Ifipusho Ukufuma ku Babelenga

Mulandu nshi Elisha alombele “icakaniko ca pabili” ica mupashi wa kwa Eliya?

Kwashele fye panono ukuti Eliya apwishe umulimo wakwe nga kasesema mu Israele, e lyo kasesema Elisha uwali umwaice pali wene amulombele ati: “Shi lekeni icakaniko ca pabili ica mupashi wenu cibe pali ine.” (2 Ishamfumu 2:9) Lwa ku mupashi, Elisha afwile alelomba icakaniko ca miku ibili nga cilya calepeelwa ku mwana umwaume ibeli. (Amalango 21:17) Ukubebeta ili lyashi mu kwipifya kwalatwafwa ukulyumfwikisha no kusambililako ku cacitike.

Mu kumfwana no butungulushi bwa kwa Yehova, kasesema Eliya asubile Elisha ukumupyana. (1 Ishamfumu 19:19-21) Mupepi ne myaka 6, Elisha abombele nga kalume wa busumino uwa kwa Eliya kabili apampamine pa kucite fyo ukufika na ku mpela. Nangu ni pa bushiku Eliya alekelesheko ukubomba nga kasesema mu Israele, Elisha akakatile kuli kafundisha wakwe. Nangula Eliya amucincishe ukuti aleke ukumukonka, kasesema Elisha asosele imiku itatu ati: “Nshashale.” (2 Ishamfumu 2:2, 4, 6; 3:11) Cine cine, Elisha alemona kasesema mukalamba nga wishi wa ku mupashi.—2 Ishamfumu 2:12.

Lelo, Eliya alikwete na bambi abana ba ku mupashi. Eliya na Elisha balebishanya ne bumba lya balumendo baleitwa ati “aba bwina kasesema.” (2 Ishamfumu 2:3) Icalembwa ca 2 Ishamfumu cilangilila ukuti aba balumendo nabo bene bali abapalamisha kuli shibo wa ku mupashi, Eliya. (2 Ishamfumu 2:3, 5, 7, 15-17) Lelo, nge mpyani, Elisha alipulilepo pa bana baume ba ku mupashi aba kwa Eliya—aali kwati libeli. Mu Israele wa pa kale, umwana mwaume ibeli alepokelela icakaniko ca pabili ica fya bupyani fya kwa wishi, ilyo abana baume bambi balepokelela icakaniko cimo. E co Elisha alombele icakaniko ca pabili ica bupyani bwa kwa Eliya ubwa ku mupashi.

Mulandu nshi Elisha alombele ici pali ilya nshita? Pantu ali no kutendeka umulimo ukalamba—uwa kupyana Eliya nga kasesema mu Israele. Elisha alilwike ukuti pa kufikilisha imilimo yakuma kuli uyu mulimo wakosa, alekabila amaka ya ku mupashi ayacilile pa yakwe, amaka ayo Yehova fye eka engapeela. Alekabila ukuba uwashipa nga fintu Eliya aali. (2 Ishamfumu 1:3, 4, 15, 16) E ico, alombele icakaniko ca pabili ica mupashi wa kwa Eliya, umupashi wa bukose no wa ‘kupimpa ukubombela Yehova’—imibele isuma ipeelwa no mupashi wa kwa Lesa. (1 Ishamfumu 19:10, 14) Bushe Eliya amwaswike shani?

Eliya alishibe ukuti Elisha alombele ico ashingapeela kano fye Yehova e wingapeela. E ico Eliya mu bufuuke ayaswike ati: “Walombe cayafya; nga wamona ine ilyo ndesendwa pali iwe, ninshi cilebe fyo kuli iwe.” (2 Ishamfumu 2:10) Na kabushe, Yehova alisuminishe Elisha ukumonako uko Eliya aninine mu nkuuka. (2 Ishamfumu 2:11, 12) Elisha alipeelwe ico alombele. Yehova alimupeele umupashi alekabila pa kutendeka umulimo wakwe uupya no kulolenkana na mesho yali no kubako.

Ilelo, Abena Kristu basubwa (inshita shimo abetwa ati ibumba lya buEliya) na babomfi ba kwa Lesa bonse kuti bakoshiwa apakalamba ilyo babelenga ici calembwa ca mu Baibolo. Inshita shimo, nga twapeelwa umulimo upya kuti twayumfwa abafininwa kabili abashafikapo, nelyo kuti twatendeka ukuba no mwenso wa kutwalilila umulimo wesu uwa kushimikila nga tulesanga abengi abashileangwako nelyo abaletukaanya mu cifulo tushimikilamo. Lelo, nga twalomba Yehova ukutwafwa, akatupeela umupashi wa mushilo uo tukabila pa kucimfya amafya no kwaluka kwa mibele. (Luka 11:13; 2 Abena Korinti 4:7; Abena Filipi 4:13) Ca cine, nga filya fine Yehova akoseshe Elisha ukubomba imilimo yakwe iyakosa, akaafwa na ifwe bonse, abaice na bakalamba, ukufishapo umulimo wesu.—2 Timote 4:5.