“Mwiba kwi Koli Limo Line”

NGE fyo mumwene pano, ingamali ne ng’ombe ifilelimina pamo tafyangukilwe. Ikoli ilisuntinkenye ishi nama shibili—ilyapangiilwe inama shibili ishalingana ubukulu na maka—lilelenga inama shonse shibili ukucula. Apo Lesa alyangilwe inama shisenda ifipe, aebele abena Israele ati: “Wikalimina ku ng’ombe ne mpunda kumo.” (Amalango 22:10) Icishinte cimo cine kuti cabomba ku ngamali na kuli cilume wa ng’ombe.

Ilingi line, shibulimi te kuti atwike icisendo cafina nge ci pa nama shakwe. Lelo nga ca kuti takwete ing’ombe ishilume shibili, limbi kuti akulikila inama shibili ishilipo kwi koli limo. Kwati ici e co shibulimi wa muli ba1800 muli ci cilangililo asalilepo ukucita. Pa mulandu wa kupusana kwa bukulu, inama iishikosele kuti ileshomboka pa kwendela pamo ne inankwe, ne ikwetepo amaka e ingafininwa sana.

Umutumwa Paulo abomfeshe icilangililo ce koli ilyafinina kumo ku kutusambilisha isambilisho lyacindama. Alembele ati: “Mwiba kwi koli limo line na bashasumina. Pantu ubulungami na bumpulamafunde kuti fyayampana shani? Napamo ulubuuto ne mfifi kuti fyakwate senge shani?” (2 Abena Korinti 6:14) Bushe umwina Kristu kuti aba shani kwi koli ilyafinina kumo?

Inshila imo kuti yaba kuupa nelyo ukuupwa ku ushili Umwina Kristu munensu ushasumina mu fyo twasuminamo. Icupo ca musango yo kuti caba na mafya, na baupana kuti balekansana pa fintu ifyacindama.

Ilyo Yehova atendeke icupo, apeele umukashi umulimo ‘wa kusailisha’ nelyo ‘uwayana.’ (Ukutendeka 2:18) Kabili, Lesa alandile pa mukashi muli kasesema Malaki ati “munobe.” (Malaki 2:14) Kabumba wesu alafwaya abaupana ukubombela pamo mu fya ku mupashi, ukusendelana ifisendo no kuinonsha bonse babili.

Umwina Kristu nga aupila “muli Shikulu epela,” ninshi alanga umucinshi ku kufunda kwa kwa Shifwe wa mu muulu. (1 Abena Korinti 7:39) Ici e citendekelo ca cupo caikatana, icicindika Lesa no kumuletela ilumbo nga bonse babili balemubombela pamo nge ‘fibusa fine fine ifya mwi koli’ mu nshila yaibela.—Abena Filipi 4:3.

[Abatusuminishe Ukubomfya Icikope pe bula 32]

Ingamali ne ng’ombe: La Tierra Santa, Volume 1, 1830