rogramu ya pa Televishoni Yalengele Wene Ukucindika Lesa
Ilyashi Lya Bakabilisha ba Bufumu
rogramu ya pa Televishoni Yalengele Wene Ukucindika Lesa
UMUTUMWA Paulo atile “bamo baleshimikila Kristu pa mulandu wa kafindwe no kucimfyanya, lelo bambi bena pa mulandu wa kuitemenwa fye.” (Abena Filipi 1:15) Inshita shimo, nangu fye bantu abaseebanya abantu ba kwa Yehova, mu kukanaishiba balilenga aba mitima ya bufumacumi ukufwaisha ukwishibe cine.
Mu November 1998, programu pa mulabasa wa fikope uwa France yalangishe ifikope fya Bethel, amaofesi ya Nte sha kwa Yehova ayabela mu Louviers, ku France. Nangu ca kuti ukwankulako kwa bantu kwali ukwalekanalekana, kwali ne fya kufumamo ifisuma ifyacitike.
Pa batambileko iyi programu pali na baAnna-Paula, abaleikala amakilomita 60 ukufuma ku Bethel. BaAnna-Paula, abakwata abana babili kabili abalekana na balume babo, balefwaya incito. E ico ubushiku bwakonkelepo ulucelo, batumine lamya ku Bethel ukwipusha nga kuti baingilako incito. Batile: “[Programu ya pa TV] yanengele ukumona ukuti cilya cifulo cisuma kabili incito babomba yalicindama.” Ala balipapile ukwishiba ukuti bonse ababomba pa Bethel babomfi ba kuitemenwa! Pa numa ya kulanshanya panono pa milimo ya Nte sha kwa Yehova, balisumine ukuti Nte akabatandalile.
Lintu baLéna, ababomfi ba nshita yonse mu cilonganino cabelele mupepi, bailebatandalila, balilanshenye pa nshita iitali kabili baAnna-Paula balipokele icitabo ca Ukwishiba Uko Kutungulula ku Mweo wa Muyayaya. * Umuku wakonkelepo ilyo baLéna babweleleko, basangile baAnna-Paula balipwa ukubelenga icitabo conse kabili bali ne fipusho ifingi. Kabili lilya line fye balisumine ukulasambilila Baibolo. BaAnna-Paula batile: “Mwandini lyali lishuko ukusanga Icebo ca kwa Lesa. Nshatalile nkwatapo Baibolo iyandi.”
Mu January, baAnna-Paula bailetandala pa Bethel, kabili umulungu wakonkelepo basangilwe ku kulongana umuku wa kubalilapo. Mu kwangufyanya, batendeke ukusambilisha abana babo Baibolo no kushimikila ku banabo. Batile: “Nshakwindile ukulanda kuli bambi ifyo nalesambilila. Nalefwaisha ukwebako abantu icine ca mu Baibolo no kubasansamusha.” Lintu bacimfishe amafya ayengi bali na yo, baAnna-Paula batendeke ukusangwa ku kulongana lyonse. Balilundulwike mu kwangufyanya kabili pa May 5, 2002, balibatishiwe.
Na kabili, ica kumwenako cisuma ica baAnna-Paula no kucincila mu mulimo wa kushimikila kwalengele banyinabo ukutendeka ukusambilila Baibolo kabili mukwangufyanya balibatishiwe. BaAnna-Paula batila: “Teti nondolole ukusekelela naba nako. Ndatasha Yehova cila bushiku pa kumpeela ishuko lya kumwishiba no kumubombela na pa mapaalo yonse ayo ampeela.”
[Futunoti]
^ para. 6 Calembwa ne Nte sha kwa Yehova.
[Ifikope pe bula 8]
Pa muulu: BaAnna-Paula
Pe samba: Impongolo ya maofesi ya Nte sha kwa Yehova aya mu France