“Fishapo Bukapyunga Bobe”

“Ulefikilisha imilimo yobe yonse.”—2 TIMOTE 4:5, Bible Wa Mushilo.

1, 2. Nangu line Abena Kristu bonse ni bakabila, cinshi Amalembo yeba baeluda ukucita?

BUSHE ni mwe bakabila ba Bufumu? Nga ni fyo muletasha Yehova Lesa pali ili shuko lishaiwamina. Bushe ni mwe baeluda mu cilonganino? Ili lishuko na limbi ilyo Yehova amupeela. Lelo, tatufwile ukulaba ukuti amasomo ya ku calo nelyo ukwishiba ukulanda bwino te filenga twafikapo ukubomba ubutumikishi nelyo ukuba bakangalila mu cilonganino. Yehova e utufishapo bwino bwino ku kubomba ubutumikishi. E lyo kabili, ni co abaume bamo aba muli ifwe balafikapo pa fifwaikwa ifyaba mu Malembo, e co bakwatila ishuko lya kuba bakangalila.—2 Abena Korinti 3:5, 6; 1 Timote 3:1-7.

² Abena Kristu baipeela bonse balabomba umulimo wa bukabila. Lelo bakangalila, nelyo baeluda, bafwile ukucila napo ukuba ifya kumwenako fisuma mu kubomba ubutumikishi. Baeluda “ababombesha mu kulanda no kusambilisha” balamonwa kuli Lesa na Kristu, e lyo na kuli baNte banabo. (1 Timote 5:17; Abena Efese 5:23; AbaHebere 6:10-12) Ifyo eluda alesambilisha, lyonse filingile ukukuula bambi lwa ku mupashi, pantu umutumwa Paulo aebele Timote, kangalila ati: “Ikese nshita ilyo bakaleka ukukonka isambilisho ilituntulu, lelo, umwabela ifya lunkumbwa fyabo abene, bakailonganikila bakasambilisha aba kubapeepula amatwi; kabili bakatalusha amatwi yabo ku cine, no kuyalwila ku malyashi ya bufi. Lelo iwe ube uwatekanya mu fintu fyonse, cula ku bubi, bombo mulimo wa bukabila bwa mbila nsuma, fishapo bukapyunga bobe.”—2 Timote 4:3-5.

3. Cinshi cilingile ukucitwa pa kuti ifisambilisho fya bufi fionaula bumupashi bwa cilonganino?

³ Pa kuti ifisambilisho fya bufi tafyonawile bumupashi bwa cilonganino, kangalila alingile ukukonka ukufunda kwa kwa Paulo ukwa kuti: “Mu fintu fyonse uletekanya, . . . ulefikilisha imilimo yobe yonse.” (2 Timote 4:5, Bible wa Mushilo) Ca cine, eluda alingile ‘ukufishapo bukapyunga bwakwe.’ Afwile ukucita fyonse bwino bwino. Eluda uufishapo ubutumikishi bwakwe alangwa sana ku milimo yakwe yonse, talekelesha imilimo imo nelyo ukuibomba fye patali patali. Umuntu wa musango yo wa cishinka na mu tunono.—Luka 12:48; 16:10.

4. Cinshi cingatwafwa ukufishapo ubutumikishi?

⁴ Pa kufishapo ubutumikishi bwesu, te lyonse tukabila inshita na imbi, ico tukabila, kubomfya bwino inshita. Ukwakanya bwino inshita no kubomba lyonse kuti kwa-afwa Abena Kristu bonse ukubomba imilimo iingi mu butumikishi. Pa kuti abombe inshita iikalamba mu butumikishi, eluda alingile ukutantika bwino ifintu pa kuti eshibe ifyo engabombelapo ne fyo engeba bambi ukubomba e lyo ne fyo engacite fyo. (AbaHebere 13:17) Eluda uucindikwa ni ulya uubombako imilimo, nga filya Nehemia alecita, uwalekuulako ilyo balekuula cipya cipya ifibumba fya Yerusalemu. (Nehemia 5:16) Na babomfi bonse aba kwa Yehova bafwile ukubombako lyonse umulimo wa kubila Ubufumu.—1 Abena Korinti 9:16-18.

5. Bushe tulingile ukumona shani ubutumikishi?

⁵ Mwandini uyu mulimo twapeelwa uwa kubila Ubufumu bwaimikwa mu muulu ulatuletele nsansa! Cine fye twalicindika ishuko lyesu ilya kushimikila imbila nsuma mwi sonde lyonse ilyo impela ishilaisa. (Mateo 24:14) Nangu ca kuti tatwapwililika, amashiwi ya kwa Paulo kuti yatukoselesha ayatila: “Tuli ne cuma ici [ica butumikishi] mu fipe fye bumba, ukuti amaka yacila aya lyonse yabe aya kwa Lesa kabili te yantu yafuma kuli ifwe.” (2 Abena Korinti 4:7) Ca cine, kuti twabomba umulimo uusuma—lelo ni Lesa fye e wingatupeela  amaka na mano ya kucite co.—1 Abena Korinti 1:26-31.

Ukubeeka Ubukata bwa kwa Lesa

6. Bupusano nshi bwaishilebapo pali Israele wa cifyalilwa na Israele wa ku mupashi?

⁶ Pa lwa Bena Kristu basubwa, Paulo atile, Lesa ‘alitufishapo bwino bwino ku kuba bakapyunga ba cipingo cipya.’ Umutumwa acilanya icipingo cipya ico Lesa apangene na Israele wa ku mupashi ukupitila muli Yesu Kristu ne cipingo ca Malango ico apangene na bena Israele ba cifyalilwa ukupitila muli Mose. Paulo alundapo ati ilyo Mose afumine pa Lupili lwa Sinai ne fipaapatu fibili apalembelwe Amafunde Ikumi (10), icinso cakwe calebengeshima ica kuti abena Israele balefilwa ukulolekesha pa cinso cakwe. Mu kupita kwa nshita, icintu cimo icaibela calicitike pantu “amatontonkanyo yabo yalitalamikwe” ne cifimbo cafimbile pa mitima yabo. Lelo, ilyo babwelela kuli Yehova ku kumupepa ne mitima yabo yonse, icifimbo calefimbulwa. Paulo nomba alanda pa butumikishi bwa baba mu cipingo cipya ilyo asosa ati: ‘Ifwe bonse, . . . tubeeka nga mu cilola ubukata bwa kwa Yehova ku menso ayafimbulwa.’ (2 Abena Korinti 3:6-8, 14-18; Ukufuma 34:29-35) “Impaanga shimbi” isha kwa Yesu pali leelo shalikwata ishuko lya kubeeka ubukata bwa kwa Yehova.—Yohane 10:16.

7. Bushe abantunse kuti babeeka shani ubukata bwa kwa Lesa?

⁷ Bushe abantunse abashapwililika kuti babeeka shani ubukata bwa kwa Lesa, ilyo takuli umuntu uwingamona icinso ca kwa Lesa no kuba no mweo? (Ukufuma 33:20) Kwena, ukusansha pa bukata bwa kwa Yehova, kwaliba no bufwayo bwakwe ubwakatama ubwa kwebela bumulopwe bwakwe ukupitila mu Bufumu bwakwe. Icine icayampana no Bufumu caba pa “fyapuulama fya kwa Lesa,” ifyo balya abapokelele umupashi wa mushilo pa Pentekoste wa mu 33 C.E. batendeke ukubila. (Imilimo 2:11) Umupashi walibaafwile ukufishapo ubutumikishi bapeelwe.—Imilimo 1:8.

8. Cinshi Paulo apampamine ukucita pa butumikishi?

⁸ Paulo apampamine pa kukanaleka icili conse ukumucilikila ukufishapo bukapyunga bwakwe. Alembele ati: “E ico, pa kuba na bukapyunga ubu umwabela uluse ulwacitiilwe ifwe, tatunenuka; Lelo natukaana ifya bucenjeshi ifya nsoni, tuli abashenda mu bucenjeshi, nangu ukukowesha icebo ca kwa Lesa, lelo pa kulenga icine ukwishibikwa tuli abaishininkisha kuli kampingu wa muntu onse ku menso ya kwa Lesa.” (2 Abena Korinti 4:1, 2) Icine cileshibikwa no lubuuto lulabalika ukufika ukutali ukupitila mu mulimo Paulo aita ati “bukapyunga ubu.”

9, 10. Bushe kuti twacita shani pa kuti tubeeke ubukata bwa kwa Yehova?

⁹ Paulo alanda pa Ntulo ya lubuuto e lyo no lubuuto lwa ku mupashi. Alemba ati: “Lesa e watile: ‘Ulubuuto nalubalike ukufuma mu mfifi,’ kabili alibalikila mu mitima yesu ku kuibuutusha no bukata bwa kwishiba Lesa ku cinso ca kwa Kristu.” (2 Abena Korinti 4:6; Ukutendeka 1:2-5) Apo twalipeelwa ili shuko lishaikulila ilya kuba bakapyunga ba kwa Lesa, natube aba busaka, pa kuti tulebeeka ubukata bwa kwa Yehova nge filola.

 ¹⁰ Ababa mu mfifi ya ku mupashi te kuti bamone ubukata bwa kwa Yehova nelyo ukubeeka kwa buko ukufuma kuli Yesu Kristu, Mose Mukalamba. Lelo, nga babomfi ba kwa Yehova, tulapokelela ulubuuto lwa bukata ulufuma mu Malembo kabili tulabeeka kuli bambi. Ababa mu mfifi ya ku mupashi pali nomba balakabila ulubuuto ukufuma kuli Lesa pa kuti bakapusuke ubonaushi. E co, tulacankwa kabili tulapimpa ukumfwila ifunde lya kwa Lesa ilya kuti tulenge ulubuuto lwesu ukubalika mu mfifi pa kuti tucindike Yehova.

Lengeni Ulubuuto Lwenu Lubalike pa Masambililo ya Baibolo aya pa Nga’anda

11. Cinshi Yesu asosele pa lwa kuleka ulubuuto lwesu ukubalika, kabili ni nshila nshi imo iyo tucitilamo ici mu butumikishi bwesu?

¹¹ Yesu aebele abakonshi bakwe ati: “Muli lubuuto lwa pano calo. Umusumba te kuti ufisame nga wabela pa muulu wa lupili. Abantu tabasanika inyali no kuikupikila mu museke, lelo baiteka pa ca kutekapo inyali, na yo yasanikila bonse abali mu ng’anda. Ifyo fine na imwe lekeni ulubuuto lwenu lubalikile ku cinso ca bantu, pa kuti bamone imilimo yenu iisuma no kucindika Shinwe uwaba mu muulu.” (Mateo 5:14-16) Imyendele yesu iisuma kuti yalenga bambi ukucindika Lesa. (1 Petro 2:12) Kabili inshila ishingi isho tubombelamo ubutumikishi bwesu kuti shatupeela amashuko ayengi aya kulenga ulubuuto lwesu ukubalika. Cimo ico tufwaisha sana kubeeka ulubuuto lwa ku mupashi ulufuma mu Cebo ca kwa Lesa pa kutungulula bwino amasambililo ya Baibolo aya pa ng’anda. Iyi ni nshila imo iisuma iyo tufishishapo bukapyunga bwesu. Finshi fingatwafwa ukufika abafwaya icine pa mitima ilyo tuletungulula amasambililo ya Baibolo?

12. Bushe ipepo lyayampana shani no mulimo wa kutungulula amasambililo ya Baibolo pa ng’anda?

¹² Ukupepa kuli Yehova pali ici, kulangilila ukuti tulafwaisha ukutungulula amasambililo ya Baibolo. Na kabili cilangililo ca kuti tulamona ubucindami bwa kwafwa bambi ukwishiba icine pali Lesa. (Esekiele 33:7-9) Yehova akaasuka amapepo yesu kabili akapaala ukubombesha kwesu mu butumikishi. (1 Yohane 5:14, 15) Lelo tatupepela fye ukuti tusange uo twingatungulula isambililo lya Baibolo pa ng’anda. Ilyo twatendeka ukusambilila no muntu, ukupepa no kwetetula pa fyo umusambi wa Baibolo alekabila kukatwafwa ukutungulula bwino isambililo limo na limo.—Abena Roma 12:12.

13. Cinshi cingatwafwa ukutungulula bwino amasambililo ya Baibolo aya pa ng’anda?

¹³ Pa kuti tutungulule bwino amasambililo ya Baibolo, tufwile ukupekanya bwino isambililo limo na limo. Nga twamona kwati tatufikilepo sana, kuti cawama twalamona ifyo kangalila we Sambililo lya Citabo pa Cilonganino atungulula isambililo cila mulungu. Limo kuti twabombako na bakabilia ba Bufumu abatungulula bwino amasambililo ya Baibolo. Lelo kwena, tufwile ukwangwa sana ku mibele e lyo ne misambilishishe ya kwa Yesu Kristu.

14. Kuti twafika shani umusambi wa Baibolo pa mutima?

¹⁴ Yesu alebekelwa ukucita ukufwaya kwa kwa Wishi no kulanda na bambi pali Lesa. (Amalumbo 40:8) Ali uwafuuka kabili alefika pa mitima ya balekutika. (Mateo 11:28-30) E co, natubombeshe ukufika pa mitima ya basambi besu aba Baibolo. Pa kuti tucite co, tufwile ukulatontonkanya pa fyo umusambi aba ilyo tulepekanya isambililo limo na limo. Ku ca kumwenako, nga ca kuti afuma uko bashasumina muli Baibolo, tufwile ukulenga ashininwa ukuti Baibolo ya cine. Nga ashininwa, kwena tukakabila ukubelenga amalembo ayengi no kulondolola umo yalolele.

Afweni Umusambi Ukumfwikisha Ifilangililo

15, 16. (a) Bushe kuti twa-afwa shani umusambi uushumfwile umo icilangililo cibomfiwe muli Baibolo cilolele? (b) Kuti twacita shani nga ca kuti ulupapulo lwesu lwabomfya icilangililo icakosela umusambi wa Baibolo umo ukuumfwa?

¹⁵ Umusambi wa Baibolo napamo te kuti  eshibe icilangililo cibomfiwe mu Malembo. Ku ca kumwenako, napamo te kuti eluke umo Yesu aloseshe ilyo alandile pa kubike nyali pa ca kutekapo. (Marko 4:21, 22) Yesu alelanda pa nyali sha kale isha mafuta ishakwete intambo iyaleaka. Inyali sha musango yo baleshibika pa ca kutekapo pa kuti shisanike bwino mu ng’anda. Ukusokota ifyalandwa pa nyali ne ca kutekapo inyali mu mpapulo shesu isha Bwina Kristu kuti kwakabilwa pa kuti icilangililo ca kwa Yesu cumfwike bwino bwino. Lelo, kwena cilawama sana ukuya kwi sambililo no bulondoloshi ubo umusambi engomfwa no kuipakisha!

¹⁶ Mu lupapulo tubomfya pa kusambilia Baibolo napamo kuti mwaba icilangililo icingakosela umusambi umo ukuumfwa. Londololeni mu mutekatima, nelyo bomfyeni icilangililo cimbi icingalangilila icishinka cimo cine. Tutile ulupapulo lulekomaila pa cishinka ca kuti umulume nelyo umukashi musuma e lyo no kubombela pamo fyalicindama mu cupo. Ku kulangilila ici, ulupapulo napamo kuti lwalanda pa mwaume uupeluka pali filya abamangalo bapelukapo no kupilibuka mu muulu, e lyo alekela ku ntambo, no kwenekela umubiye ukumwanka. Icilangililo cimbi mwingalandapo ku kulangilila ici, ca fyo ababomfi bekatana no kubombela pamo ilyo balepeleshanya ifibokoshi balepatula mu bwato.

17. Finshi twingasambilila kuli Yesu pa lwa filangililo?

¹⁷ Tukabila ukupekanishisha kabela pa kuti tubomfye icilangililo cimbi. Na kuba, e nshila tulangilamo ukuti twalipoosako amano ku musambi wa Baibolo. Yesu abomfeshe ifilangililo fyayanguka ku kulondolola ifishinka ifyakosa. Ilyashi lyakwe ilya pa Lupili litulanga fimo pali ifi kabili Baibolo ilangilila ukuti imisambilishishe yakwe yalifikile abalekutika pa mitima. (Mateo 5:1–7:29) Yesu aletekanya pa kulondolola ifintu pantu alitemenwe bambi.—Mateo 16:5-12.

18. Cinshi twakoseleshiwa ukucita pa lwa malembo yaba mu mpapulo shesu?

¹⁸ Ukwangwa bambi kukatucincisha ‘ukupelulushanya mu Malembo.’ (Imilimo 17:2, 3) Pa kucite co, tukabila ukubelenga sana, ukupepa no kubomfya bwino impapulo “kangalila wa cishinka” atupekanishisha. (Luka 12:42-44) Ku ca kumwenako, mu citabo ca Ukwishiba Uko Kutungulula ku Mweo wa Muyayaya mwaliba amalembo ayengi. * Pa mulandu wa ncende ukucepa, amashiwi yaba pa malembo yamo taya-ambulwa. Ilyo muli pe sambililo lya Baibolo, calicindama ukubelenga no kulondolola amalembo ayengiko ayasha-ambulwa. Na kabushe ifyo tusambilisha fifuma mu Cebo ca kwa Lesa, e lyo calikwatisha amaka. (AbaHebere 4:12) Landeni pali Baibolo mwi sambililo lyonse, no kukomaila pa malembo yali mu maparagrafu. Afweni umusambi ukumona ifyo Baibolo isosa pa mulandu umo nelyo imicitile. Pampamineni pa kumulanga ifyo akamwenamo mu kuumfwila Lesa.—Esaya 48:17, 18.

Ipusheni Amepusho ya Kulenga Ukutontonkanya

19, 20. (a) Cinshi tulingile ukubomfesha amepusho ilyo tuletungulula isambililo lya Baibolo pa ng’anda? (b) Cinshi cingacitwa nga ca kuti ico twalanshanyapo cilekabila ukulandwapo sana?

¹⁹ Yesu aleafwa abantu ukutontonkanya pantu  alebomfya bwino amepusho. (Mateo 17:24-27) Nga twaipusha ifyo umusambi wa Baibolo aishiba pa cintu cimo ukwabula ukumumfwisha insoni, ubwasuko bwakwe bukalenga twaishiba ifyo atontonkanya pa co tulelandapo. Kuti twasanga ukuti acili alisumina muli fimo ifishumfwana na malembo. Ku ca kumwenako, napamo kuti alisumina ukuti Lesa Abamo Batatu. Mu cipandwa 3, icitato ca Ukwishiba cilanda ukuti amashiwi ya kuti ‘Lesa Abamo Batatu’ tayabamo mu Baibolo. Icitabo cilambula amalembo no kulumbula yamo ayalanga ukuti Yehova na Yesu balipusana no kuti umupashi wa mushilo maka ya kwa Lesa ayabomba, te muntu iyo. Ukubelenga no kulondolola aya malembo ya mu Baibolo, kuti kwalenga umo ukushininwa. Lelo, ni shani nga ca kuti ico tacikumanine? Napamo pa numa ye sambililo lyakonkapo, kuti twafwayako inshita ya kulanshanya pali uyu mulandu nga fintu walondololwa mu mpapulo sha Nte sha kwa Yehova, pamo nga broshuwa wa Bushe Ulingile Ukusumina Muli Bulesa Butatu? Lyene kuti twabwelela kwi sambilililo mu citabo ca Ukwishiba.

²⁰ Tutile ubwasuko bwa musambi bwatupapusha nelyo ayasuka ifyo tushile-enekela. Nga ca kuti tulelanshanya pa kupeepa fwaka nelyo pali fimbi ifingalenga akalipa bwangu, tufwile ukumweba ukuti tutwalilile ukusambilila e lyo tukalanshanye pali uyu mulandu inshita imbi. Ukwishiba ukuti umusambi acili alapeepa kuti kwatwafwa ukufwaya ifyebo ifyalembwa ifingamwafwa ukulunduluka lwa ku mupashi. Ilyo tulebombesha ukufika pa mutima wa musambi, kuti twapepa ukuti Yehova amwafwe ukukula lwa ku mupashi.

21. Cinshi cingacitika nga ca kuti twalasambilisha umusambi wa Baibolo ukulingana no kukabila kwakwe?

²¹ Ukupekanya bwino e lyo no kwafwa kwa kwa Yehova, ukwabula no kutwishika kukatwafwa ukusambilisha umusambi wa Baibolo ukulingana no kukabila kwakwe. Mu kupita kwa nshita, kuti twamwafwa ukutemwa sana Lesa. Na kabili kuti twamwafwa ukutendeka ukucindika no kutasha ukuteyanya kwa kwa Yehova. Kabili fintu ciwama ilyo abasambi ba Baibolo basumina ukuti ‘Lesa aba muli ifwe cine cine’! (1 Abena Korinti 14:24, 25) E co, shi natuletungulula amasambililo ya Baibolo no kubombesha ukwafwa bambi ukuba abasambi ba kwa Yesu.

Icuma Ico Tufwile Ukukatamika

22, 23. Finshi fikabilwa pa kuti tufishepo bukapyunga bwesu?

²² Pa kuti tufishepo bukapyunga bwesu, tufwile ukushintilila pa maka Lesa atupeela. Ukulosha ku butumikishi, Paulo alembeele Abena Kristu, abasubwa banankwe ati: “Tuli ne cuma ici mu fipe fye bumba, ukuti amaka yacila aya lyonse yabe aya kwa Lesa kabili te yantu yafuma kuli ifwe.”—2 Abena Korinti 4:7.

²³ Nampo nga twalisubwa nelyo tuli “mpaanga shimbi” twaba nge fipe fye bumba ifishakosa. (Yohane 10:16) Na lyo line Yehova kuti atupeela amaka tukabila pa kuti tubombe imilimo yesu te mulandu na mafya tukwata. (Yohane 16:13; Abena Filipi 4:13) E co, natucetekele Yehova umupwilapo, tukatamike ubutumikishi no kufishapo bukapyunga bwesu.

[Futunoti]

Kuti Mwayasuka Shani?

• Bushe baeluda kuti bacita shani pa kuti bafishepo bukapyunga bwabo?

• Bushe kuti twawamya shani imitungulwile yesu iya masambililo ya Baibolo?

• Cinshi mwingacita nga ca kuti umusambi wa Baibolo tomfwile umulolele icilangililo nelyo alekabila ifyebo na fimbi pali fimo ifyo mwacilanshanyapo?

[Amepusho]

[Icikope pe bula 16]

Baeluda ba Bwina Kristu balafunda mu cilonganino no kukansha abasumina banabo mu butumikishi

[Icikope pe bula 18]

Ukutungulula bwino amasambililo ya Baibolo aya pa ng’anda ni nshila imo iya kulenga ulubuuto lwesu ukubalika