Lundululeni Umupashi wa Kupeela

BONSE tatufyalwa no mupashi wa kupeela. Mu cifyalilwa fye umwana alemenena ku kwikusha ifyo afwaya ne fyo akabila, ukwabula ukutontonkanya pa fingawamina abalemulela. Lelo, mu kupita kwa nshita, alasambilila ukuti te eka fye aba no ko kukabila. Afwile ukutontonkanya na pa fyo bambi bakabila, kabili afwile ukusambilila ukupeela no kwakana te kupokelela fye. Alingile ukulundulula umupashi wa kupeela.

Te bantu bonse abapeela—nangu aba bukapekape—abakwata umupashi wa kupeela. Bamo kuti bapeela ubupe ku kabungwe kafwilisha abantu pa mulandu wa bukaitemwe. Bambi nabo kuti bapeela ubupe pa kuti balumbanishiwe. Lelo, ukupeela kwa Bena Kristu bene bene kwalipusanako. Ninshi kupeela kwa musango nshi ukwakoseleshiwa mu Cebo ca kwa Lesa? Ukubebeta mu kwipifya ukupeela kwa Bena Kristu ba kubalilapo kwalayasuka ico cipusho.

Ifya Kumwenako fya Kupeela kwa Bena Kristu

Ukupeela kwa Bena Kristu, nga fintu kwalondololwa mu Baibolo, kwali kwa  “kupeelana ifintu” no kupeelako bambi ababulishe icine cine. (AbaHebere 13:16; Abena Roma 15:26) Takwali kwa kupatikisha. Umutumwa Paulo alembele ati: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.” (2 Abena Korinti 9:7) Na kabili ukupeela takwali kwa kuilangisha. E fyacitile Anania na Safira kabili ifyafuminemo fyali ifyabipisha.—Imilimo 5:1-10.

Lintu abaYuda abengi ne nsangu baishile ukufuma ku ncende shaba ukutali no kulongana mu Yerusalemu ku mutebeto wa Pentekoste mu 33 C.E., ifya bupe fyalekabilwa apakalamba. Ni kulya kwine eko abakonshi ba kwa Yesu “baiswilemo umupashi wa mushilo no kutendeka ukulanda indimi shalekanalekana.” Ibumba ilikalamba lyalilongene no kukutika ku lyashi lya kucincimusha Petro alandile pali Yesu Kristu. Pa numa, abantu balimwene uko Petro na Yohane baposeshe uwalemana pa mwinshi we tempele, na kabili balyumfwile uko Petro alandile pali Yesu no kuti balekabila ukulapila. Amakana balilapile no kubatishiwa ukuba abakonshi ba kwa Kristu.—Imilimo, ifipandwa 2 na 3.

Insangu shalefwaya ukwikala mu Yerusalemu pa kuti shingasambilila na fimbi ku batumwa ba kwa Yesu. Lelo bushe abatumwa bali no kusakamana shani abo beni bonse? Icalembwa ca mu Baibolo citweba ati: “Bonse abakwete impanga atemwa amayanda balefishitisha no kutwala indalama balesangamo mu fyo baleshitisha no kushibika ku makasa ya batumwa. Na bo baleshakanya kuli umo na umo, ifyo alekabila.” (Imilimo 4:33-35) Cine cine, icilonganino cipya icapangilwe mu Yerusalemu cali no mupashi wa kupeela!

Pa numa, ifilonganino fimbi fyalangishe umupashi umo wine uwa kupeela. Ku ca kumwenako, nangu Abena Kristu mu Makedonia bali abapiina, basangwilileko ifyacilile pa maka yabo ku kwafwa bamunyinabo mu Yudea ababulishe. (Abena Roma 15:26; 2 Abena Korinti 8:1-7) Icilonganino ca mu Filipi e capulilemo mu kutungilila Paulo mu butumikishi bwakwe. (Abena Filipi 4:15, 16) Ne cilonganino cine ica mu Yerusalemu caleakanya ifya kulya kuli bamukamfwilwa abali mu kukabila, kabili abatumwa basontele abaume 7 abafikapo ku kushininkisho kuti takwali bamukamfwilwa bali mu kukabila abalecililwa.—Imilimo 6:1-6.

Abena Kristu ba kubalilapo baleankulako bwangu nangu fye ni lintu baleenekela inshita shayafya. Ku ca kumwenako, ilyo kasesema Agabu asobele ukuti icipowe cikalamba calesungamina, abasambi mu cilonganino ca ku Antioke wa ku Suria “baipingwile, umo na umo apo akwatile, ukutuma ica kukumbusuka ku ba bwananyina abaikele mu Yudea.” (Imilimo 11:28, 29) We mupashi ubusuma balangilile pa kupeela ifyo baleenekela ukuti bambi baali no kukabila!

Cinshi cacincishe Abena Kristu ba kubalilapo ukuba aba kutemwa kabili bakapekape? Na kabushe, ni shani fintu umo enganonka umupashi wa kupeela? Kuti twasambilila ifingi pa kubebeta mu kwipifya ica kumwenako ca Mfumu Davidi.

Ifyo Davidi Ayafwilisha Ukupepa kwa Cine Kuli Bukapekape

Napamo mupepi ne myaka 500, icipao ca cipingo—imbokoshi yashila iyaleimininako ukubapo kwa kwa Yehova—tayakwete icifulo ca kwikalamo icibelelela. Yalesungilwa mwi tenti, nelyo ihema, ilyo balekuusha lintu abena Israele balelulumba mu matololo na lintu baingile mu Calo Calaiwe. Imfumu Davidi yalefwaisha ukufumya icipao mwi tenti no kukuulila Yehova ing’anda yalinga umwali no kulaikala icipao cashila. Davidi asosele kuli kasesema Natani ati: “Mona ine naikala mu ng’anda ya mikedari, ne cipao ca cipingo ca kwa Yehova caikala mwi samba lya fipembe.”—1 Imilandu 17:1.

Lelo, Davidi ali mwaume wa bulwi. E ico Yehova afumishe icipope ca kuti umwana wakwe Solomone, uukateka mu mutende, e ukakuula  itempele lya kubikamo icipao ca cipingo. (1 Imilandu 22:7-10) Lelo, ici tacacilikile umupashi wa kupeela uwa kwa Davidi. Ateyenye ifintu ifingi ifyali no kubomfiwa pa kukuula itempele. Lyene atile kuli Solomone: “Napekanishishe ng’anda ya kwa Yehova golde bakikari amakana ikana limo, na silfere bakikari amakana ikana, no mukuba ne cela ifyabulo kulingwo kufina pantu fyalifula; ne miti na mabwe nalipekanya.” (1 Imilandu 22:14) Apo Davidi taikushiwe ne fyo, abuulile fye ne fyuma fyakwe, asangwilileko golde na silfere ifingashitwa pali $1,200,000,000 mu ndalama sha nomba. Mu kulundapo, bacilolo nabo balisangwilileko ifingi. (1 Imilandu 29:3-9) Cine cine, Davidi alilangile umupashi wa bukapekape, uwa kupeela!

Cinshi calengele Davidi ukupeela ifingi ifyo? Alilwike ukuti fyonse ifyo akwete ne fyo apwishishishe fyafumine kuli Yehova. Mwi pepo alisumine ukuti: “Mwe Yehova Lesa wesu, ifipe ifi fyonse, ifyo twateyanishisha ku kumukuulile ng’anda ye shina lyenu lya mushilo, fyafuma mu kuboko kwenu, kabili fyenu fyonse. Mwe Lesa wandi, naliishibo kuti mweshe mitima,  no kucankilwa mu cishinka. Ine pano mu kutambalala kwa mutima wandi napeela ku kuitemenwa ifi fyonse; kabili nomba nimona no kusekelela abantu benu abasangwa pano ukupeela kuli imwe ku kuitemenwa.” (1 Imilandu 29:16, 17) Davidi alikatamike bucibusa bwakwe na Yehova. Alishibe ukuti alekabila ukubombela Lesa “no mutima wa cishinka kabili no mweo wa kuitemenwa,” kabili alisangile ubuseko mu kucite fyo. (1 Imilandu 28:9) Iyi mibele imo ine e yalengele Abena Kristu ba kubalilapo ukuba no mupashi wa kupeela.

Yehova—Kapekape Mukalamba

Yehova aba e ca kumwenako cawamisha mu kupeela. Aliba uwa kutemwa kabili uusakamana ica kuti “alenga akasuba ukubalikila ababifi na basuma kabili alenga imfula ukuloka pa balungama na bashalungama.” (Mateo 5:45) E upeela ku bantu bonse “ubumi no mupu na fyonse.” (Imilimo 17:25) Cine cine, nga fintu fye umusambi Yakobo asosele, “ica bupe conse icisuma ne ca kupeelwa conse icapwililika cifuma mu muulu, pantu ciika ukufuma kuli Shifwe wa lubuuto lwa mu muulu.”—Yakobo 1:17.

 Ubupe ubukalamba ubo Yehova atupeela bwaba kutuma “Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya.” (Yohane 3:16) Takwaba uwingatila alilinga ukupeelwa ubu bupe, “pantu bonse balibembuka kabili balapelebela ku bukata bwa kwa Lesa.” (Abena Roma 3:23, 24; 1 Yohane 4:9, 10) Icilubula ca kwa Kristu e shintililo kabili nshila Lesa apeelelamo “ica bupe cakwe icishingalondololwa,” e kutila, “icikuuku ca bupe fye ica kwa Lesa icacilamo.” (2 Abena Korinti 9:14, 15) Pa kulangilila ukutasha pa bupe bwa kwa Lesa, Paulo atangishe mu bumi bwakwe umulimo wa “kushimikisha ubunte imbila nsuma ya cikuuku ca bupe fye ica kwa Lesa.” (Imilimo 20:24) Alisumine ukuti Lesa afwaya aba “misango yonse bakapusuke no kufika ku kwishiba bwino bwino icine.”—1 Timote 2:4.

Ilelo, ici cilepwishishiwa no mulimo ukalamba uwa kushimikila no kusambilisha uulebombwa nomba mu fyalo 234 mwi sonde lyonse. Yesu alisobele pa lwa uyu mulimo, ilyo atile: “Imbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.” (Mateo 24:14) Cine cine, “imbila nsuma ili no kushimikilwa intanshi mu nko shonse.” (Marko 13:10) Umwaka wapwile bakabilisha ba mbila nsuma ukucila pa mamilioni 6 babombele amaawala 1,202,381,302 muli uyu mulimo kabili batungulwile amasambililo ya Baibolo ukucila pali 5,300,000. Uyu mulimo walikatamisha pantu abantu kuti baisafwa.—Abena Roma 10:13-15; 1 Abena Korinti 1:21.

Amamilioni ya mpapulo—pamo nga maBaibolo, ifitabo, na mabroshuwa—filapulintwa cila mwaka ku kwafwa ababa ne nsala ya kumfwa icine ca mu Baibolo. Mu kulundapo, bamagazini ba Ulupungu lwa kwa Kalinda na Loleni! ukucila pali bilioni umo balapulintwa. Ilyo abantu baleankulako bwino ku mbila nsuma, Amayanda ya Bufumu ayengi ne Fiyanda fya Kulonganinamo ifya Nte sha kwa Yehova filekuulwa, ifibomfiwa nge fifulo fya kusambilishishapo Baibolo. Ukulongana kwa muputule no kulongana kwaibela, kulatantikwa cila mwaka ukusanshako na mabungano ya citungu. Ukukansha bamishonari, bakangalila benda, baeluda, na babomfi batumikila na ko kulatwalilila. Tulatasha Yehova pa kubikako aya mateyanyo yonse ukupitila mu “musha wa cishinka kabili uwashilimuka.” (Mateo 24:45-47) Cine cine tulafwaisha ukumutasha!

Ukulanga Ukutasha Kuli Yehova

Kwati fye fintu cali pa kukuula itempele na pa kukumanisha ifyalekabilwa ku filonganino fya Bena Kristu ba kubalilapo, indalama shibomfiwa kuli ifi fyonse shifuma mu misangulo ya kuitemenwa. Lelo, tulingile ukulaibukisha ukuti takuli nangu umo uwinganonsha Yehova, Umwine wa fyonse. (1 Imilandu 29:14; Hagai 2:8) Kanshi, imisangulo bushininkisho bwa kuti twalitemwa Yehova kabili tulafwaisha ukulundulula ukupepa kwa cine. Paulo atile ifi fintu tucita mu kuitemenwa filanga “ukutootela kuli Lesa.” (2 Abena Korinti 9:8-13) Yehova alakoselesha ukupeela kwa musango uyu pantu kulangilila ukuti twalikwata umupashi wa kupeela no mutima uusuma kuli wene. Abo baba na bukapekape kabili abashintilila pali Yehova akabapaala kabili bakalunduluka lwa ku mupashi. (Amalango 11:13-15; Amapinda 3:9, 10; 11:25) Yesu atulaile ukuti mwali no kufuma insansa ilyo atile: “Mwaba insansa ishingi mu kupeela ukucila ishaba mu kupokelela.”—Imilimo 20:35.

Abena Kristu ababa no mupashi wa kupeela tabalolela fye inshita sha kukabila. Lelo, balafwailisha inshita sha ‘kubomba icisuma kuli bonse, lelo maka maka ku ba bwananyina mu citetekelo.’ (Abena Galatia 6:10) Pa kucincisha ukupeela kwa bukapepa, Paulo alembele ati: “Mwilaba ukucita icisuma no kupeelana ifintu, pantu amalambo aya musango yu e yateemuna Lesa.” (AbaHebere 13:16) Ukubomfya ifyo twakwata—inshita, amaka, ne fyuma—ku kwafwa bambi no kulundulula ukupepa kwa cine kulateemuna Yehova Lesa. Cine cine, alitemwa umupashi wa kupeela.

[Akabokoshi ne Cikope pe bula 28, 29

Ifyo Bamo Basangwilako

IMISANGULO YA MULIMO WA MWI SONDE LYONSE

Abengi balapaatulako, nelyo ukupekanya indalama isho babika mu tubokoshi twa misangulo utwalembwapo ati “Imisangulo ya Mulimo wa mwi Sonde Lyonse—Mateo 24:14.”

Cila mweshi, ifilonganino filatuma ishi ndalama ku maofeshi ya Nte sha kwa Yehova ayangalila umulimo mu calo cabo. Imisangulo ya kuitemenwa iya ndalama nayo kuti yatumwa mu kulungatika ku Treasurer’s Office, Watch Tower Bible and Tract Society of Pennsylvania, Akabokoshi 33459, Lusaka 10101. Ifibeekobeeko nelyo ifikwatwa fimbi ifya mutengo na fyo fiine kuti fyasangulwa. Kalata umwipi uulelondololo kuti ubu bupe bwa kulungatika, alingile ukutuminwa pamo ne yi misangulo.

UKUPEKANYA UKUPEELA MU KUITEMENWA

Ukusansha pa kupeela indalama ukwa kulungatika, kwalibako inshila na shimbi isha kupeelelamo ku kwafwilisha umulimo wa Bufumu mwi sonde lyonse. Pali isho nshila paba:

Inshuwalansi: Watch Tower Society kuti yalumbulwa ukuti e ikapoka indalama sha cipangano ca inshuwalansi nelyo ica kuleka incito nangu ukupoka penshoni.

Amaakaunti ya ku Banki: Amaakaunti ku banki, amasetifiketi ya ndalama sha kulekelapo incito, kuti fyaseekeshiwa nelyo ukulipilwa ku Watch Tower Society ilyo umwine afwa, ukulingana ne fyo ibanki abikishako indalama lifwaya.

AmaStock na MaBond: AmaStock na MaBond kuti fyasangulwa ku Watch Tower Society ngo bupe bwa kulungatika.

Impanga ne Fikuulwa: Impanga ne Fikuulwa ifingashitishiwa kuti fyasangulwa ngo bupe bwa kulungatika nelyo nga ni ng’anda, ukwikatila fye ukufikila umwine afwa. Ipusheni ku maofesi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo Sosaite impanga ne fikuulwa.

Ifya Cishale no Kuseekesha: Ifipe nelyo indalama ifya cishale kuti fyapeelwa ku Watch Tower Society ukupitila mu fipepala fya cishale ifya mwi funde, nelyo Watch Tower Society kuti yalembwa mu cipangano ca kuseekesha ifipe nelyo indalama. Inshita shimo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nga fintu amashiwi ya kuti “ukupekanya ukupeela mu kuitemenwa” yalangilila, uulesangula ukubomfya ishi nshila twalandapo alekabila ukupekanishisha kabela.

Nga mulefwaya ukupeela mu kuitemenwa, mulingile ukwipusha iofesi lya Nte sha kwa Yehova ukupitila mu kulemba nelyo ukutuma lamya ukubomfya akeyala kali pe samba.

Treasurer’s Office

Watch Tower Bible and Tract Society of Pennsylvania

Box 33459, Lusaka 10101

Telefoni: (01) 272062

[Icikope pe bula 26]

Cinshi cacincishe Abena Kristu ba kubalilapo ukuba na bukapekape?