Ifishima Ifishingekalamo Amenshi

MU nshita sha mu Baibolo, ifishima fyalepangwa fye na bantu kabili balefibomfya sana ku kusungilamo amenshi. Inshita shimo, mu Calo Calaiwe, ifishima fyali e nshila yeka fye iya kusungilamo amenshi yacindamisha.

Ilyo kasesema Yeremia alelemba ubukombe bwa kwa Lesa, abulingenye ku fishima, ati: “Bubili ububi ubo abantu bandi bacita, basuula ine, ne kamfukumfuku ka menshi ya mweo, no kuyaifukwile fishima, ifishima ifyalalika ifishingekalamo amenshi!”—Yeremia 2:13.

Abena Israele balishiile Lesa wabo, Yehova—“akamfukumfuku ka menshi ya mweo”—no kucite fipangano fishingashintililwapo ne nko sha cisenshi no kupepa imilungu iishingacita nangu cimo, iya bufi. Ifyo fyubo balesuubila, nga fintu Yeremia alanda, fyali fye fishima fyalesuuma umushali amaka ya kucingilila atemwa ukupususha.—Amalango 28:20.

Bushe pali ifyo twingasambilila kuli fi fya kumwenako fya kale? Nga fintu cali mu nshiku sha kwa Yeremia, Lesa wa muyayaya, Yehova, na lelo line e Ntulo yeka fye iya menshi yapeelo mweo. (Amalumbo 36:9; Ukusokolola 4:11) Ni kuli wena eka fye, ukupitila mu Mwana wakwe, Yesu Kristu, e ko abantunse bengapokelela ubumi bwa muyayaya. (Yohane 4:14; 17:3) Na lyo line, abantunse ilelo basalapo ukukaana no kusuula fye icebo ca kwa Lesa icaba mu Baibolo, nga filya fyacitile aba mu nshiku sha kwa Yeremia. Lelo, batetekela inshila sha mapolitiki isha ino nshita, amano ya buntunse aya fye, ne mfundo sha fye na mano yasuula Lesa. (1 Abena Korinti 3:18-20; Abena Kolose 2:8) Naci-ilanga fye. E ico nani muli no kutetekela? Bushe mukatetekela Yehova, “akamfukumfuku ka menshi ya mweo,” nelyo “ifishima ifyalalika ifishingekalamo amenshi”?

[Icikope pe bula 32]

Icimumbwa ca kwa lesa mwanakashi icasangilwe mu nshiishi ya ku Israele

[Abatusuminishe]

Abapeele ulusa lwa kukopa ici cikope ni baBritish Museum