‘Lesa Tekala mu Matempele Yakuulwa ku Minwe ya Bantu’
‘Lesa Tekala mu Matempele Yakuulwa ku Minwe ya Bantu’
UMUTUMWA Paulo alishibe bwino amatempele ya mu Atena, pantu yali mu misumba iingi iyo aileko mu nyendo shakwe isha bumishonari. Ukulingana ne citabo ca The Encyclopædia Britannica, Atena alishibikwe ukuti ali ni kalesa kanakashi aka nkondo, aka mano kabili “aka milimo ya butukushi kabili aka mano mu fya kufwaya mutende.”
Itempele lyalumbwike sana ilya kwa Atena lyali ni Parthenon. Lyali mu musumba wa Atena, kabili uyu musumba wainikwe ishina lya aka kalesa kanakashi. Lyaba pa matempele yakalamba aya mu nshita sha kale. Muli ili tempele mwali icilubi calepele amamita 12 icapangilwe na golde na meno ya nsofu. Ilyo Paulo aile ku musumba wa Atena, ili tempele e cikuulwa cikalamba sana icali mu musumba pa myaka nalimo 500. Lyapangilwe na mabwe ya marbele ayabuuta.
Paulo ashimikile abena Atena pali Lesa ‘uushiikala mu matempele yakuulwa ku minwe ya bantu,’ ninshi ne tempele balelimona. (Imilimo 17:23, 24) Ku balekutika kuli Paulo, nalimo ubukulu bwe tempele nelyo ukululubala kwa filubi fyalimo fyalengele kalesa kanakashi ukumoneka kwati kalicindama ukucila Lesa uushimoneka uo bashaishibe. Lelo Paulo asosele ukuti te kuti twelenganye ukuti Uwapangile abantunse “aba nga golde atemwa silfere atemwa ilibwe, nge cabaswa ku . . . bantunse.”—Imilimo 17:29.
Kwaliko tulesa pamo na tulesa twanakashi utwapala Atena lelo twaliloba. Ubukata bwa tuko bwalemonekela mu matempele na mu filubi. Icilubi ca kwa Atena icali mwi tempele lya Parthenon calobele mu mwanda wa myaka uwalenga busano. Kabili matempele fye ayanono aya aka kalesa e yashalapo. Nga ni nani pali leelo aya mu kulomba amano kuli Atena no kufwaya ukuti alemutungulula?
Lelo Yehova te fyo aba. Ena ni “Lesa wa muyayaya” kabili takuli uwatala amona wena. (Abena Roma 16:26; 1 Yohane 4:12) Abana ba kwa Kora balembele abati: “E . . . Lesa wesu, umuyayaya umuyayaya. Wene akatutungulula.” (Amalumbo 48:14) Ukubelenga Icebo ca kwa Lesa, Baibolo, no kulacita ifyo itufunda mu mikalile yesu, e nshila imo Yehova Lesa engatungulwilamo ifwe.