Ifyo Twingalanga Ukuti Twalitemwa Lesa

UKULUNDULULA ukutemwa kwa kuli Lesa takupeelela fye mu kusambilila. Nge fyo ababomfi ba kwa Lesa aba mwi sonde lyonse bengasuminisha, ukutemwa kwa cine ukwa kuli Lesa kulakula lintu umo abeleshanya ne mibele yakwe kabili kulakoselako lintu umo aishiba ifyo Lesa atemwa, ifyo apata ne fyo afwaya.

Mu kutemwa, Yehova alitupeela Icebo cakwe Baibolo, umo aisokolola umwine. Muli Baibolo tusambilila ifyo Yehova abombele mu mibele yapusanapusana. Filya fine tuumfwa bwino ukupokelela kalata ukufuma ku mutemwikwa e fyo Baibolo itusansamusha ilyo twasambilila ifipya pa mibele ya kwa Yehova iisokololwa kuli ifwe.

Lelo, nge fyo tumona inshita shimo mu mulimo wesu uwa ku cintubwingi, ukusambilila fye pali Lesa te lyonse kulenga umuntu ukutemwa Lesa. Yesu atile ku baYuda bamo abashaletasha aba mu nshiku shakwe ukuti: “Mufwayafwaya mu malembo, pantu mutontonkanyo kuti muli yene e mo mukakwatila ubumi bwa muyayaya; . . . lelo naishibo ukuti imwe tamwatemwa Lesa.” (Yohane 5:39, 42) Abantu abengi balapoosa imyaka iingi ukusambilila pa milimo ya kutemwa iya kwa Yehova lelo balafilwa ukumutemwa. Mulandu nshi? Balafilwa ukutontonkanyapo sana pa fishinka fyonse ifyo basambilila. Lelo abantu abengi aba cishinka abo tusambilila na bo Baibolo basanga ukuti ukutemwa kwabo ukwa kuli Lesa kulatwalilila ukukula. Mulandu nshi? Filya fine ifwe twacitile, e fyo na bo bacita ukukonka ica kumwenako ca kwa Asafi. Acitile shani?

Etetuleni pali Yehova no Kutasha

Asafi apampamine pa kulundulula ukutemwa kwa kuli Yehova mu mutima wakwe. Alembele ukuti: “Ku mutima wandi e ko  ndeisosha . . . Ndelumbule milimo ya kwa Yehova; pantu ndeibukishe fipesha amano fyenu fya kale. Kabili ndetontonkanyo kubomba kwenu konse, no kwetetule milimo yenu.” (Amalumbo 77:6, 11, 12) Ukutemwa Lesa kukakulilako mu mutima wa muntu uutontonkanya sana pa nshila sha kwa Yehova nge fyo kemba wa malumbo acitile.

Icintu cimbi ca kuti, ukwibukisha ifyo twaipakisha ilyo tulebombela Yehova kulakosha bucibusa bwesu na wene. Umutumwa Paulo atile tuli “bakabomba banankwe” aba kwa Lesa kabili bucibusa ubwingabapo pa bantu ababombela pamo bulaibela sana. (1 Abena Korinti 3:9) Ilyo twalanga mu cebo na mu ncitilo ukuti twalitemwa Yehova, alatasha kabili cilenga umutima wakwe ukusamwa. (Amapinda 27:11) Lyene, ilyo twalomba Yehova ukutwafwa kabili atwafwa ukucimfya amafya yamo, tuleshiba ukuti ali na ifwe kabili ukutemwa kwesu kuli wene kulakulilako.

Bucibusa pa bantu babili bulakula lintu balumbulula ukuyumfwa kwabo kuli umo no munankwe. E fyo ciba na lintu twaeba Yehova umulandu twaipeelela kuli wene, ukutemwa kwesu kulakoselako. E cikalenga tukaletontonkanya pa mashiwi ya kwa Yesu ayatila: “Uletemwa Yehova Lesa obe no mutima obe onse, no mweo obe onse, no kutontonkanya kobe konse, na maka yobe yonse.” (Marko 12:30) Cinshi twingacita pa kushininkisha ukuti tukatwalilila ukutemwa Yehova no mutima wesu onse, no mweo wesu onse, no kutontonkanya kwesu konse na maka yesu yonse?

Ukutemwa Yehova no Mutima Wesu Onse

Amalembo yalosha ku mutima wa mampalanya, icaba muntu wabelama uwa mu mutima—e kutila ifyo tufwaya, incitilo shesu ne fyo tuyumfwa. E co ukutemwa Yehova no mutima wesu onse calola mu kuti tulafwaya ukusekesha Lesa ukucila icintu conse. (Amalumbo 86:11) Tulalanga ukuti twaliba no kutemwa kwa musango yo pa kuba ne mibele iimusekesha. Tulatukusha ukupashanya Lesa pa ‘kupata icabipa no kutwalilila ukulacita icisuma.’—Abena Roma 12:9.

Ukutemwa Lesa kulakuma ifyo tuyumfwa pa fintu fyonse. Tutile, nalimo incito yesu kuti yaba iisuma sana no kutusendele nshita yesu yonse, lelo bushe e kwaba umutima wesu? Iyo. Apo twalitemwa Yehova no mutima wesu onse, ica kubalilapo kuba ababomfi ba kwa Lesa. Cimo cine na ku bafyashi besu, tufwile ukubasekesha, no kusekesha abena mwesu mu cupo. Na bakalamba ba ncito na bo tufwile ukubasekesha, lelo tulangisha ukuti twalitemwa Yehova no mweo wesu onse pa kufwaya ukumusekesha intanshi. Na kuba e o tufwile ukutemwa intanshi mu mutima wesu.—Mateo 6:24; 10:37.

 Ukutemwa Yehova no Mweo Wesu Onse

Mu Malembo ishiwi lya kuti “umweo” lilosha kuli ifwe ngo muntu no bumi bwesu bonse. Kanshi ukutemwa Yehova no mweo wesu onse calola mu kuti tubomfye ubumi bwesu mu kumutasha no kulangisha ukutemwa kwesu ukwa kuli wene.

Ca cine kuti kwabako fimo ifyo twatemwa mu bumi, pamo ngo kusambilila incito, ukuba no bukwebo nelyo ukukusha abana. Lelo pa nshita imo ine tulanga ukuti twalitemwa Yehova no mweo wesu onse pa kucita ifintu ukulingana ne fyo afwaya kabili pa kusunga ifintu fimbi apo fifwile ukuba mu bumi bwesu, na muli fyo ‘ukufwaya intanshi ubufumu no bulungami bwakwe.’ (Mateo 6:33) Ukupepa no mweo onse na kabili kupilibula ukuba uwapimpa. Tulanga ukuti twalitemwa Yehova pa kuba abapimpa ukushimikila ubukombe bwa Bufumu, pa kulanda ifyebo ifya kukoselesha pa kulongana nelyo pa kwafwa bamunyinefwe na bankashi aba Bwina Kristu. Muli fyonse tutwalilila ‘ukucito kufwaya kwa kwa Lesa no mweo onse.’—Abena Efese 6:6.

Yesu alangilile ukutemwa kwakwe kuli Lesa pa kuikaana umwine. Alecita ukufwaya kwa kwa Lesa intanshi no kufwaya kwakwe kwaleba ukwa bubili. Yesu alitulaalike ukukonka ifyo acitile. Atile: “Umuntu nga alefwaya ukunkonka, aikaane umwine, asende icimuti cakwe ica kucushiwilwapo, alenkonka.” (Mateo 16:24, 25) Nga twaipeela kuli Lesa ninshi twaikaana. Calola mu kuti twatemwisha Lesa ica kuti twaikaana fwe bene pa kuipeela kuli wene. Cili fye nga filya umwina Israele mu nshita sha pa kale atemenwe shikulu wakwe ica kuti apingulapo ukuba umusha wakwe inshita yonse. (Amalango 15:16, 17) Ukupeela ubumi bwesu kuli Yehova e bushininkisho bwa kuti twalimutemwa.

Ukutemwa Yehova no Kutontonkanya Kwesu Konse

Ukutemwa Yehova no kutontonkanya kwesu konse cipilibula ukuibikilishako pa kuumfwikisha imibele ya kwa Yehova , ubufwayo bwakwe ne fyo afwaya. (Yohane 17:3; Imilimo 17:11) Tulanga ukutemwa kuli Yehova ilyo tulebomfya amatontonkanyo yesu yonse pa kwafwa bambi ukumutemwa na pa kulundulula ukucenjela kwesu ukwa kusambilisha. Umutumwa Petro atukoseleshe ukuti, “sunsunkanyeni amatontonkanyo yenu.” (1 Petro 1:13) Na kabili tulesha na maka ukwangwa kuli bambi, maka maka ababomfi banensu aba kwa Lesa. Tulebukila imibele babamo kabili tuleshiba ilyo twingabatasha nelyo ukubasansamusha.

Tulalanga Yehova ukuti twalimutemwa no kutontonkanya kwesu konse pa kunakila wene na mu fyo tutontonkanya. Tulesha ukumona ifintu nge fyo afimona, no kutontonkanya pali wene mu fyo tupango kucita kabili tulacetekela ukuti inshila shakwe e shawamisha. (Amapinda 3:5, 6; Esaya 55:9; Abena Filipi 2:3-7) Lelo kuti twabomfya shani amaka yesu ilyo tuletwalilila ukulanga ukutemwa kwesu kuli Lesa?

Ukutemwa Yehova na Maka Yesu Yonse

Abaice abengi mu cilonganino ca Bwina Kristu balabomfya amaka yabo ku kulumbanya Yehova. (Amapinda 20:29; Lukala Milandu 12:1) Inshila imo umo abaice abengi aba Bwina Kristu balangila ukuti balitemwa Yehova na maka yabo yonse ni pa kubomba bupainiya bwa nshita yonse. Banacifyashi abengi balabomba uyu mulimo lintu abana babo bali ku sukulu. Ukulunda pa kusakamana ukukabila kwa ndupwa shabo, baeluda ba cishinka balacema umukuni kabili ici cilanga ukuti balitemwa Yehova na maka yabo yonse. (2 Abena Korinti 12:15) Yehova alapeela amaka abamutetekela pa kuti bengamulumbanya apapela amaka yabo.—Esaya 40:29; AbaHebere 6:11, 12.

Ukutemwa kukakula nga twakulundulula bwino. E co tufwile ukutwalilila ukusendako inshita iikalamba iya kwetetula. Tulebukisha ifyo Yehova atucitila no mulandu tufwile ukuipeelela kuli wene. Nga bantu abashapwililika abafuma kuli Adamu, te kuti tuwaminwe “ifyo Lesa apekanishisha abamutemwa.” Lelo kuti twalanga ukuti twalitemwa Yehova no mweo wesu onse. Natutwalilile ukucita ifyo fine!—1 Abena Korinti 2:9.

[Icikope pe bula 20]

Ifyo tucita e filanga ukuti twalitemwa Lesa