Amepusho Ukufuma ku Babelenga
Amepusho Ukufuma ku Babelenga
Apo abena Lebi tabakwete ubupyani muli Israele wa pa kale, ni shani fintu Hanamele umwina Lebi engashitisha impanga ku mufyala wakwe Yeremia umwina Lebi, nga fintu calembwa pali Yeremia 32:7?
Ukulosha ku bena Lebi Yehova aebele Aarone ukuti: “Tawakakwatemo icikwatwa nelyo ubupyani, kabili tawakabe na cakaniko mu kati kabo [abena Israele].” (Impendwa 18:20) Na lyo line abena Lebi balibapeele imishi 48 pamo ne mpanga sha iko isha mulemfwe, ishali mu ncende yonse mu Calo Calaiwe. Umushi Yeremia aleikalamo wali ni Anatote, uyu wali ni umo uwa mishi yapeelwe ku “bana ba kwa Aarone, bashimapepo.”—Yoshua 21:13-19; Impendwa 35:1-8; 1 Imilandu 6:54, 60.
Pa Ubwina Lebi 25:32-34, tubelengapo kuti Yehova alipeele amafunde ya kulungatika ayakumine “ukulubula kwa muyayaya nelyo insambu sha bupyani” ubwa mishi iyo abena Lebi bakwete. Twamona kanshi ukuti umo umo uwa mu lupwa lwa bena Lebi ali ne nsambu sha kupyana, ukubomfya no kushitisha incende shimo shimo isha mpanga yakwe. Kanshi ico kuti casanshamo ukushitisha impanga no kuishita na kabili. * Abena Lebi abengi bali ne mpanga kabili baleibomfya nga filya fine fye abena Israele ne mikowa imbi balecita.
Nalimo pa kuti abena Lebi babe ne shi mpanga kwaleba fye ukushipyana mu lupwa. ‘Insambu sha bupyani,’ e po shali. Lelo ubukwebo bwasuminishiwe fye ku bena Lebi beka beka. Kabili, cilemoneka kwati ukushitisha impanga no kuishita kwali fye ku mpanga iyali mu mipaka ya mishi, apo “impanga sha mulemfwe isha mishi yabo” tashali na kushitishiwa “pantu shene e camaninwa ca muyayaya kuli bene.”—Ubwina Lebi 25:32, 34.
E co impanga iyo Yeremia ashitile ukufuma kuli Hanamele ifwile yali ni imo iyo umo engashitisha no kuishita na kabili. Iyi mpanga ifwile yali mu mipaka ya mushi nelyo umusumba. Yehova umwine alilandile mu kushininkisha ati “impanga” balelandapo yali ya kwa Hanamele kabili Yeremia ali ne ‘nsambu sha kuishita.’ (Yeremia 32:6, 7) Yehova abomfeshe uku kumfwana kwa mu bukwebo mu mampalanya ku kukosha icipangano cakwe ica kuti abena Israele bakabwela ku kupoka ubupyani bwabo ubwa mpanga pa numa ya kwikala muli bunkole mu Babele.—Yeremia 32:13-15.
Takwaba icilangilila ukuti Hanamele takwete insambu ya kuba ne mpanga mu Anatote. Tapaba apo tubelenga ukuti alitobele ifunde lya kwa Yehova pa kweba Yeremia ukushita ilya mpanga mu Anatote, kabili tapaba apo tubelenga ukuti Yeremia alibomfeshe insambu shakwe bubi bubi pa kushita ilya mpanga.—Yeremia 32:8-15.
[Futunoti]
^ para. 4 Imyaka 2,000 iyapitapo, umwina Lebi Barnaba ashitishe impanga yakwe no kusangule ndalama ku kwafwa abakonshi ba kwa Kristu mu Yerusalemu abali mu kukabila. Impanga nalimo yali mu Palestine nelyo mu Kupro. Nelyo pambi iyi mpanga yali fye ni ncende ya kushiikamo abantu iyo Barnaba akwete mu Yerusalemu.—Imilimo 4:34-37.