Icisansamushi ku Balecula

ILYO abaume na banakashi ba busumino aba pa kale baculile, bapepele no mutima onse kuli Lesa pa kuti abatungulule. Lelo, abene na bo balicitilepo fimo ku kwangushako ubucushi, pamo ngo kusanga umwa kufyukila abalwani. Ku ca kumwenako, Davidi ashipikishe akayofi kakwe pantu ashintilile pali Yehova kabili no mwine aleibikilishako. Nga ifwe leelo?

Ilyo mulecula, mufwile mulacitapo fimo ku kupwisha ubwafya bwenu. Tutile incito yapwa, bushe te kuti muibikilisheko ukuti musange incito imbi iya kusungilamo aba mu ng’anda yenu? (1 Timote 5:8) Nelyo nga mwalwala, bushe te kuti muye ku cipatala? Na kabushe, Yesu, uwali na maka ayafumine kuli Lesa aya kuundapa amalwele ya misango yonse, atile ‘abalwele balakabila kondapa.’ (Mateo 9:12) Lelo, amacushi yenu te lyonse yengafumishiwapo; kuti mwatwalilila ukulashipikisha pa nshita imo.

Kuti cawama ukutwala uyu mulandu kuli Yehova Lesa mwi pepo. Ku ca kumwenako, ilyo tulefwaya incito, ukushintilila pali Lesa mwi pepo kukatwafwa ukukaana itunko lyonse ilya kwingila incito iishileumfwana ne fishinte fya mu Baibolo. Kabili tukataluka ku ‘kulufiwa ku citetekelo’ pa mulandu wa bufunushi nelyo ukutemwe ndalama. (1 Timote 6:10) Ca cine, ilyo tulepingula pali fimo ifikumine incito nelyo ulupwa lwesu nangu ifya kuundapwa amalwele, kuti twakonka ukukonkomesha kwa kwa Davidi ukwa kuti: “Poosa pali Yehova icisendo cobe icafina, wene alekulama; pe fye takasuminishe uwalungama ukutelententa.”—Amalumbo 55:22.

Ipepo lya kufuma pa nshi ya mutima likatwafwa kabili ukuba abashikatala ne ci cikalenga ubucushi ukukanatusakamika sana. Umwina Kristu wine wine, umutumwa Paulo alembele ati: “Muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela.” Ni mu nshila nshi ipepo lyafumaluka litusansamushisha? “Umutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Abena Filipi 4:6, 7) Umutende wa kwa Lesa “wacila amatontonkanyo yonse.” E ico,  kuti watulenga ukuba no mutelelwe ilyo tulecula ku matontonkanyo yabipa. ‘Ukalinda imitima yesu na matontonkanyo yesu.’ Ne ci cikalenga ifwe ukukanasuswa pa kucite fintu nangu ukucite fintu ifyabulamo amano, ifingalenga ubucushi bwesu ukukula.

Ipepo kuti lyalenga fye ne fintu ukwenda bwino. Ilyo umutumwa Paulo abikilwe mu cifungo mu Roma, mu kuicefya alombele Abena Kristu banankwe ukumupepelako. Cinshi Paulo alombele ifi? Abalembeele ati: “Ndemukonkomesha apakalamba ukucite ci, ukuti mbweshiwe bwangu kuli imwe.” (AbaHebere 13:19) Mu mashiwi yambi, Paulo alishibe ukuti ilyo Yehova aleumfwa amapepo ya mukoosha aya basumina banankwe, cali no kulenga ati acitepo cimo bwangu bwangu.—Filemone, icikomo 22.

Bushe ipepo kuti lyalenga ifintu ukutuwamina? Ee. Lelo, tufwile ukwishiba ukuti Yehova Lesa te kuti asuke amapepo yesu mu nshila ifwe tulefwailamo. Imiku iingi Paulo apepeele “umuunga mu mubili,” napamo ubulwele ubo alwele. Lelo ukucila ukufumyapo ubu bucushi, Lesa aebele Paulo ati: “Icikuuku candi ica bupe fye cakumana kuli iwe; pantu mu kunaka e mo amaka yandi yalelengwo kufikapo.”—2 Abena Korinti 12:7-9.

E co kanshi, ubucushi bwesu te kuti bufumepo apo pene fye. Lelo, tukaba ne shuko lya kushininkisha ukuti twalishintilila pali Shifwe wa ku muulu. (Yakobo 1:2-4) Ishibeni ukuti nangu ca kutila Yehova Lesa tafumishepo ubucushi, kuti ‘acita na pa kufuminamo ukuti tube na maka ya kubushipikisha.’ (1 Abena Korinti 10:13) Icishili ca kulaba ca kuti Yehova etwa “Lesa wa cisansamushi conse, uutusansamusha mu bucushi bwesu bonse.” (2 Abena Korinti 1:3, 4) Lesa kuti atupeela ifyo tukabila pa kushipikisha, kabili twalikwata isubilo lya bumi bwa muyayaya.

Baibolo, Icebo ca kwa Lesa, yalaya ukuti Yehova “akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.” (Ukusokolola 21:3, 4) Bushe muletwishika ukuti icalo umwabula amacushi kuti cabako? Kuti mwatwishika nga ca kutila imikalile yenu yaba fye iya kucululuka. Lelo, Lesa alaya inshita ilyo kushakabe umwenso na kayofi, kabili ukufwaya kwakwe kukasuka akufishiwapo.—Esaya 55:10, 11.

[Ifikope pe bula 9]

Ukufuma ku kupelelwa ukuya ku kwilulukwa