Mulandu Nshi Abantu Abengi Bela ku Calici

“PALI nomba mu South Korea mwaliba baPresbyterian abaya ku Calici abengi ukucila mu America.” Apo abantu abengi batontonkanya ukuti mu Korea mwafula abaBuddha na baConfucian, bafwile balipapile sana ilyo babelengele aya mashiwi muli magazini ya Newsweek. Leelo, uwatandala mu calo ca Korea kuti asangamo amacalici ayaitunga ukuba aya Bwina Kristu ayengi, ilingi line yeshibikilwa ku misalaba bashingulushako amalaiti yakashika. Pa Mulungu, caliseeka ukumona abantu babili babili nelyo batatu batatu baleya ku calici na maBaibolo ku minwe. Ukulingana no kufwailisha kwa mu 1998, abantu ba mu Korea mupepi na mapesenti 30 ni baKatolika nelyo baProtestanti. Kabili abaya ku calici balifula ukucila abaitunga ukuba abaBuddha.

Muli shino nshiku, tacaseeka ukumona abantu bafule fi ukulaya ku calici lyonse. Lelo, ici cilecitika mu Korea na mu fyalo fimbi ifya mu Asia, mu Afrika na mu Latin America. Mulandu nshi abengi basosela ukuti balisumina muli Lesa ilyo ukukanaangwa imipepele kulemoneka ukuba mpanga yonse? Mulandu nshi abantu bela ku calici?

Ukufwailisha kulangilila ukuti abantu ukucila pali hafu abaya ku calici mu Korea bafwaya ukwikala ukwabula amasakamika, lyene amapesenti 33 bafwaya ukuti nga bafwa, umweo wabo wena ukapusuke, kabili umo pa bantu 10 afwaya ukuba no bumi ubutuntulu, ifyuma, no kutunguluka.

Abantu abengi mu China baya ku calici pa kuti bacimfye ukutalalilwa kwabako ukutula apo imitantikile ya kuti ubuteko buletungulula amakwebo yonse yapwila no kulapyanikwapo no bwikashi umo abantu baikwatila amakwebo yabo abene. Cila mwaka, mu China balapulinta amaBaibolo ayengi no kuyasabankanya. Kabili cimoneka kwati abantu babelenga Baibolo nge fyo balebelenga akatabo kakashika aka kwa Mao Tse-tung.

BaKatolika bamo mu Brazil, sana sana abacaice, tabaikushiwa no bulayo bwa bumi bwa nsansa ubwa ku ntanshi. Bena bafwaya ukuba  ne nsansa pali nomba. Magazini ya Tudo itila: “Nga ca kuti icisumino ca kufwaya ukuwamya ubwikashi e calecincisha abantu mu myaka ya ba70, pali nomba ukutemwa ifyuma e kucincisha abantu.” Mu Britain, abafwailisha baipwishe abantu baya ku calici ukulanda umulandu umo batemenwa ukuya ku calici. Abengi batile ukubishanya.

Fyonse ifi filangilila ukuti nangu ca kuti abantu abengi balisumina muli Lesa, abengi baangwa ku fyo bafwaya pali nomba. Tabaangwa sana ku malayo ya ku ntanshi, nelyo fye ni Lesa. Bushe mutontonkanya ukuti mulandu nshi tulingile ukusuminina muli Lesa? Bushe Baibolo ilandapo shani pali uyu mulandu? Mulesanga icasuko mu cipande cikonkelepo.