“Icebo ca Kwa Lesa ca Maka Icine Cine!”

“ICEBO ca kwa Lesa ca mweo kabili ca maka.” (AbaHebere 4:12) Ukusuminisha ku maka ya Cebo ca kwa Lesa ayashingacimfiwa, mu Kalenda ya Nte sha kwa Yehova iya mu 2003 mwaba amalyashi ya bumi aya cine cine 6 ukufuma mu fyalo fimo fimo. Mu kamutwe katila “Pa Ntanshi na Pa Numa,” kalenda yalangilile ifyo umulimo wa kusambilisha uwa Nte sha kwa Yehova wafwa abantu ukuwamya imibele yabo, ukusha imikalile yabipa, ukukosha imikalile yabo iya mu lupwa, no ukuteesa bucibusa bwabo na Lesa.

Amakalata ayengi aya kutasha pali kalenda ya mu 2003 yalipokelelwa. Ifi e fyo yamo yalandapo:

“Iyi kalenda bushininkisho ku Bena Kristu ba cine ukuti kwaliba na bambi ukupala bena abalwila icitetekelo. Nomba ifikope fya kulabebukishako pa kwaluka uko bamo ba-aluka.”—Steven, United States.

“Nalefwaisha ukulemba ifi fyebo ifinono pa kuti ningamwishibisha ifyo kalenda ya mu 2003 yamfika pa mutima. Takwatala akuba kalenda iyankuma nge yi. Aya malyashi ya bumi nakulayasenda mu cola candi ica mu butumikishi pa kuti ndelangishako abantu ifya kumwenako fyabamo no bushininkisho ubukalamba ubwa maka Baibolo yakwata aya kwalula abantu.”—Marc, Belgium.

“Kalenda yalinkuma sana. Napene ndile pa kubelenga no kumone fyo Yehova ayalula aba bantu. Ici calinkoselesha na ine ukutwalilila ukwaluka mu bumi bwandi. Nomba ndayumfwa sana pa kuba ulubali lwa bamunyina ba mwi sonde lyonse.”—Mary, United States.

“Yesu aikatilwe sana amabumba inkumbu pa mulandu wa mibele yabipa iya ku mupashi baalimo. Ndemutasha pa kupashanya ica kumwenako ca kwa Kristu pa kusabankanya amalyashi ya bumi muli kalenda yesu iya 2003. Mu bumi bwandi, takwatala akuba kalenda yanenga ukuponye filamba nge yi.”—Cassandra, United States.

“Lintu nali ne myaka 11, natendeke ukupeepa; lyene natendeke kubomfya imiti ikola. Ilingi naletontonkanya pa kuipaya. Ilyo naishibe Yehova, nalyafwiwe ukuleka filya fibelesho. Iyi kalenda yalicindama sana kuli ine. Ifya kumwenako fya bamunyinane ne nkashi aba mu fyalo fimo fimo filankosha. Nomba ninjishiba ukuti nshaba neka muli ubu bulwi kabili icacindamisha kutemwa Yehova no kulamubombela no mutima onse.”—Margaret, Poland.

“Kwena Icebo ca kwa Lesa ca maka icine cine! Lintu napokelele kalenda ya mu 2003, nalefwaya ukulila. Ifi fya kukumanya, pamo ne fikope filakosha sana icitetekelo.”—Darlene, United States.

“Bamo pali aba imibele bali nayo kale yalipalana sana na intu nakwete kale. Yehova alimpeela amaka aya kuleka imibele yabipa iya-afya ukuleka. Ndemutasha sana pali aya malyashi ya bumi.”—William, United States.