Abanakashi ba Bwina Kristu aba Busumino—Ni Bakapepa ba kwa Lesa Abacindama

“Iciyembo ca kulufya, no kuyemba mupu, lelo umwanakashi wa mucetekanya, wene akatashiwa.”—AMAPINDA 31:30.

1. Bushe ifyo Yehova amona ukuyemba fyapusana shani ne fyo aba mu calo bakumona?

ICALO cacindamika sana imimonekele ya ku nse, maka maka ku banakashi. Lelo, ico Yehova abekelwamo sana muntu wa mu kati, uwingacilapo no kuyemba ilyo umo aleya alekota. (Amapinda 16:31) E ico, Baibolo ikonkomesha abanakashi ati: “Ukusaama kwenu kwiba ukwa kuluka umushishi ukwa ku nse no kwa kufwala ifisaamo fya golde atemwa ukufwala imingila, lelo kube ukwa muntu wabelama uwa mu mutima ne ca kufwala cishingabola ica mutima uwatalala kabili uwafuuka, uwaumo mutengo mu menso ya kwa Lesa.”—1 Petro 3:3, 4.

2, 3. Bushe abanakashi babombeleko shani ku kutwala pa ntashi imbila nsuma ku kutendeka kwa buKristu, kabili ici casobelwe shani?

² Imibele isuma iya musango yo e yali na banakashi abengi abalumbulwa mu Baibolo. Mu nshita Yesu aali pe sonde, abanakashi bamo aba musango yu bali ne shuko lya kumupyungila na batumwa bakwe. (Luka 8:1-3) Ku ntanshi, abanakashi Abena Kristu baishileba bakabila ba mbila nsuma abapimpa; bambi baletungilila nga nshi abaume Abena Kristu abaletungulula, ukusanshako umutumwa Paulo; bambi na bo bali ne cileela icine cine, ukupeela fye na mayanda yabo ukuti ifilonganino filelonganamo.

³ Uku kubomfya abanakashi sana kuli Yehova ku kufishapo ubufwayo bwakwe kwalisobelwe mu Malembo. Ku ca kumwenako, Yoele 2:28, 29 asobele ukuti abaume na banakashi, abanono na bakalamba, bali no kupokelela umupashi wa mushilo no kusalanganyako imbila nsuma ya Bufumu. Uko kusesema kwatendeke ukufishiwapo pa Pentekoste 33 C.E. (Imilimo 2:1-4, 16-18) Abanakashi bamo abasubilwe no mupashi balipeelwe ifya bupe fya cipesha amano, pamo nge ca bupe ca kusesema. (Imilimo 21:8, 9) Uyu mulalo ukalamba uwa ku mupashi uwa bankashi ba busumino walibombeleko ku kusalanganya bwangu ubuKristu mu nshita bwaletendeka, pa kupimpa mu butumikishi. Na kuba, muli ba60 C.E., umutumwa Paulo alembele ati imbila  nsuma “[yalibililwe] ku cibumbwa conse ica mwi samba lya muulu.”—Abena Kolose 1:23.

Batashiwa pa Kushipa Kwabo, Ukupimpa, ne Cileela

4. Mulandu nshi Paulo atashishe abanakashi abengi mu cilonganino ca buKristu ica kubalilapo?

⁴ Umutumwa Paulo ni umo uwatashishe pali bukapyunga bwa banakashi bamo—nga fintu fye bakangalila ba Bwina Kristu leelo batasha bukapyunga bwa banakashi bapimpa. Pa banakashi Paulo alumbwile pali “Trufaena na Trufosa, abanakashi abalebombesha muli Shikulu,” na “Persida uwatemwikwa wesu, pantu uyu mwanakashi abombeshe apakalamba muli Shikulu.” (Abena Roma 16:12) Paulo alembele ukuti Yuodia na Suntuki ‘baletukutila pamo nankwe mu mbila nsuma.’ (Abena Filipi 4:2, 3) Priskila, pamo no mulume wakwe, Akula, na bo babombele pamo na Paulo. Wene na Akula, “baibikile [na] mu kapoosa mweo” pa mulandu wa kwa Paulo, icamulengele alembe no kuti: “Te ine neka ndebatootela lelo ne filonganino fyonse ifya bena fyalo filebatootela.”—Abena Roma 16:3, 4; Imilimo 18:2.

5, 6. Ni mu nshila nshi Priskila aimikiile bankashi ba leelo ica kumwenako cisuma?

⁵ Cinshi calengele Priskila ukuba uwapimpa kabili uwashipa? Pa Imilimo 18:24-26 paba ica kutwafwa ukwishiba umulandu, pantu palya tubelengapo ati atungilile umulume wakwe ukwafwa Apolo, uwacenjela ukulanda, ukumulondolwela bwino bwino icine casokololwa. Ukwabula no kutwishika kanshi, Priskila afwile aali musambi wacincila uwa Cebo ca kwa Lesa ne sambililo lya batumwa. Ico calengele akwate imibele yawamisha iyamulengele ukuba uwacindama kuli Lesa na ku mulume wakwe no kuba uwacindama mu cilonganino ca kubalilapo. Na bambi abacindama ni bankashi ba Bwina Kristu abapikintika ilelo, abacincila ukusambilila Baibolo no kulya ifilyo fya ku mupashi ifyo Yehova apekanya ukupitila muli “kangalila wa cishinka.”—Luka 12:42.

⁶ Akula na Priskila bali ba cileela icine cine. Paulo aikele mu mwabo ilyo alebomba na bo mu bukwebo bwabo ubwa kupanga amahema. (Imilimo 18:1-3) Ilyo aba babili bakuukile ku Efese na pa numa ku Roma, bakonkenyepo ne cileela ca Bwina Kristu, basuminishe ne ng’anda yabo ukuti balelonganinamo. (Imilimo 18:18, 19; 1 Abena Korinti 16:8, 19) Numfa na Maria nyina kwa Yohane Marko na bo bene basuminishe amayanda yabo ukuti balelonganinamo.—Imilimo 12:12; Abena Kolose 4:15.

Baba Cuma ca Mutengo Ilelo

7, 8. Mibombele nshi isuma iya mulimo washila intu abanakashi ba leelo aba Bwina Kristu baishibikilwako, kabili cinshi bafwile ukwishiba?

⁷ Nga fintu cali mu myaka ya kutendeka kwa buKristu, abanakashi ba busumino Abena Kristu ilelo balabomba sana mu kufishapo ubufwayo bwa kwa Lesa, maka maka mu mulimo wa kubila imbila nsuma. Kabili balabomba bwino aba bankashi! Tontonkanyeni pa ca kumwenako ca baGwen, ababombeele Yehova mu busumino pa myaka ukucila 50 mpaka ne mfwa yabo mu 2002. Abalume babo batila: “Ukupimpa kwa kwa Gwen ni cikanga kwishibikwe mu musumba wesu onse. Alemona umuntunse onse ukuti kuti anonkelamo mu kutemwa kwa kwa Yehova na malayo yakwe. Bucishinka bwakwe kuli Lesa, ku kuteyanya kwakwe, na ku lupwa lwesu—ukusanshako no kukoselesha kwakwe ukwa kutemwa nga twafuupulwa—kwalingafwa sana na bana besu mu bumi bwesu bonse ubo—twaipakishe capamo. Tulamufuluka nga nshi.” BaGwen baikele na balume babo mu cupo imyaka 61.

⁸ Abanakashi ba Bwina Kristu abengi nga nshi, abashimbe na baupwa, ni bapainiya nangu bamishonari, abateeka imitima ku finono bakwata ilyo balesalanganya ubukombe bwa Bufumu mu misumba isenyamo abantu ukufika fye na mu ncende shabesha ukutali. (Imilimo 1:8) Abengi baliipusula ukukwata ing’anda nelyo abana pa kuti babombele Yehova mu kufikapo. Kwaba balya batungilila abena mwabo lyonse ilyo balebomba nga bakangalila benda, e lyo kwaba na makana ya bankashi ababomba mu mayanda ya Bethel mwi sonde lyonse. Ukwabula no kutwishika, aba banakashi abaipeelesha baba pa “fisuma fya nko shonse” ifisusha ing’anda ya kwa Yehova no bukata.—Hagai 2:7.

9, 10. Bushe aba mu ndupwa shimo batasha shani imibombele isuma iya bakashi ba Bwina Kristu abakusha na bana?

 ⁹ Kwena, abanakashi ba Bwina Kristu abengi balikwata imilimo ya mu lupwa iya kubomba; lelo, batangishako ifya Bufumu. (Mateo 6:33) Nkashi painiya umushimbe alembele ati: “Bamayo e balengele sana ukuti ntendeke bupainiya bwa nshita yonse pa mulandu wa citetekelo cabo icabulo kupungaila ne ca kumwenako cabo icisuma. Na kuba, bali pali bapainiya naleipakisha sana ukubomba na bo.” Munyina umo alandile pa mukashi wakwe, uwakusha abana banakashi basano, ati: “Ing’anda yesu lyonse yaleba iya busaka kabili iyapempenkana. Bonnie talelenga tuleba ne mitabotabo iingi pa kuti tuleangwa sana ifya ku mupashi. Imisungile yakwe isuma iya ndalama yalelenga ukuti ndebomba incito ishili ya kuwisha akasuba pa myaka 32, ne co calengele ukuti ndepoosa inshita ikalamba no lupwa lwesu no kwangwa ifya ku mupashi. Umukashi wandi asambilishe na bana ubucindami bwa kubombesha. Alinga fye ukumutasha.” Ilelo, uyu munyina no mukashi babomba pa maofeshi yakalamba mwi sonde lyonse aya Nte sha kwa Yehova.

¹⁰ Munyina umo alembele ulwa mukashi wakwe, uwakusha abana, ati: “Imibele natemwa sana muli Susan kutemwa atemwa sana Lesa na bantu, pamo no kulangulukilako kwakwe no bufumacumi. Lyonse aleti Yehova alinga ukupeela ifyawamisha—ne co e cintu akonka pa kubombela Lesa na pa kubomba imilimo ya bunyina.” Pa kutungililwa no mukashi wakwe, uyu munyina alibomba imilimo ya ku mupashi iingi, pamo nga eluda, painiya, kangalila wa muputule uwa kwikatilila, na muli Komiti wa Kumfwaninamo ne Fipatala. Abanakashi ba musango yo balicindama nga nshi ku balume babo, ku Bena Kristu banabo, ne cacilapo, kuli Yehova!—Amapinda 31:28, 30.

Abanakashi Bacindama Abashakwata Balume

11. (a) Bushe Yehova asokolola shani ifyo angwa abanakashi ba busumino, maka maka bamukamfwilwa? (b) Cinshi bamukamfwilwa Abena Kristu na bankashi bambi aba busumino abashaupwa bafwile ukwishiba?

¹¹ Yehova ilingi line alelanda pa fyo angwa bamukamfwilwa. (Amalango 27:19; Amalumbo 68:5; Esaya 10:1, 2) Ta-aluka iyo. Na nomba alyangwa sana ku nshiwa e lyo na ku banakashi bashimbe ababa na bana e lyo na ku baisalilapo fye ukutwalilila abashimbe nelyo abashasanga uwingayana ukuba umulume wa Bwina Kristu. (Malaki 3:6; Yakobo 1:27) Nga mwaba pa babombela Yehova mu busumino ukwabula umwina mwenu Umwina Kristu uwa kumutungilila, ishibeni ukuti mwalicindama mu menso ya kwa Lesa.

12. (a) Bushe bankashi Abena Kristu bamo balanga shani bucishinka kuli Yehova? (b) Bushe inkashi shesu shimo shiyumfwa shani?

¹² Ku ca kumwenako, tontonkanyeni pa lwa nkashi shesu isha Bwina Kristu abashaupwa pa mulandu wa kumfwila muli bucishinka ukufunda kwa kwa Yehova ukwa kuupilwa fye “muli Shikulu epela.” (1 Abena Korinti 7:39; Amapinda 3:1) Icebo ca kwa Lesa cibalaya aciti: “Ku wa cishinka, [Yehova akaba uwa] cishinka.” (2 Samwele 22:26, NW) Na lyo line, ku bengi tacayanguka ukutwalilila abashimbe. Nkashi umo atila: “Napampamine pa kuupilwa fye muli Shikulu, lelo nalilila imiku iingi pa kumona abanandi baupwa ku baume ba bwina Kristu abasuma, ilyo ine ncili fye neka.” Nkashi umbi na o  atila: “Nalibombela Yehova pa myaka 25. Napampamina pa kutwalilila uwa cishinka kuli wene, lelo ilingi line ukutalalilwa kulanengo ukuba no bulanda.” Asosa no kuti: “Bankashi baba nga ine balafwaisha sana ukukoseleshiwa.” Kuti twayafwa shani aba cishinka aba musango yo?

13. (a) Cinshi tusambilila ku fyalecita abaleya ku kutandalila umwana mwanakashi wa kwa Yefta? (b) Ni nshila nshi shimbi twingalangilamo ukuti twalyangwa kuli bankashi bashimbe mu cilonganino cesu?

¹³ Inshila imo kuti yamonwa ku ca kumwenako ca ku kale. Ilyo umwana mwanakashi wa kwa Yefta aipuswile ishuko lya kuupwa, abantu bailwike ukuti ili lyali lilambo. Cinshi bacitile ku kumukoselesha? “Umwaka no mwaka abana banakashi ba kwa Israele balaya ku [kutasha, “NW”] umwana mwanakashi wa kwa Yefta umwina Gileadi inshiku shine mu mwaka.” (Abapingushi 11:30-40) Na ifwe bene, tulingile ukutasha no mutima onse bankashi abashimbe abaletwalilila aba cishinka mu kumfwila ifunde lya kwa Lesa. * Ni nshila nshi imbi twingalangilamo ukuti tuleangwako? Mu mapepo yesu, tufwile ukupaapaata Yehova ukuti aletungilila aba bankashi batemwikwa, aba cishinka ukuti baletwalilila ukuba aba cishinka mu mulimo wabo. Tulingile ukubeba ukuti balitemwikwa apakalamba kabili balikatamikwa kuli Yehova na ku cilonganino conse ica Bena Kristu.—Amalumbo 37:28.

Ifyo Abafyashi Bashimbe Batunguluka

14, 15. (a) Mulandu nshi Abena Kristu abashimbe abakwata na bana balingile ukulilila kuli Yehova ukuti abaafwe? (b) Bushe abafyashi abashimbe kuti babomba shani ukulingana na mapepo yabo?

¹⁴ Abanakashi Abena Kristu abashimbe ababa na bana na bo baba na mafya ayengi. Lelo, kuti baeba Yehova ukuti abaafwe ukukusha abana ukulingana ne fishinte fya mu Baibolo. Ca cine, nga muli bafyashi bashimbe, teti mubombe ifya bunyina ne fya buwishi pamo. Na lyo line, Yehova akamwafwa ukubomba imilimo yenu iingi nga mwamulomba mu citetekelo. Ku kulangilila: Elenganyeni ukuti namushita ifintu ifingi ifyo muletwala ku mwenu bushilya bwa mumana. Bushe kuti mwatampa fye ukowa ukuya kwi shilya namutwika ifyo fipe pa mutwe ilyo kuli no bwato lwa mupepi? Iyo! E cimo na mafya ya mu nkuntu mukwata. Mwiesha ukuyasenda mweka libe kuti mwalomba na Yehova ukuti amwafwe. Na kuba amulaalika ukulilila kuli wene. Amalumbo 68:19 yatila: “Abe uwacindikwa Shikulu, Lesa ipusukilo lyesu! ubushiku no bushiku [atusendela ifisendo, NW].” Ilembo lya kwa 1 Petro 5:7 na lyo limulaalika ukupoosa amasakamika yenu yonse pali Yehova “pantu asakamana imwe.” E ico ilyo mwafinininwa ku mafya na masakamika, ebeni Shinwe wa ku muulu, ukulamweba “no kukanaleka.”—1 Abena Tesalonika 5:17; Amalumbo 18:6; 55:22.

¹⁵ Ku ca kumwenako, nga muli bafyashi,  ukwabula no kutwishika mwalisakamikwa pa fyo abaice bamo bengambukisha abana benu imisango imo ku sukulu nelyo pa mesho ya bumpomfu bengalolenkana na yo. (1 Abena Korinti 15:33) Awe kwena kuti mwasakamikwa. Lelo ifi fintu ifyo mwingapepelapo. Na kuba, kuti mwapepela pali fyo fintu na bana benu ilyo bashilaya ku sukulu, napamo pa numa ya kubelengela capamo ilembo lya bushiku. Amapepo yafuma ku mutima, aya kulungatika kuti yakuma sana amatontonkanyo ya bana benu. Ne cacilapo, ilyo muletukuta mu kutekanya ukulimba Icebo cakwe mu mitima ya bana benu, kuti mwapokelela ipaalo lya kwa Yehova. (Amalango 6:6, 7; Amapinda 22:6) Ibukisheni ukuti “amenso ya kwa Yehova yaba pa balungama, na matwi yakwe yomfwa ukupaapaata kwabo.”—1 Petro 3:12; Abena Filipi 4:6, 7.

16, 17. (a) Cinshi umwana mwaume umo asosele pa kutemwa kwa banyina? (b) Bushe ifyo banyina balemona ifya ku mupashi kwayambukile shani abana?

¹⁶ Tontonkanyeni pa ca kumwenako ca kwa Olivia, umufyashi wa bana 6. Umulume wakwe uushasumina ashiile ulupwa pa numa fye ya kufyalwa kwa kwa kasuli, lelo uyu nkashi ali-itendekeleko ukukansha abana bakwe imibele ya kwa Lesa. Umwana umwaume wa kwa Olivia, Darren, uuli nomba ne myaka 31 kabili ni eluda wa Bwina Kristu kabili painiya, aali fye ne myaka nalimo 5 pali yo nshita. Icalundile pa masakamika ya kwa Olivia ca kuti Darren alilwele ubulwele bwabipa ubo bucili bumucusha. Ilyo Darren aleibukisha pa bwaice bwakwe, alemba ati: “Ncili ndebukisha ninjikala pa busanshi mu cipatala ndefuluka ukuti Bamayo bese. Baleikala na ine no kumbelengela Baibolo cila bushiku. Lyena baleimba ulwimbo lwa Bufumu ulutila ‘Tulamutasha, Mwe Yehova.’ * Ulo e lwimbo lwa Bufumu natemwa ukufika na lelo.”

¹⁷ Ukutetekela Yehova no kumutemwa kwalengele Olivia ukutunguluka nangula aali mufyashi umushimbe. (Amapinda 3:5, 6) Imibele yakwe isuma imonekela mu mabuyo abikile abana bakwe. Darren atila: “Lyonse Bamayo baletukoselesha ukukonkelela ubuyo bwa butumikishi bwa nshita yonse. Ico calengele ukuti ine ne nkashi shandi shine pali shisano isho nakwata tutendeke ubutumikishi bwa nshita yonse. Na lyo line, Bamayo tabaleitakisha pali fi fintu. Ndesha na maka yonse ukupashanya imibele yabo iisuma.” Ca cine ukuti te bonse abana abakula balebombela Lesa nga ba mwana Olivia. Lelo nga ca kuti nyina alibombeshe apapela amaka yakwe ukwikala umwabela fishinte fya mu Baibolo, afwile ukwishiba ukuti Yehova akamutungulula no kumutungilila mu kutemwa.—Amalumbo 32:8.

18. Kuti twalanga shani ukuti tulatasha pa fyo Yehova ateyanya icilonganino ca Bwina Kristu?

 ¹⁸ Ukutungilila kwa kwa Lesa ukwingi kufuma ku cilonganino ca Bwina Kristu, ukwaba imiliile ya ku mupashi iya lyonse, kuli bamunyina ba Bwina Kristu, na ku “fya bupe mu bantu” abakosoka lwa ku mupashi. (Abena Efese 4:8) Baeluda ba busumino balabombesha ukukuulilila bonse mu cilonganino, ukwangwa sana ukukabila kwa “nshiwa na bamukamfwilwa mu kucula kwabo.” (Yakobo 1:27) E ico twalilileni ukupalama ku bantu ba kwa Lesa, te kwesha ukuitalushako iyo.—Amapinda 18:1; Abena Roma 14:7.

Ubusuma bwa Kunakila

19. Mulandu nshi ukunakila kwa mukashi kushipilibwila ukuti wa pa nshi, kabili ca kumwenako nshi ica mu Baibolo icitungilile ci?

¹⁹ Yehova abumbile umwanakashi ngo wa kusailisha umwaume. (Ukutendeka 2:18) Kanshi, ukunakila kwa mukashi ku mulume te kutila ninshi wa pa nshi. Lelo, kulacindamika umwanakashi, ukulenga alebomfya ifya bupe fyakwe ifingi no kulamuka ukulingana no kufwaya kwa kwa Lesa. Amapinda icipandwa 31 yalondolola imilimo yapusanapusana iya mwanakashi wa bunyinu mu Israele wa ku kale. Aleafwa ababulisha, alelima amabala ya myangashi, no kushita impanga. Cine cine, “umutima wa kwa wiba [walimutetekele], no kukanabulwe ca kumwenamo.”—Ifikomo 31:11, 16, 20.

20. (a) Bushe umwanakashi Umwina Kristu alingile ukumona shani ukulamuka, nelyo ifya bupe Lesa amupeela? (b) Mibele nshi isuma Estere alangishe, kabili bushe ico calengele Yehova amubomfye shani?

²⁰ Umwanakashi wa bufuuke, uutiina Lesa taibililika no kuisansabika pa mulume nelyo ukucimfyanya nankwe. (Amapinda 16:18) Tasupila ukuisekesha maka maka ukupitila mu kukonkelela ifya calo lelo abomfya ifya bupe Lesa amupeela maka maka ku kubombela bambi—e kutila ulupwa lwakwe, Abena Kristu banankwe, abena mupalamano, na kucilisha, Yehova. (Abena Galatia 6:10; Tito 2:3-5) Tontonkanyeni pa ca kumwenako ca mu Baibolo ica kwa Namfumu Estere. Nangula aali uwayemba icata, ali umufuuke kabili uunakila. (Estere 2:13, 15) Ilyo aupilwe, ali na katiina ku mulume wakwe, Imfumu Ahasuerusi, ukucila ifyali Bashti, namfumu wa kale. (Estere 1:10-12; 2:16, 17) Estere na kabili mu mucinshi anakile umufyala wakwe umukalambapo, Mordekai, pa milandu yabakumine—nelyo fye ilyo abele namfumu. Lelo tali camwenso! Mu kushipa asansalike Hamani, umuntu wa maka kabili umubi uwapangile ukulofya abaYuda. Yehova abomfeshe sana Estere ku kubakilila abantu Bakwe.—Estere 3:8–4:17; 7:1-10; 9:13.

21. Bushe umwanakashi Umwina Kristu kuti atwalilila shani ukuba uwacindama kuli Yehova?

²¹ Camoneka fye ukuti ku kale na ndakai line, abanakashi ba bukapepa balilanga ukuipeelesha kwabo kuli Yehova na ku kumupepa. Kanshi, abanakashi batiina Lesa balicindama mu menso ya kwa Yehova. Imwe bankashi Abena Kristu, lekeni Yehova ukupitila mu mupashi wakwe amumumunge panono panono ukuba “icipe” cawamisha, ‘icapekanishiwa ku kubombo mulimo onse uusuma.’ (2 Timote 2:21; Abena Roma 12:2) Pa lwa bakapepa baumo mutengo aba musango yo, Icebo ca kwa Lesa citila: “Umupeele ifisabo fya minwe yakwe; uleke imilimo yakwe imutashishe mu mpongolo.” (Amapinda 31:31) Shi nacibe fyo fine kuli umo umo uwa muli imwe.

[Amafutunoti]

Bushe Muleibukisha?

• Bushe abanakashi bamo aba mu nshita ubuKristu bwaletendeka bali shani abacindama mu menso ya kwa Yehova?

• Bushe bankashi abengi mu nshiku shesu bacita shani pa kuti babe abacindama kuli Lesa?

• Ni mu nshila nshi Yehova atungilila bankashi abashimbe abalekusha abana na bankashi bambi abashakwata balume?

• Bushe umwanakashi kuti alanga shani umucinshi wafuma ku mutima ku kutantika kwa bumutwe?

[Amepusho]

[Akabokoshi pe bula 17]

IFYA KUMWENAKO FYA KUTONTONKANYAPO

Bushe kuti mwatemwa ukutontonkanya pa fya kumwenako na fimbi ifya banakashi ba busumino abalumbulwa mu Baibolo? Nga ni fyo, mukwai belengeni amalembo yali pe samba. Ilyo mule-etetula pa balumbulwa, esheni ukwiluka ifishinte ifyo mwingabomfya sana mu mikalile yenu.—Abena Roma 15:4.

◆ Sara: Ukutendeka 12:1, 5; 13:18a; 21:9-12; 1 Petro 3:5, 6.

◆ Abanakashi bakapekape aba mu bena Israele: Ukufuma 35:5, 22, 25, 26; 36:3-7; Luka 21:1-4.

◆ Debora: Abapingushi 4:1–5:31.

◆ Ruti: Ruti 1:4, 5, 16, 17; 2:2, 3, 11-13; 4:15.

◆ Umwanakashi wa ku Shunemu: 2 Ishamfumu 4:8-37

◆ Umwanakashi umwina Foinike: Mateo 15:22-28.

◆ Marita na Maria: Marko 14:3-9; Luka 10:38-42; Yohane 11:17-29; 12:1-8.

◆ Tabita: Imilimo 9:36-41.

◆ Abana banakashi ba kwa Filipi bane: Imilimo 21:9.

◆ Febi: Abena Roma 16:1, 2.

[Icikope pe bula 15]

Bushe mulatasha bankashi abashimbe abomfwila ifunde lya kwa Lesa muli bucishinka?

[Icikope pe bula 16]

Fintu nshi mwingalumbula mu kulungatika mwi pepo ilyo abana tabalaya ku sukulu?