Kampingu Umufumacumi

BUSHIKU bumo, Charles, umubomfi wa pa yuniversiti ya ku Kenya, alufishe foni ya kwenda na yo ilyo aleya ku ng’anda ukufuma ku ncito. Mu Kenya, aya mafoni yacili yalikosa umutengo.

Charles atile: “Nshale-enekela uuli onse ukumbwesesha foni.” Lelo, pa numa ya nshiku shinono, alipapile ilyo apokelele foni ukufuma ku maofesi ya Nte sha kwa Yehova mu Kenya. Calimupeseshe amano ilyo aebelwe ukuyasenda foni yakwe! Caishilesangwa ukuti umubomfi wa nshita yonse uwa Nte sha kwa Yehova uwaninine motoka imo ine na Charles e wasangile iyi foni. Pa kwesha ukusanga umwine, uyu mubomfi atwele foni ku maofesi ya Nte sha kwa Yehova, kabili ababomfi ba kuitemenwa aba palya mu kupelako basangile Charles pa kubomfya inambala iisangwa muli foni nga mwa-asha fye.

Muli kalata alembeele iofesi lya Nte, Charles atile: “Ndemutasha nga nshi pa kubombesha ukunsanga te mulandu na mafya yasanshiwemo. Ukufuma pa nshi ya mutima wandi ndetasha uwa mu kuteyanya kwenu uwasangile foni, no kumbwesesha. Calyafya ukusanga umuntu uwa bufumacumi ndakai, lelo ca kukoselesha ukuti e ko baba abantu abanono abapusanako ababa ni Nte sha cine isha kwa Yehova.”

Inte sha kwa Yehova konse fye balishibikwa ku bufumacumi bwabo. Bapashanya umutumwa Paulo, uwatile: “Natucetekela ukuti tuli na kampingu umufumacumi, pa kufwaya ukwenda no bufumacumi bonse.’’ (AbaHebere 13:18; 1 Abena Korinti 11:1) Balishibo kuti imibele ya musango yo ilacindika Yehova Lesa, nga fintu Yesu asosele ati: ‘‘Lekeni ulubuuto lwenu lubalikile ku cinso ca bantu, pa kuti bamone imilimo yenu iisuma no kucindika Shinwe uwaba mu muulu.”—Mateo 5:16.