Bushe Na Imwe Mulapapa?

BUSHE mwalimona ukuti bakalemba ba Baibolo libili libili balepapa ilyo balelanda pa milimo ne mibele ya kwa Lesa? Kemba wa Malumbo atile: “Nalengelwe mu musango . . . wa kupapa.” (Amalumbo 139:14) Esaya alembele ati: “Mwe Yehova, ni mwe Lesa wandi, ndemutonda, ndetootele shina lyenu, pantu mwacite fipesha amano.” (Esaya 25:1) Nelyo tontonkanyeni pa fyo umutumwa Paulo apapile ilyo asosele ati: “We kushika kwa bucindami bwa kwa Lesa na mano yakwe no kwishiba kwakwe!”—Abena Roma 11:33.

Icitabo ca The Oxford Encyclopedic English Dictionary cilondolola ishiwi lya ciNgeleshi ilyapilibulwa ukupapa ati “kusunguka pa cintu ico mushacilaenekela, ico mushishibe, nelyo ico mushingeluka. Ici cisanshamo no kutemwa ico cintu, nelyo ukufwaisha ukucishiba.

Cilawama ukumona abana banono nabatulumuna amenso ku kupapa ilyo bamona, batonya, nelyo baumfwa fimo ifyo bashaumfwapo. Ku ca bulanda, uko kupapa ukubako ilyo balefwaisha ukwishiba fimo nelyo ifyaibela, ilingi line kulapwa ilyo baleya balekula.

Lelo, bakalemba ba Baibolo abo twalandapo, balepapa ukufuma ku mutima kabili balitwalilile ukucite co. Cinshi calengele batwalilile ukupapa? Ni co bale-etetula pa milimo ya kwa Lesa no kutasha. Kemba wa malumbo apepele ati: “Njibukishe nshiku sha kale, ntontonkanye milimo yenu yonse; ifyacitile iminwe yenu ndafyetetula.”—Amalumbo 143:5.

Ala tulatasha icine cine ukuti bakapepa ba kwa Lesa aba muno nshiku na bo balapapa! Bushe na imwe mulapapa? Bushe mwakulapapa?