Amepusho Ukufuma ku Babelenga

Ilyo Ilyeshi lyapwile, Noa atumine inkunda ukufuma mu cibwato ne nkunda yabwelele ne “buula lya muolife.” Ni kwi inkunda yafumishe ibuula?

Baibolo isosa aiti “amenshi yalekoseshe cibi pano isonde; shasuka shabunda ne mpili shonse ishasansama isha mwi samba lya muulu onse.” (Ukutendeka 7:19) Ilyo amenshi yalekama, Noa atumine inkunda pa nse imiku itatu. Alepishapo umulungu umo e lyo aituma na kabili. Umuku walenga bubili, inkunda yabwelele ne “buula lya muolife ilyatimpulwa: e ico Noa aishibe ukuti nayanguka amenshi ku kufuma pano isonde.”—Ukutendeka 8:8-11.

Kwena pali ino nshita tatwaishiba inshita amenshi yasendele pa kuti yakame kuli ilya ncende, pantu Ilyeshi lyalikulile ica kuti lyalyalwile umushili wa pano isonde. Lelo, amenshi yafwile yalibunshishe incende ishingi pa nshita ntali ica kuti imiti iingi yalifwile. Lelo, imiti imo tayafwililile, ne ci calengele ukuti ipuuke bwangu bwangu fye ilyo amenshi yakamine.

Ukukuma ku muolife, icitabo ca mutwe wa kuti The New Bible Dictionary catila: “Nga mwatema umuolife, utubana tulapuuka ku mushila, ne ci cilenga ukuti kube imiti iipya ukufika fye na kuli isano. Imiolife iili mupepi no kuuma na yo ine ilapuuka muli iyi ine nshila.” Icitabo ca mutwe wa kuti The New Schaff-Herzog Encyclopedia of Religious Knowledge, catila, caba “kwati amaka ya uyu muti tayafwa.” Takuli umuntu nangu umo pali leelo uwaishiba fyonse ifyacitike lilya, pamo nga ukukauka kwa menshi nangu ifyo yakabile nelyo ukutalala. E ico, te kuti tushininkishe nga ca kutila yalya menshi yalipeye imiolife ne filimwa fimbi nangu iyo.

Lelo kwena umuolife wa mu mpanga ulafwa bwangu nga kwatalalisha, nga filya fitalala mu mpili ishitali sana. Ilingi line uyu muti umena mu ncende ishishilepele ukucila pali bamita 1,000, umukaba fye ukufika kuli badigiri celcius 10. Icitabo ca mutwe wa kuti The Flood Reconsidered, cena catila: “Kanshi Noa afwile alimwene kwi buula ilyatimpulwa ukuti amenshi yaile yalekama na mu ncende shashika mwine.” Ilyo Noa kabili atumine inkunda umulungu wakonkelepo, tayabwelele, icalangilile ukuti yalisangile ifilimwa ifingi no kwa kwikala.—Ukutendeka 8:12.