“Mube Abatootela”

“Lekeni umutende wa kwa Kristu uteeke mu mitima yenu . . . Kabili mube abatootela.”—ABENA KOLOSE 3:15.

1. Bupusano nshi tumona pa cilonganino ca Bwina Kristu ne calo citungululwa na Satana?

ABABA mu filonganino 94,600 ifya Nte sha kwa Yehova mwi sonde lyonse, balatootela. Ukulongana konse kutendeka no kusondwelela ne pepo umo batasha Yehova. Ilingi tulomfwa amashiwi ya kuti “natasha,” nelyo amashiwi yapalako ayo abanono na bakalamba pamo na baNte abapya na bakokole basosa ilyo bakumana pamo ku kupepa no kubishanya mu nsansa. (Amalumbo 133:1) Fintu ici capusana na bukaitemwe bwaba na bengi ‘abashaishiba Lesa kabili abashinakila imbila nsuma’! (2 Abena Tesalonika 1:8) Twikala mu calo umushaba kutasha. Ici tacitusungusha nga twatontonkanya pa waba lesa wa cino calo—Satana Kaseebanya, solwesolwe wa bukaitemwe uo icilumba cakwe na bucipondoka fya-anana mu bantunse!—Yohane 8:44; 2 Abena Korinti 4:4; 1 Yohane 5:19.

2. Kusoka nshi tufwile ukuumfwila, kabili mepusho nshi twalabebeta?

² Apo twaba mu calo ca kwa Satana, tufwile ukuba abalola pa kuti tatusongelwe ku mibele ya ciko. Mu nshita ya batumwa, umutumwa Paulo acinkwileko Abena Kristu ba ku Efese ati: “Mwaendele inshita imo umwabela ubwikashi bwa cino calo, umwabela kateeka wa maka ya mu lwelele, umupashi uyo nomba ubomba mu bana ba bucintomfwa. Awe muli bene e mo ifwe bonse inshita imo twaendele umwabela ulunkumbwa lwa mubili wesu, twalecita ifintu ifyalefwaya umubili na matontonkanyo, kabili ku cifyalilwa fye twali abana ba bukali ifyo na bambi baba.” (Abena Efese 2:2, 3) E fyo caba na ku bengi pali lelo. E co, bushe kuti twatwalilila shani ukuba abatootela? Kwafwa nshi Yehova atupeela? Finshi twingacita pa kulanga ukuti tulatasha icine cine?

 Imilandu ya Kutashishapo Yehova

3. Finshi tutashishapo Yehova?

³ Yehova Lesa, Kabumba wesu kabili Kapeela wa Bumi, e o tufwile ukutasha, maka maka ilyo twabebeta ubupe bushaifulila ubo atupeela. (Yakobo 1:17) Cila bushiku tulatasha Yehova ukuti tuli abomi. (Amalumbo 36:9) Tulamona ifingi ifyo Yehova apanga, pamo nga akasuba, umweshi, ne ntanda. Isonde lyalikwata umushili uwabamo ifitungilila ubumi, umwela, na fimbi ificitika mu bubumbo. Ifi fyonse filangilila ukuti tufwile ukutasha Shifwe wa mu muulu uwa kutemwa. Imfumu Davidi yaimbile ati: “Mwe Yehova Lesa wandi, ifipesha amano ifyo mwacitile fingi, na matontonkanyo yenu ayalola kuli ifwe; takuli uwingapashaniwa kuli imwe! Nga naesho kufilongola napamo ukufisosa, fyalifula, te kuti fipendwe.”—Amalumbo 40:5.

4. Mulandu nshi tulingile ukutasha Yehova pa kubishanya kwa nsansa tuipakisha mu filonganino fyesu?

⁴ Nangu line ababomfi ba kwa Yehova pali lelo tabekala mu paradaise, balaipakisha paradaise wa ku mupashi. Mu Mayanda yesu aya Bufumu na pa kulongana kukalamba konse, tulamona ukuti ifisabo fya mupashi wa kwa Lesa filabomba mu basumina banensu. Cine cine, ilyo baNte bamo baleshimikila ku bashaishiba nangu fimo nelyo abaishiba fye finono pa kupepa, balalanda pa fyo Paulo asosele muli kalata wakwe ku bena Galatia. Intanshi balanda pa “milimo ya bumubili” no kwipusha abalekutika ifyo baamona pali ici. (Abena Galatia 5:19-23) Abengi balasumina apo pene fye ukuti iyi mibele e yakwata abantu pali lelo. Ilyo babalanga ifisabo fya mupashi wa kwa Lesa kabili nga balaalikwa ku Ng’anda ya Bufumu ukuti baimwene abakwata ifi fisabo, abengi balasumina ukwabula ukupoose nshita abati: “Lesa aba muli imwe cine cine.” (1 Abena Korinti 14:25) Kabili ici tacipelela fye ku Ng’anda ya Bufumu. Konse uko mwingaya, nga mwakumanya abali bonse pa Nte sha kwa Yehova ishicilile pa mamilioni 6, mukasanga ukuti ba nsansa kabili balasekelela. Cine cine, tufwile ukutasha Yehova uupeela umupashi wakwe pa kuti kube uku kubishanya kukuulilila.—Sefania 3:9; Abena Efese 3:20, 21.

5, 6. Kuti twaba shani abatootela kuli Lesa pa cilubula, icaba bupe bwakulisha?

 ⁵ Ica bupe icikalamba sana, ica kupeelwa cafikapo ico Yehova atupeela, Mwana wakwe, Yesu, muli uyo ilambo lya cilubula lyapeelelwe. Umutumwa Yohane alembele ati: “Nga ifi e fyo Lesa atutemenwe, kanshi na ifwe bene tufwile ukutemwana.” (1 Yohane 4:11) Tulanga ukuti tulatasha pe lambo, te pa kutemwa fye Yehova no kumutasha, lelo na pa kulanga ku mikalile yesu ukuti twalitemwa bambi.—Mateo 22:37-39.

⁶ Kuti twasambilila ifingi pa fya kulanga ukuti tulatasha nga twabebeta ifyo Yehova acitile ku bena Israele ba pa kale. Yehova asambilishe abantu ifingi ukubomfye Funde ilyo apeele uluko ukupitila muli Mose. Ukupitila mu “mimonekele ya kwishiba ne ya cine mu Mafunde,” kuti twasambilila ifingi ifingatwafwa ukukonka ukufunda kwa kwa Paulo ukwa kuti: “Mube abatootela.”—Abena Roma 2:20; Abena Kolose 3:15.

Amasambililo Yatatu Ukufuma mwi Funde lya kwa Mose

7. Bushe ukupeela ica pe kumi kwapeele shani abena Israele ishuko lya kulanga ukuti balatasha kuli Yehova?

⁷ Mwi Funde lya kwa Mose, Yehova aliteyenye inshila shitatu isho abena Israele bali no kutashishamo ukufuma ku mutima pa busuma bwakwe. Ica ntanshi twalalandapo kupeela ica pe kumi. Ica pe kumi ica filimwa, pamo ne “ya pe kumi iya maombe ne mikuni,” fyali no kuba ‘ifya mushilo kuli Yehova.’ (Ubwina Lebi 27:30-32) Ilyo abena Israele baumfwilile, Yehova alibapaalile sana. Atile: “Leteni ica pe kumi conse mu ng’anda ya cipao, ukuti mubemo ifya kulya mu ng’anda yandi, kabili shi mundabwile kuli ico, e fyo Yehova wa milalo asosa; mumone nga nshakamwiswile ifipunda fya mu muulu, no kumupongolwele paalo, kukasuke kukabule incende ya kubapo.”—Malaki 3:10.

8. Bupusano nshi bwali pa misangulo ya kuitemenwa na pa kupeela ica pe kumi?

⁸ Ica bubili, pa mbali ya kupeela ica pe kumi, Yehova ateyenye ukuti abena Israele balepeela imisangulo ya kuitemenwa. Aebele Mose ukweba abena Israele ati: “Ilyo mukengila mu calo ico ndemutwalako, imwe pa kulyapo icilyo ca calo ico, e lyo mukasangule ica musangulo kuli Yehova.” Ifisabo fya ntanshi fimo ifya ‘mufuba ne catulaikwa’ fyali no kupeelwa kuli Yehova nge “ca musangulo” ku nkulo shabo shonse. Moneni ukuti tababapimine ifyo bali no kusangula. (Impendwa 15:18-21) Lelo, ilyo abena Israele bapeele umusangulo wa kutootela, balesuubila ipaalo ukufuma kuli Yehova. Kwaba imitantikile yapalako mu cimonwa ca kwa Esekiele ice tempele. Tubelenga ati: “Ne fyawamisha  fya muli fyonse ifyabalilapo ukupya ifya fisabo fyonse, na conse ica musangulo ca pa fintu fyonse ifyo musangula, fikabe ifya bashimapepo; ne fyawamisha fya mu fya mufuba fyenu mukalepeela kuli bashimapepo, ku kulenge paalo ukwikala ku ng’anda yobe.”—Esekiele 44:30.

9. Cinshi Yehova afundile ukupitila mu kusota?

⁹ Ica butatu, Yehova ateyenye ukusota. Lesa atile: “Kabili pa kulobolola ukulobolola kwa calo cenu, wikapwisha kulobolola na mu mbali ya cilime cobe, kabili ukusota wikasota mu kulobolola kobe. Ne bala lyobe lya myangashi wikasotamo, ne yalukuta mwi bala lyobe lya myangashi wikalonganika; ukafileke ku mulanda na ku mulebeshi: ni ne Yehova Lesa wenu.” (Ubwina Lebi 19:9, 10) Apa na po, tababapimine ifya kusha. Cali ku mwina Israele umo umo ukumona ifyo ali no kushiila abalanda. Imfumu ya mano Solomone yalondolwele bwino bwino ati: “Uukumbusuko mulanda aashima Yehova, e ukabwesesha kuli wene ica kutetesa cakwe.” (Amapinda 19:17) E co, Yehova abasambilishe ukuba ne cililishi ku balanda no kubalangulukilako.

10. Finshi fyatumbwikemo ku bantu ba mu Israele ilyo bafililwe ukulanga ukuti balatasha?

¹⁰ Yehova apaalile abena Israele ilyo baumfwilile ifunde lya kupeela ica pe kumi, no kusangwila abapiina mu kuitemenwa. Lelo ilyo abantu ba kwa Israele bafililwe ukulanga ukuti balatasha, Yehova alekele ukubabisha. Ici caletele akayofi na kuli pele pele ukusendwa bunkole. (2 Imilandu 36:17-21) E co, bushe finshi twasambililako?

Ifyo Tulanga Ukuti Tulatasha

11. Ni nshila nshi ikalamba twingatashishamo Yehova?

¹¹ Na ifwe inshila ikalamba iyo tulumbanishishamo Yehova no kumutasha, yaba “kupeela.” Ca cine, fwe Bena Kristu tatukonka Ifunde lya kwa Mose. E co, tatwashingamwa ukutuula amalambo ya nama nelyo ifilimwa. (Abena Kolose 2:14) Na lyo line, umutumwa Paulo akonkomeshe Abena Kristu abaHebere ati: “E ico muli wene e mo tutuulile ilambo lya malumbo kuli Lesa, e kutila, icisabo ca milomo iitootele shina lyakwe.” (AbaHebere 13:15) Pa kubomfya amaka yesu ne fyo twakwata ku kutuula ilambo lya kulumbanya Yehova, nampo nga tuli mu butumikishi bwa ku cintubwingi nelyo “mu nkuta” sha Bena Kristu banensu, kuti twatasha Yehova Lesa, Shifwe wa kutemwa. (Amalumbo 26:12) Pa kucite fyo, cinshi twingasambilila ku nshila abena Israele baletashishamo Yehova?

12. Ukukuma imilimo yesu iya Bwina Kristu, cinshi twingasambilila ku kupeela ica pe kumi?

¹² Intanshi, nga fintu tumwene, umwina Israele onse alishingemwe ukupeela ica pe kumi. Fwe Bena Kristu, twalishingamwa ukubombako ubutumikishi no kusangwa ku kulongana kwa Bwina Kristu. Ifi, fintu tufwile fye ukucita. Mu kusesema kwakwe ukwa lulumbi pa lwa nshita ya mpela, Yesu atile: “Ne mbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.” (Mateo 24:14; 28:19, 20) Umutumwa Paulo apuutilwemo ukulemba pa kulongana kwesu ukwa Bwina Kristu ati: “Tutontonkanye ifya kucincishanya ku kutemwa kabili ku kubombe milimo isuma, twiba abalekelesha ukulongana kwesu, filya waba umusango wa bamo, lelo tukoseleshanye, pali bufi apo mulemona ubushiku bulya bulepalama.” (AbaHebere 10:24, 25) Tulanga ukuti tulatasha kuli Yehova nga twasumina umulimo twashingamikwa uwa kushimikila no kusambilisha pamo no kubishanya na bamunyinefwe lyonse pa kulongana kwa cilonganino, ukumona ifi fintu nge shuko icine cine.

13. Cinshi tusambilila ku fyo imisangulo ya kuitemenwa no kusota fyatantikwe?

¹³ Ukulunda pali ico, kuti twamwenamo nga twabebeta na fimbi fibili ifyapekanishiwe ifyo abena Israele balelangilako ukutasha. Ifi fyali misangulo ya kuitemenwa no kusota.  Ukupusanako no kupeela ica pe kumi, uko babapimine ifya kupeela, tabapiminwe ifyo bali no kusangula mu kuitemenwa ne fyo bali no kushiila bambi ukusota. Lelo, kuli ifi fyena, ukutasha kwa mubomfi wa kwa Yehova e kwamucincishe ukupeela ifyo atemwa. Cimo cine na kuli ifwe. Twalishiba ukuti ukubombako ubutumikishi no kusangwa ku kulongana kwa Bwina Kristu yaba milimo yacindama ku mubomfi wa kwa Lesa onse, lelo, bushe tulacita ifi fintu no mutima onse kabili no kuitemenwa? Bushe tulamona ukuti iyi milimo ilatupeela ishuko lya kulanga ukuti tulatasha icine cine pa fyo Yehova atucitila? Bushe tulabomba iyi milimo ukufika apo twingapesha? Nelyo bushe tumona ifi fyonse kwati fintu twashingamwa fye ukucita? Kwena, tufwile ukuyasukila aya mepusho. Umutumwa Paulo ena atile: “Umo na umo ashininkishe umulimo wakwe wine, e lyo akaba na pa kwangila ku mwine eka, te kuilinganya ku muntu umbi iyo.”—Abena Galatia 6:4.

14. Bushe Yehova enekela ifwe ukumubombela shani?

¹⁴ Yehova Lesa alishiba ifyo twaba. Alishiba umo twapelebela. Alakatamika ifyo ababomfi bakwe baipeelesha ukucita, nampo nga finono nelyo fikalamba. Tenekela ifwe ukupeela fimo fine, kabili te kuti tucicite no kucicita. Ilyo umutumwa Paulo alelanda pa kupeela ifya ku mubili, aebele Abena Kristu ba ku Korinti ati: “Ukuiteyanya nga kwabako intanshi, kuli ukwapokelelwa maka maka umo umuntu akwatila, te umo ashakwatila.” (2 Abena Korinti 8:12) Ici cishinte cilabomba bwino sana na ku mulimo tubombela Lesa. Ifilenga umulimo wesu ukupokelelwa kuli Yehova te bwingi bwa fyo tucita, lelo ni nshila tubombelamo—mu kusekelela kabili no mutima onse.—Amalumbo 100:1-5; Abena Kolose 3:23.

Lundululeni no Kubaka Umupashi wa Bupainiya

15, 16. (a) Bushe ubutumikishi bwa bupainiya bwa-ampana shani no kutasha? (b) Bushe abashingaba bapainiya kuti balanga shani umupashi wa bupainiya?

¹⁵ Inshila yawamisha iya kutashishamo Yehova, kutendeka ubutumikishi bwa nshita  yonse. Ukutemwa Yehova no kutasha pa cikuuku cakwe ica bupe fye, kwalilenga ababomfi baipeela abengi ukwalula imikalile yabo pa kuti bakwate inshita ikalamba iya kubombela Yehova. Bamo babomba bupainiya bwa nshita yonse, ukubomba amaawala 70 cila mweshi mu kushimikila imbila nsuma no kusambilisha abantu icine. Bamo abashingakumanisha ukubombe fyo pa mulandu wa fintu fyalekanalekana, kuti bapekanya ukuti limo balebombako bupainiya bwa kwafwilisha, cila mweshi ukushimikila amaawala 50.

¹⁶ Lelo, ni shani pa lwa babomfi ba kwa Yehova abengi abashingabomba bupainiya bwa nshita yonse nelyo ubwa kwafwilisha? Kuti balanga ukuti balatasha pa kulundulula no kubaka umupashi wa bupainiya. Kuti bacita shani ifyo? Ni pa kukoselesha abengabomba bupainiya, pa kulenga abana babo ukufwaisha ukubomba umulimo wa nshita yonse, no kubombako umulimo wa kushimikila no mukoosha ukulingana na maka yabo. Ifyo tupeela mu butumikishi fishintilila sana pa kutasha kwesu ukwa pa mutima pa fyo Yehova atucitila, ifyo alecita, ne fyo akatucitila.

Ukutasha ku ‘Fyuma Fyesu’

17, 18. (a) Kuti twatasha shani ku “fyuma fyesu”? (b) Bushe Yesu aumwene shani umusangulo wa kwa mukamfwilwa, kabili mulandu nshi?

¹⁷Amapinda 3:9 yatila: “Cindika Yehova ku fyuma fyobe, na ku fya ntanshi fya cibwesha cobe conse.” Ababomfi ba kwa Yehova pali nomba tabapeela ica pe kumi. Lelo, Paulo alembele ku cilonganino ca mu Korinti ati: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.” (2 Abena Korinti 9:7) Ukupeela imisangulo ya kuitemenwa iya kwafwilisha umulimo wa kushimikila uwa mwi sonde lyonse na ko cilangililo ca kuti tulatasha. Ukutasha kwa pa mutima kulatucincisha ukucite ci lyonse, napamo kuti tulepekanyako fimo cila mulungu nga fintu Abena Kristu ba kubalilapo bacitile.—1 Abena Korinti 16:1, 2.

¹⁸ Te bwingi bwa fyo tupeela ubulanga ukuti tulatasha Yehova. Lelo icilanga, mutima wa kupeela. Ifi e fyo Yesu amwene ilyo aletamba abantu balepoosa ubupe mu cipao ca mwi tempele. Ilyo Yesu amwene mukamfwilwa umupiina apoosamo “utumakobili tubili, utwacepesha,” atile: “Ndemwebe cine cine, nati, Uyu mukamfwilwa, nangu mupiina, apooselemo ishingi ukucila isho bonse bapooselemo. Pantu bonse ni pa shisheleko bapooselemo ifya bupe, lelo uyu mwanakashi, mu kubulwa kwakwe, apooselemo shonse isha kuliilamo isho acikwata.”—Luka 21:1-4.

19. Mulandu nshi cacindamina ukubebeta ifyo tutasha?

¹⁹ Lekeni ifyo twasambilila pa fya kulanga ukuti tulatootela fitucincishe ukubebeta ifyo tulanga ukutasha. Bushe napamo kuti twalundako amalambo yesu aya kulumbanya Yehova no kulundapo ukutungilila umulimo wa mwi sonde lyonse ku fyuma fyesu? Ponse apo twingapesha ukucite co, kuti twacetekela ukuti Yehova, Shifwe wa kutemwa akacankwa ukuti tulatootela.

Bushe Muleibukisha?

• Finshi tufwile ukutashishapo Yehova?

• Finshi tusambililako ku kupeela ica pe kumi, ku misangulo ya kuitemenwa, na ku kusota?

•Kuti twalundulula shani umupashi wa bupainiya?

• Kuti twabomfya shani “ifyuma fyesu” ku kutasha Yehova?

[Amepusho]

[Ifikope pe bula 15]

“Ica bupe conse icisuma ne ca kupeelwa conse icapwililika cifuma mu muulu”

[Ifikope pe bula 16]

Fintu nshi fitatu tusambilila kwi Funde ifilangililwe pano?

[Ifikope pe bula 18]

Malambo nshi twingapeela?