UbuKristu bwa Cine Bulelunduluka
UbuKristu bwa Cine Bulelunduluka
UBUTUMIKISHI bwa kwa Yesu Kristu bwalikumine sana abantu mu mwanda wa myaka uwa kubalilapo. Ubukombe bwakwe bwalepeela amaka, mwali amasambililo ayasuma, kabili bwalekoselesha ica kuti abantu balepapa. Ifyebo alelanda fyalikumine sana abantu abengi abakutike wene.—Mateo 7:28, 29.
Ukwabula umwenso Yesu alikeene ukuba mu mipepele na mapolitiki ayaletitikisha abantu muli shilya nshiku. Lelo aliyangwishe ica kuti abantu yaweyawe baleya kuli wene. (Mateo 11:25-30) Alisumine ukuti ukusonga kwa mipashi ibifi kwalyanene pa calo kabili alilangilile ukuti ali na maka pali yene ayo Lesa amupeele. (Mateo 4:2-11, 24; Yohane 14:30) Yesu alilondolwele bwino bwino ifyo ukucula no lubembu fya-ampana, kabili mu kutemwa alangilile ukuti Ubufumu bwa kwa Lesa e bukafumyapo ulubembu no kucula. (Marko 2:1-12; Luka 11:2, 17-23) Umuku wa limo, afumishepo imfifi yalecilikila abantu ukwishiba imibele ya kwa Wishi, no kulenga ishina lya kwa Lesa ukwishibikwa kuli bonse abalefwaya ukuba na bucibusa na Wene.—Yohane 17:6, 26.
Kanshi, e mulandu wine abasambi ba kwa Yesu basabankanishishe bwangu bwangu ubukombe bupeela amaka te mulandu no kupakasa kwaluma ukwalefuma ku mipepele na mabuteko. Mu myaka fye 30, ifilonganino fyakosa ifya Bena Kristu fyalipangilwe mu Afrika, mu Asia, na ku Bulaya. (Abena Kolose 1:23) Icine ca-anguka ico Yesu asambilishe calibuutwishe imitima ya baicefya, abantu aba mitima yalungama abali mu Buteko bwa Roma bonse.—Abena Efese 1:17, 18.
Lelo, ni shani fintu aba bonse abasambi abapya abafumine mu bwikashi bwalekanalekana, intambi, indimi, ne mipepele bengekatana pamo icine cine mu “citetekelo cimo,” nga fintu umutumwa Paulo atile? (Abena Efese 4:5) Cinshi cali no kulenga ukuti ‘balesosa akanwa kamo kene’ pa kuti tababele na malekano? (1 Abena Korinti 1:10) Apo twalimona ukuti abaitunga ukuba Abena Kristu leelo tabaikatana, tulingile ukubebeta fintu Yesu umwine asambilishe.
Icingekatanya Abena Kristu
Ilyo balemulubulwisha kuli Ponti Pilato, Yesu alandile icingekatanya Abena Kristu. Atile: “Ici e co nafyalilwe, kabili ici e co naishile pano calo, ukuti nshimike icine ubunte. Onse uwaba ku cine, omfwe shiwi lyandi.” (Yohane 18:37) Kanshi, ukulakonka ifyo Yesu alesambilisha pamo ne Cebo ca kwa Lesa conse icapuutwamo, Baibolo, kuti kwaikatanya abasambi ba cine aba kwa Kristu.—1 Abena Korinti 4:6; 2 Timote 3:16, 17.
Kwena, abasambi ba kwa Yesu inshita shimo baali no kulakwata amepusho nelyo bakulapusana. Bushe cinshi cingabafwa? Yesu alondolwele ukuti: “Ilyo ulya akesa, umupashi wa cine, akamutungulula mu cine conse, pantu takalande ifyakwe umwine, lelo ifyo aumfwa e fyo akalanda, kabili akabilisha kuli imwe ifileisa.” (Yohane 16:12, 13) E ico, umupashi wa mushilo uwa kwa Lesa e wali no kwafwa abasambi ba cine aba kwa Yesu ukuumfwikisha icine ico Lesa aaleya alesokolola. Kabili, ulya mupashi wali no kutwala ifisabo, pamo nga ukutemwa, ukusekelela, no mutende, ifisabo ifikabalenga ukwikatana.—Imilimo 15:28; Abena Galatia 5:22, 23.
Yesu tasuminishe ukupusana nelyo amalekano pa basambi bakwe; kabili tabasuminishe ukwalula icine ca kwa Lesa pa kuti balekonka intambi nelyo ifisumino fya bantu abo bali no kukumanya. Lelo, pa bushiku alekelesheko ukuba na bene, apepele ati: “Nshilelombela aba beka, lelo na abo abantetekela ukupitila mu cebo cabo; ukuti bonse babe bamo, ifyo imwe Tata mwaba muli ine, na ine naba muli imwe, ukuti na bo babe muli ifwe, ku kuleka aba pano calo batetekele ukuti ni mwe mwantumine.” (Yohane 17:20, 21) Kanshi, ukutula lilya ukufika ne leelo line, ukwikatana kwine kwine ukwa mu mupashi na mu cine kwali no kuba ica kwishibilako abasambi ba cine cine aba kwa Kristu. (Yohane 4:23, 24) Lelo, ndakai amacalici tayaikatana, paliba amalekano. Mulandu nshi cabela ifi?
Umulandu pa Macalici Pabela Amalekano
Icikalamba icalenga sana ukuti kube amalekano mu fyo abaitunga ukuba Abena Kristu basuminamo na fintu bacita ni co tabakonka ifyo Yesu alesambilisha. Kalemba umo atile: “Nga fintu cali kale, leelo Abena Kristu bakonka ifya mu Baibolo ifilebawamina—kabili amalembo ayashumfwana ne fishilano fya mu macalici yabo tabayakonka.” Ifi fine e fyo Yesu na batumwa bakwe basobele ukuti fikalacitika.
Ku ca kumwenako, ilyo umutumwa Paulo apuutilwemo no mupashi alembeele kangalila munankwe Timote ukuti: “Ikese nshita ilyo bakaleka ukukonka isambilisho ilituntulu, lelo, umwabela ifya lunkumbwa fyabo abene, bakailonganikila bakasambilisha aba kubapeepula amatwi; kabili bakatalusha amatwi yabo ku cine, no kuyalwila ku malyashi ya bufi.” Bushe Abena Kristu bonse bakalufiwa? Iyo. Paulo akonkenyepo ati: “Lelo iwe ube uwatekanya mu fintu fyonse, cula ku bubi, bombo mulimo wa bukabila bwa mbila nsuma, fishapo bukapyunga bobe.” (2 Timote 4:3-5; Luka 21:8; Imilimo 20:29, 30; 2 Petro 2:1-3) Timote na Bena Kristu ba busumino bambi balyumfwilile uku kupanda amano ukwapuutwamo.
Abena Kristu ba Cine Bacili Balikatana
Kwati ni Timote, Abena Kristu ba cine leelo balitekanya pantu balikaana amano ya buntunse no kukonka fye amafundisho ya mu Malembo. (Abena Kolose 2:8; 1 Yohane 4:1) Ukupashanya Abena Kristu baikeleko imyaka 2,000 iyapita, Inte sha kwa Yehova shilefishapo bukapyunga bwa shiko mu fyalo ukucila 230. Baletwala ubukombe bwa kwa Yesu ubwa cine cine, e kutila imbila nsuma ya Bufumu, ku bantu ukuli konse. Moneni inshila shacindama shine isho bapashanyako Yesu no kukonka UbuKristu bwa cine te mulandu na kuntu bekala.
Amafundisho yabo yafuma mu Cebo ca kwa Lesa. (Yohane 17:17) Shimapepo we calici lya ku Belgium alembele ati: “Cimo ico twingasambililako kuli bene [Inte sha kwa Yehova] ca kuti balaitemenwa ukukutika ku Cebo ca kwa Lesa kabili balashipa ukucibomfya ilyo baleshimikila.”
Bashintilila pa Bufumu bwa kwa Lesa ukuti e bukapwisha amafya mwi sonde lyonse. (Luka 8:1) Mu Barranquilla, ku Colombia, Nte ashimikile kuli Antonio, uwatemenwe sana akabungwe ka bupolitiki kamo. Nte tali ku lubali lwa kwa Antonio, kabili tali ku lubali lwa kabungwe ka bupolitiki akali konse. Lelo, aipwishe Antonio no mwaice wakwe ukulasambilila na wene Baibolo ukwabula ukupoosapo nangu lumo. Tapakokwele Antonio aishileishiba ukuti Bufumu bwa kwa Lesa fye bweka e bukaafwa abantu abapiina aba mu Colombia na mwi sonde lyonse.
Balacindika ishina lya kwa Lesa. (Mateo 6:9) Umuku wa kubalilapo ilyo Inte sha kwa Yehova shakumenye Maria, Katolika umwine mwine uwikala mu Australia, abebele ukumulanga ishina lya kwa Lesa mu Baibolo. Bushe acitile shani ilyo bamulangile? Atile: “Umuku wa kubalilapo namwene ishina lya kwa Lesa mu Baibolo, nalilukwishe ifilamba. Nalitemenwe ukwishiba ukuti kuti naishiba ishina lya kwa Lesa no kulalibomfya.” Maria alitwalilile ukusambilila Baibolo. Ukutula apo afyalilwe, e lyo aishibe untu Lesa aaba kabili aishileba cibusa wakwe.
Ukutemwa kwalibekatanya. (Yohane 13:34, 35) Umukululo wa mu nyunshipepala ya The Ladysmith-Chemainus Chronicle, iya ku Canada, watile: “Te mulandu na fintu wasuminamo, nelyo tauya kwi calici ilili lyonse, ufwile ukutasha Inte sha kwa Yehova ishali 4,500 ishabombele akasuba no bushiku mu mulungu umo na hafu ukukuula ing’anda ya kulonganinamo ukulongana kukalamba mu Cassidy iyakula basikweyamita 2,300 . . . Ukucite ici ukwabulo kupusana, amalekano nelyo ukuifwaila umucinshi cishibilo ca BuKristu bwa cine.”
E co tontonkanyeni pali ubu bushininkisho. Ilyo abasambilila ifya mapepo, bamishonari, na baya mu macalici ya mu Kristendomu baletwalilila ukulwishanya na malekano ayaba mu macalici yabo, UbuKristu bwa cine bulelunduluka mwi sonde lyonse. Cine cine, Abena Kristu ba cine balebomba umulimo wabo uwa kushimikila no kusambilisha Icebo ca kwa Lesa. (Mateo 24:14; 28:19, 20) Nga ca kuti na imwe muli pa bantu “abateta no kulila” pa fya muselu ifilecitika kabili tamwatemwa amalekano yaba mu macalici ya mu Kristendomu, tulemulaalika ukuba ne Nte sha kwa Yehova mu kupepa Lesa wa cine fye umo, Yehova mu kwikatana.—Esekiele 9:4; Esaya 2:2-4.