Bushe Lesa Alatusakamana?

BUSHE amafya ya mu lupwa lwenu, ukulwalilila, incito nelyo imilimo imbi iikalamba mwakwata filamusakamika? Abengi balasakamikwa. Nga ni nani pali lelo uo ububifi no lukaakala fishilangulusha? Na cine, ifintu fili fye nga filya Baibolo yasosa ati: “Ububumbo bonse bulatetela capamo no kucululukila capamo ukufika kuli nomba.” (Abena Roma 8:22) E mulandu wine abengi bepushisha ati: ‘Bushe Lesa alasakamana? Bushe akatwafwa?’

Imfumu ya mano Solomone yaebele Lesa mwi pepo ati: “Ni mwe mweka, mwaishibe mitima ya bana ba bantu.” Solomone alicetekele ukuti Lesa alitwishiba fwe bantunse umo umo kabili alatusakamana. Alombele Lesa ‘ukuumfwa mu muulu’ no kwasuka amapepo ya muntu onse uutiina Lesa kabili uwaeba Lesa “impumo yakwe no kukalipwa kwakwe.”—2 Imilandu 6:29, 30.

Na pali lelo, Yehova Lesa alatusakamana kabili atweba ukuti tulemulomba mwi pepo. (Amalumbo 50:15) Alaya ukuti akaasuka amapepo yesu aya ku mutima ayalingene no kufwaya kwakwe. (Amalumbo 55:16, 22; Luka 11:5-13; 2 Abena Korinti 4:7) Ca cine, Yehova alakutika ku ‘kupepa konse, ku kupaapaata konse ukwa muntu onse uwa mu bantu bakwe bonse.’ E co, nga twacetekela Lesa, twapepa ukuti atwafwe, no kupalama kuli wene, akatusakamana ne citemwishi kabili akatutungulula. (Amapinda 3:5, 6) Yakobo, kalemba wa Baibolo atweba ati, “Palameni kuli Lesa, na o akapalama kuli imwe.”—Yakobo 4:8.