“Abaiteyanya  Ku Mulimo Onse Usuma”

“ULEBACINKULA ukunakila no kulaumfwila amabuteko na bamulopwe abaleteeka, ukuba abaiteyanya ku mulimo onse usuma.” (Tito 3:1) Mulimo nshi usuma umutumwa Paulo alelandapo ilyo alembele aya mashiwi ku basumina banankwe? Uwasoma ifya mu Baibolo E. F. Scott alandile pa musango umo uwa mulimo usuma. Atile: “Abena Kristu balingile ukumfwila ubuteko no kuba abaiteyanya ku mulimo onse usuma. . . . Nga kwacitika fimo, Abena Kristu bafwile ukuba pa ba kubalilapo ukwafwilisha abantu. Lyonse kwali no kuba umulilo, ifikuko, no tuyofi twapusanapusana. Pali iyi nshita, abekashi basuma bali no kuipeelesha ukwafwilisha abantu banabo.”

Abena Kristu balabombako imilimo imo iya kwafwilisha abantu kulila fye iyo milimo taipilika amafunde ya kwa Lesa. (Imilimo 5:29) Ku ca kumwenako, cila mwaka ababomba pa maofeshi ya Nte sha kwa Yehova aya mu Japan, mu Ebina, balabasambilisha ifya kushimya umulilo ne fya kucita ilyo kwaba umulilo. Bomfwila ifyo icipani cishimya umulilo casosa. Pa nshita ilya, bonse ababombela pa Bethel balesa pamo no kukutika ku mashiwi ya mwiminishi wa ku cipani ca bashimya umulilo.

Kabili ilyo ubuteko bwa cikaya bwateyanya ukuti utubungwe twise pamo ku kulanga ifya kucita pa kucilikila umulilo, ababombela pa maofeshi ya Nte sha kwa Yehova ku Japan na bo balasangwako. Kabili balicite ci ukucila pa myaka 10. Pali iyi nshita, utwampani no tubungwe utwa mu musumba tulalanga ifyo twaiteyanya ukushimya no kucilikila umulilo. Aba pa maofeshi ya Nte sha kwa Yehova balalambulwa ilingi line, pantu balishiba ifya kushimya ne fya kucilikila umulilo kabili balabombela pamo ne cipani cishimya umulilo. Mu 2001, e bapokele icilambu cikalamba. Baliipangasha ukubomba umulimo usuma uwingapususha abantu nga kwaba umulilo.

Umulimo Uwacindamisha

Na lyo line, Inte sha kwa Yehova balabomba umulimo usuma na umbi uwacilanapo ukucindama, kabili na o mulimo wa kupususha abantu. Batandalila abantu banabo ku kubashimikila imbila nsuma iya Bufumu bwa kwa Lesa. (Mateo 24:14) BaNte bakoselesha abantu ukusambilile fishinte fya mu Baibolo no kufibomfya mu mikalile yabo pa kutila bawamyeko imikalile no kuba ne subilo lya bumi bwa muyayaya mu calo umukaba umutende wa cine cine no mutelelwe wine wine.

Abantu bamo tabaishiba ifyo umulimo wa Nte sha kwa Yehova wacindama. Bamona kwati besa mu kubacusha fye. Lelo shicilye we shina lya Jean Crepeau uwa mu Cilye Cikalamba ica ku Quebec mu Canada te fyo amona. Mu musumba wa Blainville, uwa mu Quebec, mwapangilwe ifunde lya kuti baNte bafwile ukupoka icitupa pa kushimikila ku ng’anda ne ng’anda. BaNte batwele uyu mulandu ku cilye. Mu fyapingwile icilye, Shicilye, Crepeau, atile: “Ilyo Inte sha kwa Yehova baleshimikila ku ng’anda ne ng’anda, babomba umulimo wa kwafwilisha abantu . . . kabili ifitabo ifyo BaNte bapeela ku bekashi abalefwaya ukusambilila fyalicindama. Filanda pa fya mapepo, pali Baibolo, pa miti ikola, pali bucakolwa, pa masomo ya baice, pa mafya ya mu cupo na pa kulekana.” Bakonkenyepo abati: “Icilye cileti musalula sana kabili musebanya ukulinganya Inte sha kwa Yehova ku bantu abaya baleshitishe fintu.”

Konse uko ba Nte bekala, balafwilisha abantu ukuwamya imikalile yabo no kubapeela isubilo lya ku nshita ya ku ntanshi. Baibolo ilabapangasha ukubomba uyu mulimo, pantu itila: “Amalembo yonse yantu yapuutwamo kuli Lesa kabili ya mulimo ku kusambilisha, ku kwebaula, ku kulungika ifintu, ku kusalapula kwa mu bulungami, ukuti umuntu wa kwa Lesa abe uwafikapo bwino bwino, uwaipangasha umupwilapo ku kubomba umulimo onse uusuma.”—2 Timote 3:16, 17.

Bushe kuti mwafwaya ukwishiba ifyo Inte sha kwa Yehova ‘baiteyanya ku mulimo onse uusuma’? Tulemukoselesha ukuti sambilileni na bo Baibolo. Kabili na imwe mukamwenamo muli uyu mulimo babomba uwa kwafwilisha abantu ku ncende uko kwine mwikala e lyo na mwi sonde lyonse.

[Ifikope pe bula 30, 31]

Inte sha kwa Yehova bafwaya ukunakila amabuteko ya calo

[Icikope pe bula 31]

BaNte balishibikwa ukuti balafwilisha abantu banabo