“Wali Mulimo Umo pa Milimo ya Kupapusha”

ILYO itempele lya kwa Yehova lyakuulilwe mu Yerusalemu pa nshita ya kuteka kwa Mfumu Solomone imyaka nalimo 3,000 iyapitapo, icilibeseni cayemba ica mukuba ica kusungilamo amenshi calipangilwe no kubikwa pa nse ya mwinshi we tempele. Cafinine amakilo ukucila pali 30,000 kabili calesunga amenshi amalita nalimo 40,000. Ici cilibeseni caleitwa ati umusambilo. (1 Ishamfumu 7:23-26) Albert Zuidhof uwali kale incenshi mu fya malaiti malaiti pa National Research Council of Canada, alembele muli magazini wa Biblical Archeologist ukuti “cine cine uyu wali mulimo umo pa milimo ya kupapusha iyo abaHebere babombele.”

Bushe uyu musambilo wapangilwe shani? Baibolo itila: ‘Mu cintengulusha ca Yordani e mo [Imfumu Solomone aengele ifipe fya mukuba] mu mushili we bumba.’ (1 Ishamfumu 7:45, 46) Zuidhof atila “inshila bapangiilemo uyu musambilo ifwile yalipalene kuli ilya bacili babomfya pa kupanga inyenjele ishikalamba isha cela ca bronze.” Alondolola ati: “Nga kukonka fye baletala babumbe cikombola ce bumba icapala icilibeseni lelo umwabule cipunda no kucuumika cauma fye totolototolo. Kuli ici cine cikombola e ko balebumbilila umutika we pula na o waba fye kwati cilibeseni bakupikeko. Pa numa ya kucite fyo, pa muulu wa uyu mutika we pula, bakafula wa fyela balepangilapo icikombola na cimbi ica ku nse no kucileka cauma. Icalelekeleshako kwengululamo lilye pula mwashala fye icipunda e lyo mulya mu cipunda e mo bapongolwela icela ca bronze icasungululwa.

Pa kupanga uyu musambilo ushaikulile fyo kabili uwafina palekabila ukwishiba bwino incito. Icikombola ce bumba ica mu kati e lyo ne cikombola ca ku nse fyalekabila ukube fyakosa pa kuti tafyonaike ilyo bapongolwelamo umukuba uwasungululwa uwali amakilo 30,000. Kabili pa kuti ico balepanga ciiba ne milale kabili ciikolobana, balekabila ukupongolola uyu mukuba ukwabulo kuputaukisha. Cine cine wali mulimo wa kupapusha!

Mwi pepo apepele ilyo kwali ukusefya kwa kupeela itempele, Imfumu Solomone yatashishe Yehova Lesa pa mulimo onse uwa kukuula itempele uwabombelwe. Atile: “Mwasosele na ku kanwa kenu, no kufishisha ku kuboko kwenu.”—1 Ishamfumu 8:24.