Amepusho Ukufuma ku Babelenga

Cali shani ilyo ifyalembwa pa Ukufuma 4:24-26 fyacitike kabili nani apene epaiwe?

Mose aleya ku Egupti no mukashi wakwe, Sipora, na bana bakwe abaume, Gershomu na Eliesere, ilyo ici cacitike. Baibolo itila: “Kabinge mu nshila pa ndo, e po Yehova amukumenye, afwaile no kumwipaya. E ico Sipora abuulile ilibwe, asembulwile ne nkanda ya pa mpela ya mwana wakwe umwaume, alenga ikumye na ku makasa yakwe, no kutila, Pa kuti uli shibwinga wa mulopa kuli ine. Awe Yehova atompweke kuli wene. E lyo Sipora atile, Uli shibwinga wa mulopa, pa mulandu wa kusembululwa.” (Ukufuma 4:20, 24-26) Nangu line ifi fikomo tafyalondololwa bwino bwino kabili te kuti twishibe bwino umo fyalola, Amalembo yalitwebako fimo pali fyene.

Muli ili lyashi, uo bapene bepaye talumbulwa mu kulungatika. Lelo, kuti twasondwelela ukuti tali ni Mose, pantu e lyo Lesa amupeele fye umulimo wa kutungulula abena Israele ukufuma mu Egupti. (Ukufuma 3:10) Tacingacitika ukuti ilyo Mose aleya mu kubomba ulya mulimo, malaika wa kwa Lesa kuti afwaya ukumwipaya. E co, afwile ni umo pa bana bakwe e wapene epaiwe. Ifunde lyapeelwe kale kuli Abrahamu pa lwa kusembulula lyatile: “Kabili umwaume uushasembululwa, uo tasembulwilwe umubili wa nkanda yakwe ya pa mpela, akasukulwe uyo muntu ku bantu bakwe; nafulunganya icipingo candi.” (Ukutendeka 17:14) Mose afwile tasembulwile umwana wakwe umwaume, ne ci calengele malaika wa kwa Yehova ukufwaya ukumwipaya.

Makasa ya bani inkanda ya pa mpela yakumishe ilyo Sipora asembulwile umwana wakwe pa kulungika umulandu? Ya kwa malaika wa kwa Yehova uwakwete amaka ya kwipaya umwana uushasembulwilwe. E co, kuti twatila Sipora alengele inkanda ukukumya ku makasa ya kwa malaika, ukumupeela inkanda pa kuti amulange ukuti nacita ifyalekabilwa mu cipingo.

Amashiwi ya kwa Sipora aya kuti “uli shibwinga wa mulopa, pa mulandu wa kusembululwa” mashiwi yaibela. Cinshi yaletweba pali wene? Pa kucita ifyalekabilwa ukulingana ne cipingo, Sipora asumine ukuba mu cipingo na Yehova. Icipingo ce Funde ico Lesa apangene na bena Israele pa numa calangilile ukuti mu cipingo, Yehova kuti amonwa ngo mulume e lyo abo apangene na bo bali ngo mukashi. (Esaya 54:1, 5) E co, pa kweba Yehova (ukupitila muli malaika atumine) ukuti “uli shibwinga wa mulopa,” Sipora afwile alelanga ukunakila kwakwe ku fyalekabilwa ukulingana ne cipingo. Cali kwati alesumina ukuba umukashi muli cilya cipingo umo abaume balekabilwa ukusembululwa, ukusumina ukuti Yehova Lesa ali mulume. Na kabili, ukucita bwangu ico Lesa alefwaya, kwalengele Sipora apusushe umweo wa mwana wakwe.