Bushe Tulingile Ukusefya Shani—Umulaalilo wa kwa Shikulu?

PAULO umutumwa wa Bwina Kristu alilondolwele bwino bwino ifya kwibukisha Umulaalilo wa kwa Shikulu ilyo alembele ati: “Napokelele ukufuma kuli Shikulu ico nashiilile na imwe, ukuti Shikulu Yesu ubushiku alefutukwamo abuulile umukate kabili, ilyo atootele, aliumokawile no kutila: ‘Uyu mubili wandi uwa pa mulandu wenu. Mulecite ci ku kunjibukisha.’ Acitile cimo cine na ku lukombo, ilyo apwo kulyo mulaalilo, ati: ‘Ulu lukombo cipingo cipya pa mulandu wa mulopa wandi. Mulecite ci, ilyo lyonse mwanwamo, ni ku kunjibukisha.’ Pantu ilyo lyonse mwalya uyu mukate no kunwena mu lukombo ulu, mubile mfwa ya kwa Shikulu, akasuke esa.”—1 Abena Korinti 11:23-26.

Nga fintu Paulo asosa, Yesu atendeke Umulaalilo wa kwa Shikulu “ubushiku [Yesu] alefutukwamo” kuli Yuda Iskariote no kupeelwa kuli bashimapepo ba ciYuda abapatikishe abena Roma ukwipaya Kristu. Ulya mulaalilo waliko icungulo sana pali Cine, pa March 31, mu 33 C.E. Yesu afwilile pa cimuti pali Cisano akasuba, pa April 1. Apo inshiku muli kalenda wa baYuda shaletendeka icungulo ca bushiku bumo ukuyashinta ku cungulo ca bushiku bwakonkapo, fyonse fibili, Umulaalilo wa kwa Shikulu ne mfwa ya kwa Yesu fyacitike pa bushiku bumo bwine—ubushiku bwa Nisani 14, mu 33 C.E.

Abalyako umukate no kunwako umwangashi bali no ‘kulacite ci’ ku kwibukisha Yesu. Baibolo imbi itila, Yesu atile: “Mulecite ci nge cibukisho candi.” (1 Abena Korinti 11:24, The Jerusalem Bible) Umulaalilo wa kwa Shikulu witwa no kuti Icibukisho ca Mfwa ya kwa Kristu.

Mulandu Nshi Tufwile Ukusefesha Imfwa ya kwa Yesu?

Ubwasuko kuti twabusanga nga twaishiba ubucindami bwa mfwa yakwe. Yesu e watungilile sana bumulopwe bwa kwa Yehova kabili afwilile pali ici. E co, ashinine Satana ukuti wa bufi pa kusosa ukuti abantunse babombela fye Lesa pa kuti bamwenemo. (Yobo 2:1-5; Amapinda 27:11) Ukupitila mu mfwa yakwe ngo muntunse uwapwililika, Yesu ‘apeelo mweo wakwe icilubula ku kukabulamo abengi.’ (Mateo 20:28) Ilyo Adamu abembukile Lesa, apanishe  ubumi bwapwililika no mweo wa muyayaya. Lelo, “Lesa atemenwe aba pano calo ukutemwa kwa kuti apeele Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya.” (Yohane 3:16) Cine cine, “icilambu ca lubembu ni mfwa, lelo ica bupe ico Lesa apeela bumi bwa muyayaya muli Kristu Yesu Shikulwifwe.”—Abena Roma 6:23.

E co, imfwa ya kwa Yesu Kristu itulanga inshila shibili isho ukutemwa kwalangilwamo sana—ukutemwa kukalamba uko Yehova alanga umuntunse pa kupeela Umwana wakwe e lyo no kutemwa Umwana wakwe alaanga abantunse pa kuitemenwa ukupeela umweo wakwe. E co, Icibukisho ca mfwa ya kwa Yesu cilanda sana pali uku kutemwa kubili. Apo ni fwe balanga uku kutemwa, bushe tatulingile ukutasha pali kwene? Inshila imo twingatashishamo kusangwako ku kusefya Umulaalilo wa kwa Shikulu.

Ifyo Umukate no Mwangashi Fimininako

Ilyo atendeke Umulaalilo wa kwa Shikulu, Yesu abomfeshe umukate no lukombo lwa mwangashi nge fimpashanya nelyo ifishibilo. Yesu abuulile umukate, kabili, “ilyo atootele, aliumokawile no kutila: ‘Uyu [mukate] mubili wandi uwa pa mulandu wenu.’” (1 Abena Korinti 11:24) Pa kuti bonse balyeko, alimokawile umukate pantu tawakosele sana ico wapangilwe no bunga na menshi ukwabula icitutumushi. Mu Mulembo icitutumushi cimininako ulubembu. (Mateo 16:11, 12; 1 Abena Korinti 5:6, 7) Yesu tali na lubembu. Eco, umubili wakwe uwapwililika e walingile ukupeelwa nge cilubula ca bantunse. (1 Yohane 2:1, 2) Cine cine, calilingile ukuti umukate uwabomfiwe ku kwimininako umubili wa kwa Kristu uwabula ulubembu wibamo icitutumushi!

Yesu na kabili alitootele pa lukombo lwa mwangashi wakashika uushasundulwa no kusosa ati: “Ulu lukombo cipingo cipya pa mulandu wa mulopa wandi.” (1 Abena Korinti 11:25) Umwangashi wakashika mu lukombo wimininako umulopa wa kwa Yesu. Umulopa wa ng’ombe ne mbushi waikeshe icipingo ce Funde ico Lesa apingene no luko lwa bena Israele mu 1513 B.C.E. E co, no umulopa wa kwa Yesu uwapongolwelwe ilyo afwile, na o waikeshe icipingo cipya.

Ni Bani Balyako no Kunwa?

Pa kwishiba abalingile ukulyako ifimpashanya pa Cibukisho, tufwile ukwishiba umwalola icipingo cipya na babamo. Baibolo itila: “Moneni, inshiku shileisa, cisemo ca kwa Yehova, ilyo nkapinge cipingo cipya ku ba ng’anda ya kwa Israele . . . nkabika amalango yandi mu nda shabo, na mu mitima yabo e mo nkayalemba; kabili nkaba Lesa wabo, na bo bakaba abantu bandi . . . pantu nkabalekelela ku mampuulu yabo, ne membu shabo nshakashiibukishe kabili.”—Yeremia 31:31-34.

Ici cipingo cipya cilenga baba na bucibusa bwaibela na Yehova Lesa. Ukupitila muli ici cipingo, abantunse bamo basanguka abantu bakwe kabili na o aba Lesa wabo. Ifunde lya kwa Yehova lilembwa mu mitima yabo, na bashaba baYuda basembululwa kuti baba mu cipingo cipya na Lesa. (Abena Roma 2:29) Kalemba wa Baibolo Luka, alemba pa bufwayo bwa kwa Lesa ubwa ‘kupilibukila ku bena fyalo ku kubuulamo abantu abe shina lyakwe.’ (Imilimo 15:14) Ukulingana na 1 Petro 2:10, ‘kale tabali bantu, lelo nomba bantu ba kwa Lesa.’ Amalembo yasosa ulwa bene ati “Israele wa kwa Lesa,” uko e kuti Israele wa ku mupashi.  (Abena Galatia 6:16; 2 Abena Korinti 1:21) Kanshi icipingo cipya, cipingo Yehova Lesa apangana na Israele wa ku mupashi.

Pa bushiku bwa kupelako ukuba na basambi, Yesu na o apangene icipingo cimbi na bene. Abebele ati: “Ndepangana na imwe icipingo, ifyo na Tata apangana na ine icipingo ca bufumu.” (Luka 22:29) Ici cipingo ca Bufumu. Impendwa ya bantu abashapwililika ababa mu cipingo ca Bufumu ni 144,000. Ilyo babuushiwa ukuya ku muulu, bakayateka na Kristu nge shamfumu kabili bashimapepo. (Ukusokolola 5:9, 10; 14:1-4) E co, ababa mu cipingo cipya na Yehova Lesa baliba na mu cipingo ca Bufumu na Yesu Kristu. E balyako fye ifimpashanya fya Mulaalilo wa kwa Shikulu.

Bushe balya abalyako ifimpashanya pa Cibukisho beshiba shani ukuti balikwata bucibusa bwaibela na Lesa kabili baba ni mpyani shinankwe isha kwa Kristu? Paulo alondolola ati: “Umupashi [wa mushilo] wine ulashimika ubunte no mupashi wesu [amatontonkanyo yesu] ukuti tuli bana ba kwa Lesa. E co, kanshi, nga tuli bana, ninshi tuli kabili impyani: e kuti impyani sha kwa Lesa, lelo impyani shinankwe isha kwa Kristu, kulila fye twaculila pamo nankwe pa kuti no kucindamikwa tukacindamikilwe pamo nankwe.”—Abena Roma. 8:16, 17.

Lesa abomfya umupashi wa mushilo, nelyo amaka ku kusuba abakateka pamo na Kristu. Ici cibapeela ubushinino bwa kuti baba ni mpyani sha Bufumu. Cilenga Abena Kristu basubwa bakwata isubilo lya kuya ku muulu. Bamona fyonse ifyo Baibolo yalanda pa bumi bwa mu muulu ukuti filanda pali bene. Na kabili balaitemenwa ukuipusula fyonse ifya pa calo ukusanshako fye no bumi bwa pe sonde ne fibusa na balupwa. Nangu ca kuti Abena Kristu basubwa baleshiba ukuti ubumi muli Paradaise wa pe sonde bukawama sana, tabenekela ubu bumi. (Luka 23:43) Balikwata isubilo lishaluka te pa mulandu wa fisambilisho fya bufi, lelo, ni co umupashi wa kwa Lesa waba pali bene. E co, calilinga kuli bene ukulyako ifimpashanya pa Cibukisho.

Tutile umuntu tashininkishe sana nga ca kuti aba mu cipingo cipya na mu cipingo ca Bufumu. Ni shani nga ca kuti takwete no bunte bwa mupashi wa kwa Lesa ubwa kuti ni mpyani inankwe iya kwa Kristu? Lyene kuti calubana kuli wene ukulyako ifimpashanya pa Cibukisho. Cine fye Lesa takatemwe nga ca kuti umuntu ku mufulo fye aicita kwati na o aliitwa ku kube mfumu nelyo shimapepo ku muulu ilyo ashaitwa.—Abena Roma 9:16; Ukusokolola 22:5.

Miku Inga Tulingile Ukusefya?

Bushe tufwile ukusefya imfwa ya kwa Yesu cila mulungu nelyo cila bushiku? Kristu atendeke Umulaalilo wa kwa Shikulu pa Bushiku bwa ca Kucilila, kabili pali ubu bwine bushiku e lyo bamwipeye apabula umulandu. Abena Israele balesefya Ica Kucilila limo pa mwaka, pa Nisani 14, ku kwibukisha ukulubulwa kwabo ukufuma mu busha mu Egupti. (Ukufuma 12:6, 14; Ubwina Lebi 23:5) E co, tufwile ukusefya imfwa ya kwa “Kristu ica kucilila cesu” limo pa mwaka, te cila mulungu nelyo cila bushiku. (1 Abena Korinti 5:7) Pa kusefya Umulaalilo wa kwa Shikulu, Abena Kristu bacita filya fine Yesu acitile ilyo atendeke umulaalilo.

E co, ni mwi yalola amashiwi ya kwa Paulo ayatila: “Ilyo lyonse mwalya uyu mukate no kunwena mu lukombo ulu, mubile mfwa ya kwa Shikulu, akasuke esa”? (1 Abena Korinti 11:26) Apa Paulo abomfeshe ishiwi ilyalola mu  kuti “lyonse nga,” nelyo “lyonse ilyo.” E co, alelanda ukuti lyonse ilyo Abena Kristu basubwa balyako ifimpashanya, bakulabila icitetekelo cabo mwi lambo lya cilubula ilya kwa Yesu.

Abena Kristu basubwa balebukisha imfwa ya kwa Kristu “akasuke akese.” Uku kusefya kukatwalilila mpaka Yesu akese ku kupokelela abasambi bakwe abasubwa mu muulu nga babuushiwa ku bumi bwa ku mupashi mu “kubapo” kwakwe. (1 Abena Tesalonika 4:14-17) Ici calingana na mashiwi Kristu aebele abatumwa bakwe aba cishinka 11 aya kuti: “Nga naya no kumupekanisha apa kwikala, nkesa kabili, no kumupokelela ku mwandi, ukuti uko nkaba e ko na imwe mukabe.”—Yohane 14:3.

Cacindama Shani Kuli Imwe?

Bushe tukabila ukulyako ku fimpashanya pa kuti ilambo lya kwa Yesu libombe pali ifwe no kupokelele ubumi bwa muyayaya? Iyo. Tapaba nangu pamo apo Baibolo ilangilila ukuti ilyo bakabushiwa pe sonde, abantu abaletiina Lesa pamo nga Noa, Abrahamu, Sara, Isaki, Rebeka, Yosefe, Mose, na Davidi bakalyako ifi fimpashanya. Lelo, bena pamo na bambi abafwaya ukwikala pe sonde ku ciyayaya bakalanga icitetekelo cabo muli Lesa na Kristu na mu fyo Yehova apeela Yesu ukuba ilambo lya cilubula. (Yohane 3:36; 14:1) Pa kukwata ubumi bwa muyayaya, na imwe mufwile ukuba ne citetekelo. Ukusangwako ku kwibukisha imfwa ya kwa Kristu kukamucinkulako ulwa bukulu bwe lambo kabili kukalenga imwe ukutasha sana pali cene.

Umutumwa Yohane akomaile pa bucindami bwe lambo lya kwa Yesu ilyo asosele ati: “Ndemulembela [mwe basubwa banandi] ifi fintu ukuti mwicita lubembu. Lelo, ngo muntu acita ulubembu, natukwata kaafwa kuli Shifwe, Yesu Kristu umulungami. Kabili wene e lambo lya kukonsolwela imembu shesu, kabili te shesu fye sheka lelo ne sha calo conse.” (1 Yohane 2:1, 2) Abasubwa kuti basosa ati ilambo lya kwa Yesu cikonsolwelo ca membu shabo. Lelo na kabili lilambo lya membu sha bantunse bonse, ilyalenga aba cumfwila ukuba ne subilo lya kwikala ku ciyayaya!

Bushe mukabako pa April 4, 2004, ku kwibukisha imfwa ya kwa Yesu? Inte sha kwa Yehova mu fifulo fyabo fyonse ifya kupepelamo, bakalaibukisha ici. Nga mwasangwako, mukamwenamo mu lyashi lya Baibolo ilyacindama sana. Mukacinkulwako ifyo Yehova Lesa na Yesu Kristu batucitila. Na kabili mukamwenamo lwa ku mupashi mu kulongana na bacindika sana Lesa na Kristu e lyo ne lambo lya cilubula ilya kwa Yesu. Ici cibukisho kuti calenga mwafwaisha sana ukupokelela icikuuku ca bupe fye ica kwa Lesa, icingalenga mwakwata ubumi bwa muyayaya. Mwileka icili conse cimucilikile. Mukasangweko kuli uku kusefya ukucindika no kutemuna Shifwe wa mu muulu Yehova Lesa.

[Icikope pe bula 5]

Imfwa ya kwa Yesu yalyampana ne nshila shibili umo ukutemwa kwalangilwa sana

[Icikope pe bula 6]

Umukate uushatutumuka no mwangashi fyaba fishibilo fyalinga ifya mubili wa kwa Yesu no mulopa uwabula ulubembu