Mwe Bacaice, Mwende Umwawamina Yehova

ABACAICE ba Bwina Kristu bamo balafuma pa bafyashi babo na ku cilonganino ca ku mwabo pa nshita inono. Bamo balicite fyo pa kuti bengalundulula ubutumikishi bwabo. Bambi balifuma ku mwabo pa mulandu wa kukanaipoosa mu milandu ya ici calo. (Esaya 2:4; Yohane 17:16) Mu fyalo fimo, “Kaisare” alipoosa abacaice mu cifungo abasungilila bumpomfu nelyo mu kubombo mulimo wa mu bwikashi. *—Marko 12:17; Tito 3:1, 2.

Lintu bakakwa mu fifungo pa mulandu wa kukaanaipoosa mu fikansa fya calo, aba bacaice kuti bababika pamo na bacintomfwa pa nshita yalepa. Imilandu imbi iilenga abacaice ukufuma pa mwabo na yo yalilenga balebombela mu fifulo fyabipa. Ni shani fintu aba bacaice ba Bwina Kristu nelyo bambi abapatikishiwa ukuba muli uyu musango bengacincintila ukutitikisha ne fifwaikwa balolenkana na fyo ilyo baletukuta ukutwalilila “ukwendela umwawamina Lesa”? (1 Abena Tesalonika 2:12) Ni shani fintu abafyashi babo bengabafwa ukuipekanya ukubomba ne mibele yabipa?—Amapinda 22:3.

Amafya Bakumanya

Tákis uwa myaka 21, uwali no kwikala imyaka ukucila pali itatu ukufuma pa ng’anda atile: “Ukwikala ukufuma mu minwe ya bafyashi na ku bucemi bwa kutemwa ubwa baeluda abanjishibe bwino kwali ukwaafya kabili ukwa kutiinya.” * Atwalilila ati: “Inshita shimo, naleyumfwa uushacingililwa.” Pétros uwa myaka 20 ali no kwikale myaka ukucila pali ibili ukufuma pa ng’anda. Wena atila: “Wali e muku wa kubalilapo mu bumi bwandi, uwa kuipingwila ne mwine pa fya kusekesha ne fibusa nali no kukwata, kabili inshita shimo nshalesala mano mano.” Lyene atile: “Inshita shimo nalesakamikwa pa bukulu bwa mulimo ubuntungwa bwalundwako buletako.” Tássos, eluda wa Bwina Kristu uyo libili libili akumanya abacaice ba Bwina Kristu ababa muli iyi mibele, alandile ati: “Imilandile yabipa, bucipondoka, ne mibele ya bacaice bashasumina iya lukakala kuti yaambukila bwangu bwangu abacaice abashasalapuka.”

Lintu baleikala no kubombela pamo na bantu bashacindika ifishinte fya Baibolo, abacaice ba Bwina Kristu aba musango uyu bakabilo kuibaka ku matunko ya kupashanya imibele ya bucisenene ne nshila shishili sha mu malembo isha bacaice banabo. (Amalumbo 1:1; 26:4; 119:9) Ukutwalilila ukukonka ukutantika kusuma ukwe sambililo lya pa lwabo, ukusangwa ku kulongana, no kuya mu mulimo wa mwi bala kuti kwamoneko kwafya. (Abena Filipi 3:16) Ukwimika no kukonkelela ubuyo bwa ku mupashi na ko kuti kwaafya.

Abena Kristu bacaice aba busumino mu cine cine balafwaya ukutemuna Yehova mu myendele na mu milandile yabo. Muli bucishinka baleesha ukumfwila ukucincisha kusuma ukwa kwa Shibo wa mu muulu ukutila: “We mwana wandi, ube uwa mano, ulenge umutima wandi ukusamwa, ukuti njasuke ku ulenseebanya.”  (Amapinda 27:11) Balishibo kuti imyendele yabo ne mibele ilambukila ifyo bambi bamona Yehova na bantu bakwe.—1 Petro 2:12.

Ca kutasho kuti abengi pali aba abacaice balabombesha apapela amaka yabo ukupashanya bamunyinabo aba mu mwanda wa myaka uwa kubalilapo abo umutumwa apepele ati: “Mwende umwawamina Yehova ku kuleka ateemunwe ukufikapo ilyo muleya muletwale fisabo mu mulimo onse uusuma . . . pa kuti mushipikishe apakalamba no kushishimisha pamo no kusekelela.” (Abena Kolose 1:9-11) Baibolo ipayanya ifya kumwenako ifingi ifya bacaice baletiina Lesa abatungulwike ukwenda umwawamina Lesa nangu bali mu fyalo fimbi, ifyabipa kabili ifyaisulamo bakapepa wa tulubi.—Abena Filipi 2:15.

‘Yehova Ali na Yosefe’

Lintu ali umwaice, Yosefe, umwana watemwikwa uwa kwa Yakobo na Rakele, aleikala ukutali ukufuma kuli bawishi baletiina Lesa aba kumucingilila. Bamushitishe mu busha ku Egupti. Yosefe aimike ca kumwenako cisuma nga kabomba wapimpa, uwashintililwapo, kabili umulumendo wa mibele isuma. Nangu ca kuti alebombela mu ng’anda ya kwa Potifari, uushali kapepa wa kwa Yehova, Yosefe ali uwa cumfwila kabili uwapikintika ica kuti cilolo wakwe amulaashile pa fya mu ng’anda yakwe yonse. (Ukutendeka 39:2-6) Yosefe asungilile bumpomfu bwakwe kuli Yehova, kabili lintu ici camulengelo ukupooswa mu cifungo, Yosefe tatontonkenye ukuti: “Mulandu nshi uwa kusungila bumpomfu?” Na lintu ali mu cifungo atwalilile fye ukulanga imibele isuma, kabili tapakokwele abikilwe kapitao wa kulolekesha pa fintu ifingi ifya mu cifungo. (Ukutendeka 39:17-22) Lesa alimupaalile, kabili nge fyo calembwa pa Ukutendeka 39:23, ‘Yehova ali na [Yosefe].’

Fintu cali no kube caanguka kuli Yosefe, uwali ukutali no lupwa lwakwe ulwaletiina Lesa, ukwalule mibele yakwe ku kupalana ne ya balya bantu abasenshi abamushingulwike, ukupashanya imikalile ya bucisenene iya bena Egupti! Lelo, akakatile ku fishinte fya bulesa no kutwalilila ukubo wasanguluka te mulandu no kweshiwa apakalamba. Ilyo muka Potifari atwalilile ukumupatikisha ukulaala nankwe, mu kushipa aaswike ati: “Ningacita shani ububi ubu bukulu, no kubembukila Lesa?”—Ukutendeka 39:7-9.

Ilelo, Inte shacaice shilekabilo kumfwilo kusoka kwa mu Baibolo pa lwa kubishanya kubi, ifya kusekesha fyabipa, ukutambe fye shiku, no kukutika ku nyimbo ishabipa. Balishibo kuti “amenso ya kwa Yehova yali mu ncende shonse, yalecefya ababi na basuma.”—Amapinda 15:3.

 Mose Akeene “Ukuipakisha . . . Ukwa Lubembu”

Mose akuliile mu bwikashi bwaisulamo kupepo tulubi no musamwe mwi sano lya kwa Farao. Pali wene Baibolo ilanda ukuti: “Ni ku citetekelo e ko Mose . . . akaanine ukwitwa umwana wa mwana mwanakashi wa kwa Farao, asalile ukucushiwa pamo na bantu ba kwa Lesa ukucila ukuipakisha kwa pa kashita fye ukwa lubembu.”—AbaHebere 11:24, 25.

Ukucita bucibusa ne calo kuti kwaletako amashuko yamo, lelo ya pa kashita kanono fye. Yakatwalililo kubako pa nshita inono iisheleko ilyo cino calo cishilaonaulwa. (1 Yohane 2:15-17) Bushe tacicililepo ukuwama ukukonke ca kumwenako ca kwa Mose? Baibolo itila “atwalilile ukushangila ngo umona Uushimoneka.” (AbaHebere 11:27) Lyonse aletontonkanya pa bupyani bwa ku mupashi ubwa fikolwe fyakwe ifyaletiina Lesa. Acitile ubufwayo bwa kwa Lesa ukubo bufwayo bwakwe, ukwimiko buyo bwa kucito kufwaya kwa kwa Lesa.—Ukufuma 2:11; Imilimo 7:23, 25.

Ilyo abacaice abatiina Lesa baba na bantu ba mibele ishili ya bukapepa kabili iya bunkalwe, kuti bakosha bucibusa bwabo na Yehova ukupitila mwi sambililo lya pa lwabo, ukwishiba bwino “Uushimoneka.” Imilimo ya Bwina Kristu iya lyonse, pamo ngo kulasangwa ku kulongana lyonse no kubombako mulimo wa mwi bala, ikaafwa abacaice ba musango yu ukulatontonkanya pa fya ku mupashi. (Amalumbo 63:6; 77:12) Balingile ukutukuto kulundulule citetekelo ne subilo ifyakosa nge fyaliko na Mose. Balingile ukutonta amatontonkanyo ne micitile yabo pali Yehova, aba nsansa ukube fibusa fyakwe.

Alilandile ku Kulumbanya Lesa

Uwacaice umbi uwali ne mibele isuma ilyo ali ukutali na ku mwabo mukashana umwina Israele uwali nkole mu Suria mu nshiku sha kwa kasesema wa kwa Lesa Elisha. Ali umusha wa kwa muka Naamani, mushika wa fita fya ku Suria. Uyu mukashana aebele nakulu ati: “Iye, shikulu nga aba ku cinso ca kwa kasesema uuli mu Samaria! Kuti amupususha ku fibashi fyakwe.” Pa mulandu wa bunte bwakwe, Naamani aile kuli Elisha mu Israele kabili alisangulwilwe ku fibashi. Na kabili, Naamani  abeele kapepa wa kwa Yehova.—2 Ishamfumu 5:1-3, 13-19.

Ica kumwenako ca uyu mukashana cikomaila pa bucindami bwa milandile iilumbanya Lesa. Abacaice kuti balanda mu nshila iilumbanya Lesa nangu ni lintu bali ukutali ukufuma ku bafyashi babo. Nga ca kuti ulya mukashana ali ne “milandile ya buwelewele” nelyo “mipuulwe yabipa,” bushe nga calimwangukile ukushimiko bunte nga fintu acitile? (Abena Efese 5:4; Amapinda 15:2) Níkos, umulumendo wa myaka ukucilako pali 20 uwapooselwe mu cifungo pa mulandu wa kukanaipoosa mu milandu ya calo ebukisho kuti: “Ilyo nali mu cifungo ca fya bulimi na bamunyinane bacaice bambi, ukutaluka ku butungulushi bwa bafyashi no bwa cilonganino, namwene ukuti imilandile yesu yalibipile. Ukwabulo kutwishika tayalelete ilumbo kuli Yehova.” Caliweme ukuti Níkos na banankwe balyafwiwe ukumfwila ukupanda amano ukwa kwa Paulo ukutila: “Ubulalelale no kukowela kwa musango onse nelyo ubufunushi te kwesha no kulafilumbula muli imwe.”—Abena Efese 5:3.

Yehova Aali Uwa Cine Cine Kuli Bene

Ifyacitikile abaHebere batatu abanankwe Daniele mu Babiloni wa pa kale filangilila bucine bwa cishinte Yesu alandile icitila bucishinka ku cacepesha butungulula kuli bucishinka ku fingi. (Luka 16:10) Ilyo baeshiwe ukulya ifya kulya ifyo Amalango ya kwa Mose yabindile, nga babepekeshe mu kuti bali bankole mu calo iceni kanshi tapali ico bengacita. Fintu bapaalilwe pa kukatamika ifintu ifingamonwa nge fyacepesha! Bali no butuntulu busuma kabili aba mano ukucila bankole bambi abatwalilile ukulya ifya maliila ya mfumu. Bucishinka muli fi fintu fyacepesha ukwabulo kutwishika bwalibakoseshe, ica kuti ilyo balolenkene no bwesho bukalamba ubwa kufukama pa ntanshi ya cilubi, tabasuuswike.—Daniele 1:3-21; 3:1-30.

Yehova ali wa cine cine kuli aba balumendo batatu. Nangu bali ukutali ukufuma ku mwabo ukwali kabili e cifulo ca kupepelapo Lesa, bapampamine pa kuba ababula akabi ku fya calo. (2 Petro 3:14) Balikatamike bucibusa bwabo na Yehova ica kuti baliiteyenye ukufwilapo.

Yehova Takakushe

Lintu abacaice bali ukutali ukufuma ku bantu batemwa no kucetekela, kuti bayumfwa  abashacingililwa, abashaicetekela, kabili abatiinishiwa. Lelo, kuti balolenkana na mesho yabo abashininkisha ukuti ‘Yehova takabashe.’ (Amalumbo 94:14) Abacaice ba musango uyu nga ‘baculila ubulungami,’ Yehova akabafwa ukutwalililo kwenda “mu nshila ya bulungami.”—1 Petro 3:14; Amapinda 8:20.

Yehova alitwalilile ukukosha no kupaala Yosefe, Mose, umukashana umwina Israele uwali mu busha na bacaice batatu abaHebere apakalamba. Ilelo, alebomfya umupashi wakwe uwa mushilo, Icebo cakwe, no kuteyanya kwakwe ukutungilila “[abapilikita] ukupilikita kusuma ukwa citetekelo,” ukubalaya icilambu ca “bumi bwa muyayaya.” (1 Timote 6:11, 12) Cine cine, kuti mwaendela umwawamina Yehova, kabili e ca mano umo engacita.—Amapinda 23:15, 19.

[Amafutunoti]

[Akabokoshi pe bula 25]

MWE BAFYASHI—PANGASHENI ABANA BENU!

“Nge mifwi mu minwe ya mpalume, e fyaba abana baume aba ku bulumendo.” (Amalumbo 127:4) Umufwi te kuti ulase pa cintu uwine weka. Kano umo autonta pali ico cintu. Mu nshila imo ine, abana tabakaipekanye abene ukulolenkana ne fintu ificitika ilyo baleikalila ukufuma pa ng’anda ukwabula ubutungulushi bwa bafyashi.—Amapinda 22:6.

Abacaice balemenena ku kufwaisha ukucita nelyo ukunakila ku “lunkumbwa lwa bwaice.” (2 Timote 2:22) Baibolo isoka ukuti: “Inkonto ya kufundilako ipeela amano; lelo umwaice uwalekeleshiwa alenga nyina insoni.” (Amapinda 29:15) Ukulekelesha imyendele ya wacaice kuti kwalenga afilwa ukuipekanya ukulolenkana ne fifwaikwa fya mu mikalile nelyo ifya kutitikisha ilyo afuma pa ng’anda.

Muli buno bwikashi bwa nomba, abafyashi ba Bwina Kristu balingile ukutantawila ku bana babo amafya, ifya kutitikisha, ne fintu fya mu bumi mu nshila yaumfwika kabili iya mano. Ukwabulo kufuupula, kuti balondolola imibele yabipa uwacaice engalolenkana na yo nga ca kuti imibele yapatikisha ukuti afume pa ng’anda. Ukukansha kwa musango yu, pamo na mano yapeelwa na Lesa, ‘kukapeelo kucenjela ku bapelwa amano, ukupeelo kwishiba no kupanga ku mulumendo.’—Amapinda 1:4.

Abafyashi abasambilisha abana babo ifishinte fyakatama ifya bukapepa ne fya mibele balabafwa ukushipikisha amafya ya mu bumi. Isambililo lya lupwa ilya lyonse, ukulanshanya kwafumaluka, no kwangwa ku bana babo icine cine, kuti kwabalenga ukutunguluka. Abafyashi balingile ukusambilisha abana imibele ya bukapepa mu kulinga lelo mu kulangulukilako, ukupangasha abana babo pa kuti bakaisunge abene ku ntanshi. Ku micitile yabo, abafyashi kuti basambilisha abana ukuti umuntu kuti aikala mu calo lelo ukukanaba ulubali lwa ciko.—Yohane 17:15, 16.

[Icikope pe bula 23]

Abacaice ba Bwina Kristu bamo balifuma pa ng’anda

[Ifikope pe bula 24]

Ukupitila mu kucincintila amatunko, abacaice kuti bapashanya Yosefe no kuba aba busaka mu mibele

[Ifikope pe bula 26]

Pashanyeni umusha wacaice umukashana umwina Israele, uwashimike ubunte no kuleta ubukata kuli Yehova