Peeleni Lesa Ubukata Mwipeelo Muntu

MU MYESHI yapitile nomba line, abatemwa ubulungami mwi sonde lyonse balisambilile ifya kupeela Lesa ubukata. Ni pa Mabungano ya Citungu aya Nte sha kwa Yehova ayaleti “Peeleni Lesa Ubukata” e po basambilile. Aleni natupitulukemo mu fyasambililwe pali aya mabungano.

Uku kusambilila ukwalefuma mu Baibolo kwaliko pa nshiku shitatu kabili abengi eko baile. E lyo bamo baile ku kulongana kwa pa kati ka nko pa nshiku shine. Abalongene bakutike ku malyashi ukucila pali 30. Kabili pali aya malyashi pali amalyashi ayalengele abalekutika ukumfwikishe fya ku mupashi. Kwali na bashimike ifya kukumanya ifyakoseshe icitetekelo ca balongene. Kwaleba ne filangililo ifyalelanga ifya kubomfya ifishinte fya mafunde ya mu Baibolo. E lyo ne cilangililo cikalamba umo bafwele filya fine balefwala aba kale, calangilile ifyo Abena Kristu ba mu mwanda wa myaka uwa kubalilapo bapitile mu mafya. Nga mwalisangilweko kuli uku kulongana, aleni pitulukenimo mu fyebo mwalembele ilyo mulebelenga cino cipande. Natwishibo kuti mwalaibukisha ifintu ifisuma ifyo mwailemene pali ulya mutebeto wa fya kulya fya ku mupashi kabili mwalasambilila na kabili.

Umutwe wa Bushiku Bwa Kubalilapo: “Mwaliwamina, Mwe Yehova, . . . Ukupokelela Ubukata”

Pa numa ya lwimbo lwa kubalilapo ne pepo, kalanda wa kubalilapo asengele bonse abalongene ne lyashi lyalelanda maka maka pa mulandu ukalamba uo balonganine ilyaleti “Twalongana ku Kupeela Lesa Ubukata.” Kalanda akomaile pa fyo ibungano lyonse lyalelandapo sana ilyo ayambwile Ukusokolola 4:11. Kabili bwangu bwangu alondolwele umo calola ukupeela Lesa ubukata. Afumishe amashiwi mwi buuku lya Amalumbo, no kukomailapo ukuti ukupeela Lesa ubukata ‘kumushinshimuna,’ ‘ukumutootela’ no ‘kumutasha.’—Amalumbo 95:6; 100:4, 5; 111:1, 2, NW.

Ilyashi lyakonkelepo lyaleti “Balipaalwa Abapeela Lesa Ubukata.” Kalanda alandile pa cishinka cimo icisuma nga nshi. Alandile ukuti apo mwi sonde lyonse mwaba Inte sha kwa Yehova ukucila pa mamilioni 6 mu fyalo 234, kuti twasosa ukuti akasuba no bushiku balapeela Yehova ubukata. (Ukusokolola 7:15) Abalongene balyumfwile bwino ilyo kwali ukwipusha bamunyina na bankashi ababa mu mulimo wa nshita yonse.

E lyo nomba pakonkele ilyashi lyaleti “Ububumbo Bubilisha Ubukata bwa kwa Lesa.” Nangu imyulu tailanda, ilalumbanya ubukulu bwa kwa  Lesa kabili ilatwafwa ukulatasha pa fyo atusakamana mu kutemwa. Ici calilondolwelwe bwino bwino.—Esaya 40:26.

Ukupakasa, ukukaanya, ne fya calo pamo no kufwaya ukucita imembu fileesha bucishinka nelyo bumpomfu bwa Bena Kristu. E ico abalongene balikutikishe ku lyashi lyaleti “Endeni Muli Bumpomfu.” Kalanda alandile pa cikomo cimo na cimo ica Amalumbo 26. Kabili kwali no kwipusha Nte umwana we sukulu uwakene ukonaule mibele isuma. Kwali no kwipusha Nte uwalepoosa sana inshita mu kutambe fintu fyabipa lelo uwacitilepo cimo pa kuti aleke ukutamba.

Ilyashi lya kulekelesha ulucelo lyali lyashi likalamba ilyaleti “Ifimonwa fya mu Kusesema Ifya Lulumbi Filatucincimusha.” Kalanda alandile pa bo twingapashanya. Na ba ni kasesema Daniele, abatumwa, Yohane na Petro. Atile icitetekelo cabo calikoshiwe ku fimonwa fya mu kusesema kwa fyo Ubufumu bwa kwa Mesia bwali no kubako ne fyo bwali kulateka. Kuli abo abalaba ubushinino bwa kuti tuli mu nshita ya mpela, kalanda atile: “Tulesubila no mutima onse ukuti aba musango yo bakatontonkanya na kabili pa kubapo kwa kwa Yesu mu Bufumu, uko nomba ukwacitika icine cine ne co cikabaafwa ukubukulula ubukose bwabo ubwa ku mupashi.”

llyashi lyabalilepo mu cungulo lyaleti “Ubukata bwa kwa Yehova Busokolwelwa ku Bafuuka.” Kalanda alangilile ifyo Yehova aba ica kumwenako cisuma mu kuicefya, nangu line e Muntu umukalamba sana mu bubumbo bonse. (Amalumbo 18:35) Yehova alasenamina abaicefya icine cine. Lelo tafwaya abaicefya fye ilyo bali pamo na balya balingana nabo atemwa ababacilile, nomba ilyo baleangalila abo bacilile baba abankalwe kuli bena.—Amalumbo 138:6.

Kabili paishile ukusesema kwa mu Baibolo mu lyashi lya kukonkana ilyalelanda pa fintu fyalekanalekana pa mutwe uwaleti “Ukusesema kwa kwa Amose—Ifyebo Fyabamo Ifyakuma Inshiku Shesu.” Kalanda wa kubalilapo alandile pa ca kumwenako ca kwa Amose no kusoso kuti twaliba no mulimo wa kusoka abantu pa bupingushi bwa kwa Yehova ubuleisa. Ilyashi alandile lyaleti “Landeni Icebo ca kwa Lesa no Kushipa.” Kalanda walenga bubili aipwishe ilipusho lyaleti: “Bushe Yehova akatala afumya ububifi no kucula pano isonde?” Ilyashi alandile ilyaleti “Ubupingushi bwa Bulesa pa Babifi” e lyayaswike ukuti ubupingushi bwa kwa Lesa lyonse bwena bufwile ukubako, kabili bukesa nangu cibe shani, kabili tabwishila aba kaele. Uwalandile ilyashi lya butatu pali aya alandile ilyaleti “Yehova Abebete Mitima.” Abafwaisha ukutemuna Yehova bakomfwila amashiwi yaba pali Amose 5:15 ayatila: “Pateni ububi, temweni ubusuma.”

Ubwalwa kuti bwalenga umutima ukuba ne nsansa. Lelo umuntu kuti alabunwa bubi bubi. Uwalandile ilyashi lyaleti “Talukeni ku Citeyo ca Kukolwa Ubwalwa,” atantawile ifintu fyabipa ifingonaula ubumi bwa muntu na bumupashi bwakwe pa mulandu wa kunwesha, nangu ca kuti talekolwa. Alandile icingaafwa ukukananwa ukucila mu cipimo: Apo abantu balipusanapusana mu minwene, nga mwanwa ubwalwa ica kuti bwafulunganya ‘amano yenu no bupanda,’ ninshi kwena namunwa ukucila mu cipimo.—Amapinda 3:21, 22.

Apo tuleikala mu nshita ishayafya, ilyashi lyaleti, “Yehova, E ca ‘Kushinamo Cesu mu Nshita ya Kumanama’” lyalisansamwishe abalongene. Ipepo no mupashi wa mushilo kuti fyatwafwa ukushipikisha nge fyo na Bena Kristu banensu bengatwafwa.

Ilyashi lya kulekelesha pa bushiku bwa kubalilapo lyaleti “‘Icalo Cisuma’—Icilangililo ca fyo Paradaise Akaba.” llyo lyaleya ku kupwa, bonse abalongene bali ne nsansa ilyo akatabo kapya akalimo amamapu ya mu Baibolo kafumine! Aka katabo ketwa ati Moneni Icalo Cisuma.

Umutwe uwa Bushiku bwa Cibili: “Londolweleni Ubukata Bwakwe mu Nko”

Ilyo ukulanda pe lembo lya bushiku kwapwile, pakonkele ilyashi lya ku kukonkana ilyaleti “Ukubeeka Ubukata bwa kwa Yehova Nge Filola.” Ilya kubalilapo lyalandile pa “Ukwananya Imbila Nsuma Konse Konse.” Mwali ne filangililo fya filya fine fyacitike ilyo bali mu mulimo wa mwi bala. Mu lyashi lya bubili kalanda alandile  pa mutwe waleti “Ukufimbula Icifimbo pa Bapofushiwa.” Mwali icilangililo ca cipempu ca kubwelelako. Ilyashi lya butatu lyaleti “Ukufishapo Kubeeka Ubukata mu Butumikishi Bwesu.” Ukupwisha no kushimika ifyo bamo bakumenye mu mulimo fyalengele ilyashi lyumfwike bwino.

Lyene pakonkele ilyashi ilyaleti “Ukupatwa Apabulo Mulandu.” Kwali ukwipusha Inte sha cishinka abashangile no kuba abacishinka pa mulandu wa maka Lesa abapeele, te mulandu no kukaanya.

Ico abantu bafwaisha ukumfwa pa mabungano lyashi lya lubatisho. Kabili icikonkapo, lubatisho lwa kutubika mu menshi abo abafikilepo. Ukubatishiwa mu menshi kulangilila ukuti umuntu naipeela umutima onse kuli Yehova. E ico ilyashi ilyaleti “Ukwikalila Umwabela Ukuipeela Kwesu Kulaletela Yehova Ubukata,” lyali ilyalinga.

 Ilyashi lyabalilepo mu cungulo lyakoseleshe ukuiceeceeta fwe bene. Lyaleti “Ukupashanya Kristu mu fyo Tumona Ubucindami.” Kalanda alandile pa cishinka cisuma nga nshi: Asosele ukuti ubucindami bufuma mu kupashanya Kristu. E ico Umwina Kristu talingile ukufwaya fye imilimo imo pa kuti fye abe ne cifulo cacindama. Alingile ukuipusha ati, ‘Bushe ndaitemenwa ukubombako imilimo ya kwafwilisha bambi ishingamoneka na ku bantu?’

Bushe mulomfwa ukunaka? Bonse tulomfwa ukunaka. Bonse abalongene balitemenwe ukukutika ku lyashi lyaleti “Abanaka Lelo Abashipomponteka.” Inte sha kwa Yehova abakokole abo baipwishe balandile ukuti Yehova kuti alenga twaba na “maka . . . ukupitila mu mupashi wakwe.”—Abena Efese 3:16.

Tatufyalwa na bukapekape. Lelo tubusambilila fye. Ici e cishinka cacindama ico ilyashi lyaleti ‘Natube Bakapekape, Abaiteyanya Ukupako Bambi’ lyalandilepo. Kabili ili lipusho lyacindama lyalipushiwe: “Bushe twali-iteyanya ukupeelako amaminiti yamo cila bushiku kuli bamunyinefwe ne nkashi abakoloci, abalwala, abakungumana imitima, nelyo abatalalilwa?”

Abalongene balefwaisha ukukutita ku lyashi lyaleti “Cenjeleni kwi ‘Shiwi lya Bambi Bambi.’” Lyalingenye abakonshi ba kwa Yesu ku mpaanga ishumfwa kwi shiwi lya kwa “kacema musuma” lelo tabomfwa kwi shiwi lya “bambi bambi” ilifuma ku bantunse abatungululwa na Kaseebanya.—Yohane 10:5, 14, 27.

Bakemba bafwile ukwimbila pamo pa kuti abantu bomfwe ifyo baleimba. Pa kuti bacindike Lesa, bakapepa ba cine mwi sonde lyonse kano bali abaikatana. E ico ilyashi lyaleti “Peeleni Lesa Ubukata pa Kusosa ‘Akanwa Kamo’” lyatusambilishe ifyo bonse twingalanda “lulimi lwine lwine” lumo no kubombela Yehova “no mutima umo.”—Sefania 3:9.

Abafyashi, maka maka abakwata abana banono, bali ne nsansa nga nshi ukukutika ku lyashi lyalekelesheko pali ubu bushiku ilyaleti “Abana Besu—Icikwatwa Caumo Mutengo.” Abalongene bali ne nsansa pa kumona icitabo cipya ica mabuula 256 cafuma. Sambilila Kuli Kasambilisha Mukalamba citabo ico icikafwilisha abafyashi ukulapoose nshita na bana babo ukulalanda pa fya ku mupashi. Abana bupe bwafuma kuli Lesa.

Umutwe wa Bushiku bwa Citatu: “Citeni Fyonse ku Kucindika Lesa”

Ilembo lya bushiku e lya balilepo mu kulanda pa fya ku mupashi pa bushiku bwa kulelekesha ubwe bungano. Amalyashi ya kubalilapo pali ubu bushiku yalandile maka maka pa ndupwa. Ilyashi lya kubalilapo ilyaleti “Mwe Bafyashi, Kosheni Ulupwa Lwenu” lyapekenye imitima ya balongene ukukutika ku fyebo fyali no kukonkapo. Ilyo kalanda atantawile imilimo ya bafyashi iya kupekanishisha aba mu lupwa ifyo bakabila, asosele ukuti ukupekanishisha abana  ifya ku mupashi e mulimo ukalamba uwa bafyashi.

Kalanda wakonkelepo alandile ku bana. Alandile ilyashi lyaleti “Ifyo Imisepela Balelumbanya Yehova.” Asosele ukuti abaice baba ngo “mume” pantu bengi sana kabili ukupimpa kwabo kulapembesula. Abakalamba balomfwa bwino ukubomba na bo mu mulimo wa kwa Yehova. (Amalumbo 110:3) Muli ili lyashi mwali no kwipusha abaice ababa ica kumwenako cisuma.

Lyonse icilangililo ca mu Baibolo umo bafwala filya fine balefwala kale cilaba ni nshita ya nsansa pa kulongana kwa citungu. Kabili e fyo cali na pali uku kwine kulongana. Icilangililo caleti “Ukushimikila mu Kushipa Te Mulandu no Kukaanya” calelanda pa Bena Kristu ba mu mwanda wa myaka uwa kubalilapo. Ici cilangililo caliweme sana kabili calitusambilishepo fimo. Ilyashi lyakonkelepo pa cilangililo ilyaleti “Bileni Imbila Nsuma ‘Ukwabulo Kuleka,’” lyakomaile pa fintu fyacindama ifyali mu cilangililo.

Bonse abalongene balefwaisha ukukutika ku lyashi lya ku cintubwingi pa Mulungu ilyaleti “Ni Bani Balepeela Lesa Ubukata Ilelo?” Kalanda alondolwele ifintu fyashininkishiwa ifilango kuti basayansi na ba fya mapepo balifilwa ukucindika Lesa. Kano fye abantu bakwe aba pe shina lyakwe, abashimika no kusambilishe cine pali Yehova, e bacindike shina lyakwe icine cine leelo.

Ukusupawila Ulupungu lwa kwa Kalinda ukwe sambililo lya ulya wine mulungu e kwakonkele pa lyashi lya ku cintubwingi. E lyo paishile ilyashi lya kulekeleshako ilyaleti “‘Muletwalisha’ ku Kupeela Yehova Ubukata.” Kalanda atantawile ifintu 10 ifyo bonse abalongene bali no kusuminishako. Uku kusuminisha kwalimo inshila shalekanalekana isha kupeelelamo ubukata kuli Yehova, Kabumba. E lyo nomba abalongene pa mabungano yonse mwi sonde bayaswike abati “Ee,” ukulanga ukuti balisuminisheko ukulacite fyo fine.

Awe e fyo ukulongana kwapwile, na bonse abalongene baile baleibukisha umutwe wa kuti “Peeleni Lesa Ubukata.” Shi umupashi wa kwa Yehova utwafwe no kuteyanya kwakwe ukumoneka, ukuti tulefwaisha lyonse ukupeela Lesa ubukata, te kupeelo muntu iyo.

[Akabokoshi ne Fikope pe bula 23]

Amabungano ya pa Kati ka Nko

Amabungano ya pa kati ka nko aya nshiku shine yali ku Africa, Asia, Australia, Europe, North na South America. Inte ukufuma mwi sonde lyonse shalilaalikwe ukuyalonganako. E ico kwali “ukukoseleshanya” pa kati ka balaalikwe na bashibweni. (Abena Roma 1:12) Abaishibana kale balimonene na kabili. Kwali no kwishibilapo na bambi. Ilyashi lyaibela pali aya mabungano ya pa kati ka nko ni lilya lyaleti “Amalipoti Ukufuma ku Fyalo Fimbi.”

[Akabokoshi ne Fikope pe bula 25]

Ifitabo Fipya Ifipeela Ubukata Kuli Lesa

Ifitabo fibili ifipya fyalifumine pe Mabungano ya Citungu aya “Peeleni Lesa Ubukata.” Akatabo umwaba amamapu ya mu Baibolo aketwa ati Moneni Icalo Cisuma kaba ne nkupo yakosa bwino. Kabili mwaliba amamapu pa mabuula 36 ne fikope fya ncende sha mu Baibolo. Ibula lyonse lyaba ilyabalabata bwino. Mwaliba amamapu ya mabuteko ya Asiria, Babele, Madai na Persia, Greece, na Roma. Muli na mamapu yambi ayalanga umulimo wa kwa Yesu ne fyo ubuKristu bwalundulwike.

Icitabo ca Sambilila Kuli Kasambilisha Mukalamba caba na mabula 256 ne fikope 230. Ukutamba ifikope no kulayasuka amasuko ku mapesho yalimo, kuti kwawama ilyo muli pamo na bana. Ici citabo capekanishiwe ukucincitila ukusansa kwa kwa Satana pa baice, uufwaya ukuti onaule imibele yabo isuma.

[Icikope pe bula 23]

Bamishonari bashimike ifya kukumanya ifya kukoshe citetekelo

[Ifikope pe bula 24]

Ulubatisho lwali cintu cacindama pa mabungano yaleti “Peeleni Lesa Ubukata”

[Ifikope pe bula 24]

Abaice na bakalamba balomfwa bwino ukutamba ifilangililo fya mu Baibolo