Balupwa kwa Yesu Bali ni Bani?

MU DECEMBER, mu fyalo ifingi balakobeka ifikope ne fipasho fya kwa Yesu ilyo ali akanya. Bamulanga nafukatilwa kuli nyina, Maria, na wishi wa pano isonde, Yosefe. Na bakaana ubuKristu limo balatemwa ifi fikope. Apo Yesu e o bangwako sana muli ifi fikope ne fipasho, cinshi cintu Amalembo yatweba pa lupwa lwakwe?

Yesu akuliile mu lupwa ulo cingawama ukwishiba. Afyelwe kuli nacisungu Maria, e co aishileba mu lupwa lwa buntunse. Ukulingana na Baibolo, Lesa afumishe ubumi bwakwe mu muulu no kububika mwi fumo lya kwa Maria. Acitile ci ukubomfya umupashi wa mushilo. (Luka 1:30-35) Ilyo Maria bashilamweba ukuti akemita no kufyala Yesu mu cisungusho, alikobekelwe kuli Yosefe, uwaishileba wishi wa kwa Yesu uwa pano isonde.

Pa numa ya kufyalwa kwa kwa Yesu, Yosefe na Maria balishilekwata abana na bambi, bamunyina ne nkashi sha kwa Yesu kuli nyina. Ici e co tumona mu cipusho abekashi ba mu Nasarete baishileipusha pali Yesu. Baipwishe ati: “Bushe uyu te mwana wa kwa kabasa? Bushe nyina te witwa Maria, na bamunyina te Yakobo na Yosefe na Simone na Yuda? Ne nkashi shakwe, bushe tashaba na ifwe shonse?” (Mateo 1:25; 13:55, 56; Marko 6:3) Nga fintu ifi fyebo fyalangilila, Yesu alikwete bawishi, banyina, bamunyina bane ne nkashi shibili napamo no kucilapo.

Na lyo line, bamo pali leelo tabasumina ukuti bamunyina ne nkashi sha kwa Yesu bali bana ba kwa Yosefe na Maria. Mulandu nshi? Icitabo ca New Catholic Encyclopedia citila: “Ukufuma fye na ku kale Abena Kristu basambilisha ati Maria ali nacisungu ubumi bwakwe bonse. Kanshi tatwingatwishika ukuti Maria takwetepo abana bambi.” Icitabo cimo cine citila amashiwi ya kuti “munyina” nelyo “inkashi” kuti yalosha “na ku muntu fye uo mupepa nankwe nelyo ku cibusa fye” atemwa kuli lupwa fye umbi, napamo na ku ndume ne nkashi aba mwi fumo limbi.

Bushe e fyo caba? Na baKatolika fye bamo abasambilila ifya mapepo, balakaana ico cisambilisho ca kuti Maria ali nacisungu ubumi bwakwe bonse. Basuminisha icishinka ca kuti Yesu alikwete bamunyina ne nkashi. John P. Meier, uwali kale umukalamba wa kabungwe ka Catholic Bible Association of America, alembele ati: “Mu Cipingo ca Nomba, ishiwi lya adelphos, [munyina], limo libomfiwa mu mampalanya fye. Lelo nga lyabomfiwa ku kulangilila bulupwa nelyo ukwampana kwa mwi funde, lilosha fye kuli munyina uo mwafyalwa nankwe ku bafyashi bonse babili nelyo ku mufyashi umo fye.” * Cine cine, Amalembo yalanga ukuti Yesu alikwete bamunyina ne nkashi abafyelwe kuli Yosefe na Maria.

Amalandwe yalilumbula balupwa lwa kwa Yesu na bambi. Lelo natubale tulande pali banyina, bawishi, bamunyina ne nkashi shakwe no kumona ifyo twingasambililako kuli bene.

[Futunoti]