Ifipusho Ukufuma ku Babelenga

Bushe ni mu nshila nshi Esekiele abelele “cibulu” pa nshita Yerusalemu yashingilwe no konaulwa?

Esekiele ali cibulu mu kuti tali na kusosa ifyebo na fimbi ifya kulunda ku bukombe bwa kusesema ubwa kwa Yehova ubo abilishe.

Esekiele atendeke umulimo wakwe nga kacefya wa busumino uwa bena Israele abali bankole mu Babele mu “mwaka uwali wa cisano kuli bunkole bwa mfumu Yehoyakini,” mu 613 B.C.E. (Esekiele 1:2, 3) Pa bushiku bwalenga 10 ubwa mu mweshi walenga 10 mu 609 B.C.E., Esekiele alipuutilwemo na Lesa kabili balimwebele kabela ilyo abena Babele bali no kushinga Yerusalemu. (Esekiele 24:1, 2) Bushe cinshi cali no kucitika ku musumba nga washingwa? Bushe Yerusalemu na bekashi ba uko ababule citetekelo bali no kufyuka bulya bonaushi? Pamo nga kacefya, Esekiele ali nabilisha ubukombe bwa bupingushi kale. E co tacalekabilwa ukuti alundeko ifyebo na fimbi kuli bulya bukombe, pa kuti engabashinina. E ico, abele cibulu pantu tali na kusosa ifyebo ifyalundwapo pa lwa kushingwa kwa Yerusalemu.—Esekiele 24:25-27.

Imyeshi 6 pa numa ya konaulwa kwa Yerusalemu mu 607 B.C.E., umo uwafyukile aletele ubukombe kuli Esekiele mu Babele ukuti umusumba wa mushilo walyonawilwe. Icungulo pa ntanshi uwafyukile talafika, Yehova “ayasamwine akanwa kandi . . . [nshali cibulu, NW] kabili.” (Esekiele 33:22) Bucibulu bwa kwa Esekiele bwalipwile pa nshita ilya iine.

Bushe pali ilya nshita Esekiele ali ni cibulu icine cine? Iyo, pa nshita ali cibulu, Esekiele alilandile ifyebo fya kusesema ku fyalo fya mu bwina mupalamano ifyalesekelela ilyo Yerusalemu acimfiwe. (Esekiele, ifipandwa 25-32) Mu kubangilila ilyo Esekiele alebomba nga kasesema kabili kacefya, Yehova amwebele kuti: “No lulimi lobe ndekakatika mu kanwa kobe, ku kuleka [ube cibulu, NW] no kukanaba kuli bene umuntu wa kwebaula; pantu bene ni ng’anda ya bucintala. Lelo ilyo nkasosa kuli iwe, nkakwasamwina akanwa.” (Esekiele 3:26, 27) Yehova nga takwete ubukombe bwa kusosa ku bena Israele, Esekiele tali na kusosa icili conse kuli lulya luko. Esekiele ali no kusosa fye ifyo Yehova alefwaya ukuti asose kabili pa nshita intu Yehova alefwaya ukuti acite fyo. E co ukuba cibulu kwalepilibula ukukanasosa ifyebo fya kusesema ifyacindama ku bena Israele.

Ibumba lya bakacefya ba muno nshiku, Abena Kristu basubwa, balasoka ukuti Kristendomu, uwapashanishiwa kuli Yerusalemu, akapingulwa. Ilyo “Babiloni Mukalamba,” ubuteko bwa calo ubwa mipepele ya bufi, akasanswa no konaulwa mu bucushi bukalamba, ibumba lyasubwa ilya buEsekiele talyakasose ifyebo na fimbi pa lwa mpela ya Kristendomu, iyaba e lubali lukalamba ulwa Babiloni Mukalamba.—Mateo 24:21; Ukusokolola 17:1, 2, 5.

Ca cine, inshita ikesa ilyo abashalapo abasubwa na banabo bakaba bacibulu, tabakasose ifyebo fyalundwapo kuli Kristendomu. Ico cikacitika lintu “insengo ikumi (10)” ne “ciswango” fikonaula Babiloni Mukalamba no kumucita ubwamba. (Ukusokolola 17:16) Lelo, ici tacipilibula ukuti Abena Kristu bakaba bacibulu icine cine. Bakalumbanya Yehova no kulamulumbula cila bushiku na “ku nkulo shonse” nga fintu fye bacita na lelo.—Amalumbo 45:17; 145:2.