“Palameni Kuli Lesa, Na o Akapalama Kuli Imwe”

Ifyo Bali Kale ne fyo Baba Nomba—Ifishinte fya mu Baibolo Fyalengele Baaluke

ILYO bali abaice, baAdrian bali aba cipyu kabili abakali sana. Ukufulwa bwangu kwalebalenga ukububuka mu bukali. Balenwa ubwalwa, ukupeepa fwaka, kabili imikalile yabo yali iya bucisenene. BaAdrian baishibikwe ati aba lubeyo lwa nsunsu kabili bakomene ululembo ulwa kulanga ukuti basumine mu mayendele. Ukulondolola iyo myaka, batila: “Nalebeya nsunsu, no kusubako glu wa kukambatikilako pa kuti umushishi ukose no kwiminina, kabili limo naleupenta wakashika nelyo wamoneka fimbi.” BaAdrian balitulile no moona.

BaAdrian batendeke ukwikala mu ng’anda iyaonaika na bacaice banabo bacintomfwa. Mulya, balenwa no kubomfya imiti ikola. BaAdrian batila, “nalenwa imiti ikola iyabindwa kabili naleilasa no muti wa tulo no kubomfya icikola conse icamoneka. Nga nshikwete imiti ikola nelyo glu, nalefumya amafuta muli bamotoka ba bene ayalenenga ukukolwa.” Apo baleibila abantu pa lwalala, batendeke ukutiinya abantu kabili baishileba aba lukaakala sana. Abengi tabalebafwaya. Kabili, imisango yabo iyabipa yalengele bacintomfwa ukubatemwa.

Panono panono, baAdrian balikutulwike ukuti, ico “abanabo” baleangalila na bo ni co balemwenamo akaliilo. Kabili baishilemona ukuti “mu bukali bonse no lukaakala tamwali busuma nangu bumo.” Ukuyumfwa aba fye no kufuupulwa kwalengele baleke ukwangala na banabo. Ilyo basangile Ulupungu lwa kwa Kalinda pa cifulo ca bukuule, balitemenwe ifyebo fyashimpwa pali Baibolo ifyalimo, kabili ici calengele batendeke ukusambilila Baibolo ne Nte sha kwa Yehova. BaAdrian bafwaishe ukukonka ubwite bwa kuti: “Palameni kuli Lesa, na o akapalama kuli imwe.” (Yakobo 4:8.) Ne ci calengele baAdrian mu kwangufyanya ukukutuluka ukuti balekabila ukutendeka ukukonka ifishinte fya Baibolo ifisangwa mu Malembo ya Mushilo.

Ukwishiba na fimbi pali Baibolo kwalengele kampingu wa baAdrian ukuwama kabili kwa-alwile imikalile yabo. Balyafwiwe ukuleka icipyu kabili batendeke ukuilama. Icebo ca kwa Lesa calyafwile baAdrian ukwalula ubuntu bwabo.—AbaHebere 4:12.

Lelo, bushe Baibolo kuti yakwata shani amaka yalume fyo? Ukwishiba Amalembo kulatwafwa ‘ukufwala ubuntu bupya.’ (Abena Efese 4:24) Ca cine, ubuntu bwesu bulaaluka nga twakonka ukwishiba kwine kwine ukusangwa mu Baibolo. Lelo, bushe uko kwishiba kwalula shani abantu?

Intanshi, Baibolo ilatulanga imibele yabipa iyo tufwile ukutaluka. (Amapinda 6:16-19) Ica bubili, Amalembo yatucincisha ukuba ne mibele isuma iyo umupashi wa mushilo uwa kwa Lesa uleta. Iyi yaba “ukutemwa, ukusekelela, umutende, ukushishimisha, icikuuku, ubusuma, icitetekelo, ukufuuka, ukuilama.”—Abena Galatia 5:22, 23.

Ukumfwikisha ifyo Lesa afwaya kwalyafwile baAdrian ukuibebeta no kumona imibele balekabila ukulundulula ne yo balekabila ukutaluka. (Yakobo 1:22-25) Lelo, iyo yali fye ni ntendekelo. Ukusansha  pa kwishiba, umucincisho walekabilwa, e kuti, ica kucincisha baAdrian ukufwaya ukwalula imikalile.

BaAdrian basambilile ukuti, ubuntu bupya ubwawama bulengwa “ukulingana ne cipasho ca kwa Kalenga wa buko.” (Abena Kolose 3:10) Baishilekutuluka ukuti ubuntu bwa Mwina Kristu bufwile ukupalana no buntu bwa kwa Lesa umwine. (Abena Efese 5:1) Ukupitila mu kusambilila Baibolo, baAdrian, basambilile pa fyo Yehova abomba na bantunse kabili balimwene imibele ya kwa Lesa iisuma, pamo nga, ukutemwa, icikuuku, ubusuma, uluse, no bulungami. Ukwishiba ifyo kwalengele baAdrian ukutemwa Lesa no kubombesha ukuba umuntu uo Yehova atemwa.—Mateo 22:37.

Mu kuya kwa nshita kabili pa kwafwilishiwa no mupashi wa mushilo uwa kwa Lesa, baAdrian basukile balama icipyu cabo. Bene na bakashi babo pali nomba balafwa bambi ukuwamya imikalile yabo ukupitila mu kwishiba Baibolo. BaAdrian batila, “ncili umumi kabili ndaipakisha ukuba mu lupwa lwa nsansa ukupusanako na banandi abengi abafwa kale.” Baba bushininkisho twingasontako ubwa kuti Baibolo yalikwata amaka ya kuwamya imikalile ya bantu.

[Amashiwi pe bula 25]

“Mu bukali bonse no lukaakala tamwali busuma nangu bumo”

[Akabokoshi pe bula 25]

Ifishinte fya mu Baibolo Ifyafwa

Ifi twalalandapo ni fimo pa fishinte fya mu Baibolo ifya-afwa abengi ababa ne cipyu no lukaakala ukuba aba mutende:

“Mube aba mutende ku bantu bonse. Mwe batemwikwa mwilalandula, lelo shiileni ubukali bwa kwa Lesa incende.” (Abena Roma 12:18, 19) Lekeni Lesa apingule inshita ya kulandula no wa kukanda. Kuti acite fyo ninshi naishiba ne fishinka fyonse, kabili icilandushi conse icifuma kuli wene cicitwa mu bupingushi bwapwililika.

“Kalipeni, lelo mwibembuka; mwileka akasuba kawe mucili abakalifiwa, kabili mwipeela Kaseebanya apa kwikala.” (Abena Efese 4:26, 27) Limo palaba icilenga umuntu ukukalipa. Ici nga cacitika, tafwile ukutwalilila ‘uwakalifiwa.’ Mulandu nshi? Pantu ici kuti calenga acita fimo ifyabipa, ne ci kuti capeela “Kaseebanya apa kwikala” icingalenga Yehova Lesa ukukanamusenamina.

“Nashako ubukali, no kuleke cipyu; wilalunguluka, calola fye ku kubifya.” (Amalumbo 37:8) Ukukanalama icipyu kulenga umo ukukanailama ku kucita ifyabipa. Nga ca kuti umuntu akalipa, kuti alanda nelyo ukucita fimo ifingakalifya wene na bambi.