Abapwishishe Isukulu lya Gileadi Bakoseleshiwa Ukulanda pa “Fyapuulama”

IBUMBA lya bantu 6,635 ukufuma mu fyalo 52 basangilwe kuli programu wa kupwisha Isukulu lya Baibolo Ilya Gileadi Ilya Watchtower ilyalenga 115 pa September 13, 2003.

Bakutike ku kukoselesha kwashimpwa pali Baibolo ukwapeelwe ku basambi 48 abakanshiwe mwi sukulu ukwa kutwala “ifyapuulama fya kwa Lesa” ku bantu ba mu fyalo 17. (Imilimo 2:11) Uku e ko abapwishishe sukulu bali no kulabombela bumishonari.

Pa kutendeka programu, baStephen Lett, aba mwi Bumba Litungulula ilya Nte sha kwa Yehova kabili abaali baceyamani wa programu, bacinkwileko abasambi ati: “Ilyo muleya ku cifulo mwalapeelwa ica kubombelamo, te mulandu no ko mukaba nelyo ifyo mukakumanya, bengi bali kuli imwe ukucisha abalemulwisha.” Ukubomfya icipandwa 6 ica 2 Ishamfumu, Munyina Lett acinkwileko abasambi ukuti kuti bashintilila pali Yehova Lesa na pa myanda mishila ya bamalaika ilyo baleishibisha “ifyapuulama fya kwa Lesa.” (2 Ishamfumu 6:15, 16) Abena Kristu ba kubalilapo balikumenye ukukaanya no kukana-angwako ku mulimo wabo uwa kushimikila no kusambilisha, kabili bamishonari ba Bwina Kristu muno nshiku bapita mu fyapalako. Lelo, kuti bashintilila pa kutungilila kufuma ku muulu no kufuma ku kuteyanya kwa kwa Yehova ukwa pe sonde.—Amalumbo 34:7; Mateo 24:45.

Landeni “Ifyapuulama fya kwa Lesa”

Pa numa ya kulandapo kwa kwiswila ukwa kwa ceyamani, baHarold Corkern, aba mu Komiti ya Musambo iya mu United States balandile pa mutwe waletila, “Ukwenekela Ifine Fine—E Cacindama pa Kuba ne Nsansa no Kutunguluka mu Mulimo.” Munyina Corkern atile ukwenekela ifintu fishingafishiwapo kuti kwatungulula ku kufuupulwa, nga filya Amapinda 13:12 yalanda. Lelo, ilingi line icilenga ukufuupulwa kwenekela ifintu fyacilamo ifishingafishiwapo. Abalepwisha isukulu balekabila ukuba ne mibele yalinga, iya cine cine pa lwa bene na pa bantu bambi. Bafwile ukwenekela ukutena limo limo, lelo ifilubo tafifwile ukubalenga ukucishamo ukubipilwa ilyo baletukuta ukwafwa bambi ukumfwikisha “ifyapuulama fya kwa Lesa.” Munyina Corkern akoseleshe bamishonari bapya ukushintilila pali Yehova, “kalambula wa bamufwaisha.”—AbaHebere 11:6.

E lyo pakonkele baDaniel Sydlik, aba mwi Bumba Litungulula, abalandile pa mutwe waletila, “Bushe Isubilo lya Bwina Kristu Cinshi?” Batile: “Isubilo mibele Umwina Kristu afwile ukukwata. Cipimo ca fintu fyalungama icilenga umo ukuba na bucibusa bwine bwine na Lesa. Te kuti cicitike ku ushili Mwina Kristu ukuba ne subilo nga ili twakwata.” Munyina Sydlik alondolwele ne fyaba mwi subilo lya Bwina Kristu ifyafwa umo ukutwalilila ne subilo nangu line kuli amafya. “Nga tuli ne subilo kuti twaba abakosa mu bumi kabili kuti twacimfya.” Isubilo Umwina Kristu akwata limwafwa ukwishiba Yehova ati ni  Lesa wa bufwayo kabili limwafwa ukuba ne nsansa sha kumubombela.—Abena Roma 12:12.

BaWallace Liverance, bakalemba be Sukulu lya Gileadi bakoseleshe abasambi ati, “Twalilileni Ukwendela mu Mupashi.” (Abena Galatia 5:16) Balangile ifyo Baruki, kalemba wa kwa Yeremia, apene apumbuke ukwendela mu mupashi. Pa nshita imo, Baruki alinakile no kutendeka ukuifwaila ifikalamba. (Yeremia 45:3, 5) Munyina Liverance alandile ati bamo balekele ukukonka Yesu no kukaana icine ca ku mupashi, icifwaikwa pa kupusuka. Ne calengele ni co tabaumfwikishe umo isambilisho lyakwe lyalolele, kabili balifuupwilwe pa kumona ukuti ifyo balesuubila ukukwata pali ilya nshita lwa ku mubili tafyacitike. (Yohane 6:26, 27, 51, 66) Apo bamishonari bakwata umulimo wa kulanda pali Kabumba no bufwayo bwakwe, cinshi bengasambilila kuli ili lyashi? Abasambi bakoseleshiwe ukukana-angwa sana ku fifulo, ukwishibikwa ku bantu, nelyo ukubomfya umulimo wapeelwa na Lesa ku kuinonsha abene.

Icipusho baMark Noumair, bakafundisha wa Gileadi baimishe caleti, “Bushe Mukaba Abape Nelyo Abapokelela Fye?” Ifyo balandile fyashimpilwe pa Abapingushi 5:2, apaba ukutashiwa kwa mwina Israele umo umo pa kuitemenwa ukubomba mu mulalo wa fita uwa kwa Baraki.  Abasambi ba Gileadi balitashiwe pa mibele yabo iyabalengele ukwankula ku bwite bwa kwa Baraki Mukalamba, Yesu Kristu, pa kuti balweko sana ubulwi bwa ku mupashi. Ifita fya kwa Kristu filingile ukufwaya ukunonka ububile bwa wabengishe ncito. Munyina Noumair acinkwileko abasambi ati: “Nga twatendeka ukwangwa sana ku kuisekesha, ninshi twaleka ukulwisha umulwani. . . . Bumishonari te kuyangwa iyo. Kwangwa Yehova, bumulopwe bwakwe, no kwangwa ukufishapo ukufwaya kwakwe. Tatubomba bumishonari pa mulandu wa kuti tulefwaya Yehova atulenge ukuba ne nsansa, lelo ico tumubombela mulandu wa kumutemwa.”—2 Timote 2:4.

Bakafundisha wa Gileadi baLawrence Bowen e baishiletungulula ukulanshanya kwaleti “Bashishisheni ku Cine.” (Yohane 17:17) Batile abasambi ba mwi kalasi lyalenga 115 batumikishi bashishiwa aba kwa Lesa. Ilyo balesambilila, balebombako no butumikishi bwa mwi bala, ukufwayafwaya abafumacumi batemwe cine. Ukupala Yesu na basambi bakwe aba kubalilapo, abasambi na bo ‘tabalandile ifyabo abene.’ (Yohane 12:49, 50) Balelanda no kupimpa icine capuutwamo, icipeela umweo. Ifilangililo fya kulangilila ifyo bakumenye fyalangilile amaka Baibolo yakwete pa bantu balandile na bo.

Ukupanda Amano no Kubelesha Kulakoselesha

BaAnthony Pérez na baAnthony Griffin, ababa mu dipartimenti yangalila umulimo wa kushimikila pa maofesi ya mu United States, baipwishe na baba mu Makomiti ya Musambo mu fyalo fyalekanalekana. Aba bantu balandile pa mafya ayo bamishonari bapya bapitamo kabili bapeele ukufunda kubomba ukwashimpilwe pa kubelesha kwabo. Pa mafya yamo paba ukupusana kwa myata, imiceele yakaba umwaka fye onse, nelyo imipepele ne mitekele mu calo iyapusana ne yo abasambi babelesha. Cinshi cingaafwa bamishonari bapya ukubomba bwino mu fifulo fyabe fi? Kutemwa Yehova, ukutemwa abantu, ukukanafuluka ifya ku numa, no kukanasuswa mu fintu. Uwaba mu komiti ya musambo umo atile: “Abantu baba ku fifulo twatumwako balikalako pa myaka iingi nga nshi pa ntanshi ifwe tatulayako. Kanshi na ifwe kuti twaikala no kubelesha. Lyonse nga twakwata amafya, twaleyamona nga ya kutwafwa ukuwaminako. Kulaba ukushintilila pe pepo na pa mupashi wa kwa Yehova, kabili kulaba ukumona ukuti amashiwi ayalandile Yesu ayatila ‘nakulaba na imwe,’ ya cine.”—Mateo 28:20.

BaSamuel Herd, aba mwi Bumba Litungulula, balandile pa mutwe walengele programu ukufika pa kalume, uwaletila “Ukulalanda pa Fyapuulama fya kwa Lesa.” Ukupongololwa kwa mupashi wa mushilo pa Pentekoste 33 C.E., kwakoseshe abasambi ba kwa Yesu ukulanda pa “fyapuulama fya kwa Lesa.” Cinshi cingaafwa bamishonari abapya leelo ukulanda pa Bufumu bwa kwa Lesa no kupimpa kwapalako? Mupashi wa mushilo umo wine. Munyina Herd akoseleshe abasambi balepwisha isukulu ‘ukuba ababilima ku mupashi,’ ukucincimukila imilimo bapeelwa, no kukanalaba ifyasanshiwe mu kukanshiwa bapokelele. (Abena Roma 12:11) Munyina Herd atile: “Baibolo cintu capuulama ica kwa Lesa. Mwilasuula ubucindami bwa iko. Ubukombe busangwamo bwa mweo. Bulapulinkanya mu mutima. Ibomfyeni ku kulungikilako ifintu mu bumi bwenu. Lekeni yalule imitontonkanishishe yenu. Bakeni ukulingulula kwenu pa kusambilila, ukubelenga, no kwetetula pa Malembo . . . Imikeni ubuyo bwa kubomfya ukukanshiwa mwakanshiwa mu Gileadi no kupampamina pa kutwalilila ukulalanda ‘ifyapuulama fya kwa Lesa.’”

Pa numa ya kubelenga imitende ukufuma mu fyalo fyapusanapusana no kupeelwa amadiploma, umusambi umo abelengele kalata ya kutasha pa kukanshiwa bakanshiwe iyalembelwe na basambi. Lyene Munyina Lett aishilesondwelela mu nshila yalinga pa kulosha ku 2 Imilandu 32:7 na Amalango 20:1, 4. Asondwelele na mashiwi yaumfwene ne fyo alandile pa mubalo ati: “E ico mwe batemwikwa abapwisha isukulu, ibukisheni ilyo muleya, ilyo mukafumina mu bulwi ukuya uko bamutumine ukupya, Yehova akalaya na imwe. Mwikatala amulaba icishinka ca kuti bengi bali na imwe ukucila abalemulwisha.”

[Akabokoshi pe bula 25]

UKULONGANIKA IFIPENDO FYA BALI MU KALASI

Bafumine mu fyalo: 7

Bakayabombela mu fyalo: 17

Ubwingi bwa basambi: 48

Imyaka ya kufyalwa nga kwakanya pali umo: 33.7

Imyaka ya kuba mu cine nga kwakanya pali umo: 17.8

Imyaka ya kuba mu mulimo wa nshita yonse nga kwakanya pali umo: 13.5

[Icikope pe bula 26]

Abapwishishe Isukulu mu Kalasi Lyalenga 115 Ilye Sukulu lya Baibolo Ilya Gileadi Ilya Watchtower

Mu mutande uli pe samba, ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.