Amepusho Ukufuma ku Babelenga

Finshi fyalengele ukuti Yuda akumane no mwanakashi uo aleti ni cilende, nga filya calembwa pa Ukutendeka 38:15, 16?

Nangu ca kutila Yuda akumene no mwanakashi uo aleti ni cilende, uyu mwanakashi tali cilende. Ukulingana na Ukutendeka icipandwa 38, ifyo cali ni fi.

Ilyo umwana mwaume ibeli lya kwa Yuda, ashilafyalamo abana muli Tamari umukashi wakwe, alipaiwe pa mulandu wa kuti “ali mubi mu menso ya kwa Yehova.” (Ukutendeka 38:7) Pali ilya nshita kwali ulutambi lwa kuupa umukashi wa kwa munonko. Caleba ukuti umuntu nga afwa ukwabula impyani, munyina ali no kuupa mukamfwilwa kukuleka afyelemo umwana wa kwisaba impyani. Lelo umwana mwaume wa bubili uwa kwa Yuda, Onani, alikene ukucita ulu lutambi. Pali uyu mulandu, Lesa amupingwile ukufwa. Yuda nomba atumine umupongoshi wakwe Tamari ukubwelela ku ng’anda ya bafyashi bakwe ukufikila Shela, umwana wa kwa Yuda uwa butatu akakule ica kutila kuti amuupa. Lelo, umuye nshiku, Yuda afililwe ukuufya Shela kuli Tamari. E co ilyo muka Yuda afwile, Tamari acitile ubwile bwa kukwatilamo impyani muli Yuda, umwina Israele, uwali shifyala. Aifungushenye nga cilende wa pe tempele kabili aileikala mu mbali ya musebo umo aishibe ukuti e mwalapita Yuda.

Ukwabula ukwishiba ukuti ni Tamari, Yuda aulungene na o. Pa kuulungana na Yuda, Tamari apokele ifintu fya kwa Yuda ukuba iciikatilo, kabili ifi fine e fyo abomfeshe ku kushinina Yuda ukuti e wamupeele ifumo. Ilyo casokolweke, Yuda tamupeele umulandu lelo mu kuicefya atile: “Alilungamo kucila ine; pa kuti nshamupeele kuli Shela umwana wandi.” Kabili pa numa ya ici, “tabwekeshepo ukumwishiba kabili.”—Ukutendeka 38:26.

Yuda alilufyenye pa kukanapeela Shela kuli Tamari ukulingana ne fyo alaile. Kabili aulungene no mwanakashi aleti ni cilende wa pe tempele. Ico acitile capusene ne co Lesa afwaya, ica kuti umwaume afwile fye ukukumana no mukashi wakwe epela. (Ukutendeka 2:24) Na lyo line, Yuda takumene no mwanakashi cilende. Lelo, mu kukanaishiba, Yuda apyene pe punda lya kwa Shela umwana wakwe, kabili umwana uwafyelwemo tali wa mu cani iyo.

Kumfwa kuli Tamari, ico acitile tacali bucende. Bampundu afyele tabalebamona ukuti bana ba mu bulalelale. Ilyo Boasi umwina Betelehemu aupile Ruti umwina Moabu ukulingana no lutambi lwa cupo ca bupyani, abakalamba ba mu Betelehemu balandiileko bwino Perese mwana Tamari, ukweba Boasi ati: “Ing’anda yobe ibe nge ng’anda ya kwa Perese, uo Tamari afyele kuli Yuda, pa mulandu wa bufyashi ubo Yehova akakupeela mu mukashana uyu!” (Ruti 4:12) Kabili Perese alilumbulwapo pa mutande wa fikolwe fya kwa Yesu Kristu.—Mateo 1:1-3; Luka 3:23-33.