Cinshi Inte sha kwa Yehova Bashilekela Ukwisa ku Mwenu?

ABANTU mwi sonde lyonse balishiba ifyo Inte sha kwa Yehova baba no mute ilyo balebomba umulimo wabo uwa kubila imbila nsuma ku ng’anda ne ng’anda. Abantu bamo tabaishiba umulandu baNte bashilekela ukuya ku mwabo, te mulandu tabapooseleko amano ku fyo baNte balelanda ilyo baile ku mwabo. Bakalata babili abalembelwe ku Russia kuti bayafwa ukulondolola umulandu Inte sha kwa Yehova bashilekela ukuya ku mayanda ya bantu.

Masha, umukashana uli ne myaka 19 uwa mu Khabarovsk, atile: “Kale nale-esha nga nshi ukusengauka Inte sha kwa Yehova.” Lelo, ilyo abelengele bamagazini bamo abalembwa ne Nte sha kwa Yehova, alilekele ukucite fi. Masha alembele ati: “Ala muli aba bamagazini mulaba ifyebo ifisuma nga nshi kabili balasambilisha icine cine. Nomba icacindamisha ca kuti balenga umuntu ukuumfwikisha ifilecitika mu calo. Panono panono natendeke ukuumfwikisha umulandu abantu babela pano calo.”

Svetlana, uwikala mu musumba wa Ussuriysk, uwaba amakilomita 80 ukufuma ku kapinda ka ku kuso aka Vladivostok, alembele ati: “E lyo fye natendeke ukubelenga Ulupungu lwa kwa Kalinda na Loleni! Aba bamagazini balakabilwa nga nshi muli shino nshiku. Ndomfwa bwino ukubelenga ifipande fyonse ifiba muli aba bamagazini. Filomfwika bwino nga nshi, mwaba ifyebo fisuma, kabili filasambilisha. Ndetasha nga nshi! Ndetasha nga nshi pa kuti mwaliba muli cino calo kabili na pa kubomba uyu mulimo usuma kabili uwacindama.”

Inte sha kwa Yehova mwi sonde lyonse balyangwa nga nshi ku lipusho lya mutumwa Paulo ilitila: “Nga [abantu] bakomfwa shani apabula uwa kushimikila?” (Abena Roma 10:14) Na imwe mukakutike kuli bena inshita fye inono ilyo bakesa ku mwenu. Na imwe kuti mwatemwa ubukombe busansamusha ubusangwa mu Cebo ca kwa Lesa, Baibolo.