bulondoloshi tabumfwana na mashiwi ya pa Ukutendeka 3:22, ayatila ‘umo wa muli ifwe.’”

Bushe napamo Yehova alelanda pali Satana Kaseebanya, uwatendeke ukuipingwila “ubusuma no bubi” kabili uwasongele abantunse ba kubalilapo ukucita cimo cine? Te kuti cibe fyo. Pano Yehova abomfeshe amashiwi ya kuti “umo wa muli ifwe.” Pali iyi nshita ninshi Satana taba pe bumba lya bamalaika ba cishinka aba kwa Yehova, e co tengaba pa bali ku lubali lwa kwa Yehova.

Bushe Lesa alelanda pali bamalaika ba cishinka? Tatwishibe bwino. Lelo, ukupalana kwa mashiwi yaba pa Ukutendeka 1:26 na 3:22 kutwafwa ukwishiba uwalelandwapo. Pa Ukutendeka 1:26, tubelenga ukuti Yehova atile: “Natucite umuntu mu cata cesu, umwabele cipasho cesu.” Nani aleeba aya mashiwi? Ilyo alelanda pa cibumbwa ca mupashi, uwaishileba muntu wapwililika Yesu, umutumwa Paulo atile: “Wene e cipasho ca kwa Lesa uushimoneka, libeli ku cibumbwa conse; pantu muli wene e mo fyonse fimbi fyabumbiilwe mu myulu na pano isonde.” (Abena Kolose 1:15, 16) Icaumfwika ca kuti pa Ukutendeka 1:26, Yehova alelanda ku Mwana wakwe uwafyalwa eka, “cibinda wa mulimo” uwalebombela pamo nankwe mu kubumba umuulu ne sonde. (Amapinda 8:22-31, NW) Amashiwi yapalako ayaba pa Ukutendeka 3:22 yalangilila ukuti Yehova na kabili alelanda ku wapalamisha kuli wene, Umwana wakwe uwafyalwa eka.

Cimoneke fyo Umwana wafyalwa eka uwa kwa Lesa alishibe “ubusuma no bubi.” Pa kuba na Yehova pa nshita iitali no kupalamisha na wene, ukwabula no kutwishika alishibe bwino amatontonkanyo ya kwa Wishi, ifishinte, ne fipimo. Pa kushininwa ukuti Umwana wakwe alishibe bwino ifi fintu no kuti ali uwa cishinka kuli fyene, Yehova napamo alimupeeleko ubuntungwa bwa kucita ifintu ukwabula ukulamwipusha cila nshita. E co Umwana ali na maka ne nsambu sha kwishiba ubusuma no bubi. Lelo, ukupusanako na Satana, Adamu na Efa, Yesu wena tacitile ifyapusene ne cipimo ca kwa Yehova ica busuma no bubi.