Bushe Muleibukisha?

Bushe mwali-ipakisha ukubelenga bamagazini ba nomba line aba Ulupungu lwa kwa Kalinda? Kanshi moneni nga kuti mwa-asuka amepusho yakonkapo:

• Bushe ibuuku lya kwa Mika lyakwata ifipandwa finga, ni lilali lyalembelwe, kabili bushe imibele yali shani pali iyo nshita?

Ibuuku lya kwa Mika lyakwata ifipandwa 7. Kasesema Mika alembele ili buuku mu 7 B.C.E., lintu abantu abali mu cipingo na Lesa bali abapaatukana mu nko shibili—uluko lwa Israele no lwa Yuda.—8/15, ibula 9.

• Ukulingana na Mika 6:8, cinshi Lesa afwaya kuli ifwe?

Tufwile “ukucito bupingushi.” Ifyo Lesa abomba pa fintu e fyo bupingushi bufwile ukuba, e co tufwile ukutungilila ifishinte fyakwe ifya bufumacumi na bumpomfu. Atweba no “kutemwo luse.” Abena Kristu balilanga ukutemwa kwa cishinka pa kwafwa abalekabila ukwafwiwa, pamo nga mu nshita ya tuyofi. Nga tulefwaya “[ukwenda] bufuke bufuke” na Yehova, tufwile ukwishiba umwa kupelela no kushintilila pali wene.—8/15, amabula 20-2.

• Cinshi Umwina Kristu pambi engacita nga ca kutila incito yapwa?

Ica mano ukucita kulingulula imikalile yakwe. Limbi kuti ayangushako bumi pa kukuukila mu ng’anda iinonoko nelyo ukukanakwata ifipe fishingakabilwa. Kwena, calicindama ukukanasakamikilwa pa fyo tukabila cila bushiku, ukutetekela Lesa ukuti kuti atusakamana. (Mateo 6:33, 34)—9/1, amabula 14-15.

• Bushe cinshi tufwile ukwibukisha pa kupeela nelyo pa kupokelela ifya bupe fya pa bwinga?

Ifya bupe ifyaumo mutengo tafikabilwa, kabili te fya kwenekela. Umutima wa mupe e wacindama nga nshi. (Luka 21:1-4) Te cisuma ukubilisha ishina lya upeele ica bupe. Ukucite ci kuti kwaleta insoni ku mupe. (Mateo 6:3)—9/1, ibula 29.

• Mulandu nshi tufwile ukupepela no kukanaleka?

Ukulapepa lyonse kuti kwalenga bucibusa bwesu na Lesa ukukoselako kabili kuti kwatupangasha ku fya kwesha ifya-afya ifingemako. Amapepo yesu kuti yaba ayepi nelyo ayatali, ukulingana ne fili ukukabila ne mibele. Ipepo lilakuula icitetekelo kabili litwafwa ukubombela pa mafya bwino.—9/15, amabula 15-18.

• Bushe tufwile ukwilula shani ilembo lya 1 Abena Korinti 15:29, ilyapilibulwa mu maBaibolo yamo ati ‘ukubatishiwa pa mulandu wa bafwa’?

Umutumwa Paulo aloseshe mu kuti Abena Kristu basubwa babatishiwa, nelyo ukwingila, mu bumi butungulula ku mfwa ya bumpomfu nga ilya yafwile Kristu. Pa numa, balabuushiwa ku bumi bwa ku mupashi nga filya cali kuli Kristu.—10/1, ibula 29.

• Bushe twaishiba shani ukuti mu Bwina Kristu mwaba ifya kuibakako ifingi ukucila pa filubo fyalumbulwa pe lembo lya 1 Abena Korinti 6:9-11?

Umutumwa Paulo tapelele fye pa kulumbula ifilubo ifyapala ubulalelale, ukupepo tulubi, na bucakolwa. Ukulangilila ukuti ukwaluka kwacila na po kwalekabilwa, atwalilile pa cikomo cakonkapo ati: “Fyonse fyalisuminishiwa kuli ine; lelo te fya kungafwa fyonse.”—10/15, amabula 18-19.

• Banakashi nshi aba ku kale bamo abalengele umutima wa kwa Lesa ukusamwa?

Paba Shifra na Pua, banacimbusa abakeene ukumfwila Farao pa kukaana ukwipaya utunya utwaume utwa bena Israele. (Ukufuma 1:15-20) Cilende umwina Kanaani Rahabu, uwacingilile inengu shibili isha bena Israele. (Yoshua 2:1-13; 6:22, 23) Abigaili aafwile ukupususha imyeo no kulesha Davidi ukwingila mu milopa pa mulandu wa mano yakwe. (1 Samwele 25:2-35) Baba fya kumwenako ku banakashi ba muno nshiku.—11/1, amabula 8-11.

• Bushe ifyebo fyalembwa pa Abapingushi 5:20 ifyatila “ukufuma mu muulu intanda shalwile” na Sisera fyalola mwi?

Bamo batila ici cilosha ku kwafwa kwa bulesa. Bambi batila kwafwa kwa bamalaika, ukuloka ukwa fyapala intanda, nelyo ukushintilila kwa kwa Sisera pa kubuka kwa bakalengula wa ntanda. Apo Baibolo tayakolobonda muli fi fyebo, kuti twatila ifi fyebo fileimininako ukwingilamo ukwa kwa Lesa ku kulwilako umulalo wa fita uwa bena Israele.—11/15, ibula 30.

• Apo ukukana-angwa ku mipepele kwaba fye mpanga yonse, mulandu nshi abantu bacili batungila ati balisumina muli Lesa?

Ico bamo baila ku calici ni ku kufwaya umwa kupwishisha amasakamika. Bambi bafwaya ubumi bwa pe na pe nga bafwa, nelyo ubutuntulu bwa bumi, ifyuma, no kutunguluka. Mu fyalo fimo, abantu bafwaya ukwikusha ukukabila kwa ku mupashi uko baba na ko ukutula apo imitantikile ya kuti ubuteko buletungulula amakwebo yonse yapwila no kupyanikwapo no bwikashi umo abantu baikwatila amakwebo yabo abene. Ukwishiba imilandu yapala yi kuti kwa-afwa Umwina Kristu ukutendeka ukulanshanya kwinganonsha mwine ng’anda.—12/1, ibula 3.