Ukuyemba Kwa Bubumbo Bwa Kwa Yehova

‘Muli Bakankaala Ukucila Impili’

UKUTAMBA uko akasuba kaletula pa muulu wa Lupili lwa Fuji, cintu ico umo ashingalaba. Akasuba kakashika katulila pa cifutu ce sonde, ukusanika pa mfula yabuuta na pa mabwe ya matipa ayafuma mu lupili. Ilyo ubushiku bumbi buletendeka, icinshingwa ca lupili cafimba utupili ne mikonko ukufika ukutali.

Ubukulu kwa mpili bulatupapusha, nga filya Ulupili lwa Fuji—ulwalembelwe mu fishibilo ifipilibula “Ulwacila shonse” lutupapusha. Ala, shalikulisha ica kuti tatwingailinganyako! Ubukulu bwa mpili bwalenga abengi ukusumino kuti pa nsunsu shalepesha, ilingi line apakupwa no mume na makumbi, e po balesa baaleikala.

Lesa uufwile ukulumbanishiwa pali ishi mpili shalepesha, ni Yehova, Kabumba walamuka. Wene fye eka e ‘kabumba wa mpili.’ (Amose 4:13) Nga kwakanya isonde mu fiputulwa fine, ninshi mupepi ne ciputulwa cimo ni mpili fye shabamo. Kabili lintu Lesa abumbile isonde, abikilemo amaka ayo mu kupelako yaishileletako impili shalepesha. (Amalumbo 95:4) Ku ca kumwenako, caishibikwo kuti impili shatantama isha Himalayas na Andes shapangilwe ilyo kwali ukutenkana kwe sonde no kusuunkana kukalamba mu kati na nkati ka liko.

Fwe bantu tatuumfwikisha ifyo impili shaishileko no mulandu shabelako. Ca cine, te kuti twasuke amepusho Yehova aipwishe Yobo umulungami aya kuti: “Wali kwi ilyo [Yehova] nashimpile icalo? . . . Ni pa cintu nshi amashinte ya ciko yashimpilwe?”—Yobo 38:4-6.

Na lyo line, twalishiba ukuti impili shilatungilila ubumi bwesu. Shainikwa ati intulo ya menshi pantu imimana yonse iikalamba yatula mu mpili kabili hafu wa bantu pe sonde bashintilila pa menshi ayafuma mu mpili. (Amalumbo 104:13) Magazini wa New Scientist, atila: “pa mabala ya fya kulya 20 ayakalamba sana pano isonde lyonse, 6 yaba mu mpili.” Lintu ifintu fyonse fikaba bwino mwi sonde lipya ilya kwa Lesa ilyo alaya, ‘mukaba ukupaka kwa ngano mu calo, na pa muulu wa mpili.’—Amalumbo 72:16; 2 Petro 3:13.

Nga mwalanda pa mpili, abengi bebukisha impili sha ku Bulaya isha Alps. Ishi mpili, ukusanshako no lupili lwa Civetta ululangilwe pano, shaba bushininkisho busuma ubwa kuti kwaliba Kabumba. (Amalumbo 98:8) Shilalumba Yehova ‘uwapampamike mpili ku maka.’—Amalumbo. 65:6. *

Ukuyemba kwa mpili sha Alps, ifyo amenshi makasa yakupa impili no tupili twa shiko, ifyo imfula yabuuta ikupa umukunkuluko wa mpili, imipokapoka ya shiko ne mimana e lyo ne nika, ala mwandini fya kupapusha. Imfumu Davidi yalondolwele Yehova ukuti e “ulenge mpili ukumesho mulemfwe.”—Amalumbo 147:8.

Impili shatantama—nge shi mpili sha Guilin, ku China—limbi te kuti shimoneke ishayemba sana nge impili sha Alps, lelo na sho shine shaliyemba mu nshila yaibela. Impili  shakonkana mu mbali ya Mumana wa Li, ishasompa shilatemuna abatandashi abengi pa mulandu wa kuyemba kwa shiko. Ukulolesha amenshi yalengama yalekonkoloka ukupita mu mpili kuti kwalenga umo ukutontonkanya pa mashiwi ya kwa kemba wa malumbo uwatile: “E utuma [Yehova] aya mu tumfukumfuku yaye imimana, mu kati ka mpili e mo ipita.”—Amalumbo 104:10.

Tulacincimushiwa nga nshi no kuyemba kwa mpili pa mulandu wa kwishibo kuti Kabumba wakwata ukutemwa e washibumba pa kuti tuleipakisha. Lelo, nangu line impili shaba isha kutiinya, ubukulu bwa shiko te kuti bulingane no bukulu bwa kwa Yehova. Ca cine wa ‘kutiinya ukucila impili.’—Amalumbo 76:4.

[Futunoti]

[Akabokoshi ne Cikope pe bula 9]

Amapesenti 10 aya bantu ababa pe sonde bekala mu fifulo fyaba mu mpili. Lelo ico tacaba cipindami cakulisha kuli abo abashimikila imbila nsuma ya Bufumu bwa kwa Lesa. Aba batumikishi ba Bwina Kristu balabombesha mu fifulo ifingi ifyaba mu mpili. Kabili “ifyo yayemba pa mpili amakasa ya kwa kabila, uulengo kuumfwe fya mutende, uubile mbila nsuma, uulengo kuumfwo kupususha.”—Esaya 52:7.

Kemba wa malumbo aimbile ati: “Impili ishasansama sha mbushi sha mpanga.” (Amalumbo 104:18) Imbushi sha mpanga, nga shilya shakwata insengo ishitali ishitwa Nubian ibex, shaba pa nama ishakwata amolu ayashansha ishikala mu mpili. Shilenda pa mabwe ayacepesha ayatwa ayamoneka kwati teti shipitepo. Ishi mbushi shaliipangasha ukwikala mu fifulo umushingafika abantu. Icasangwilako mulandu wa fyo ifibondo fyapangwa. Umwapandukila ifibondo mulatanunuka ku mulandu wa kufina kwa mbushi, ukuilenga ukushansha ilyo yaiminina nangu ilyo ileenda pa fipandwa fya mabwe ifyacepesha. Cine cine iyi mbushi iitwa ibex yaba pa fyabumbwa ifya kusungusha!

[Icikope pe bula 9]

Ulupili lwa Fuji, ku Honshu, mu Japan