Ukusefya Ukwamukuma

ILYO Yesu Kristu ali pe sonde atendeke ukusefya ukucindika Lesa. Uku e kusefya kweka fye ukwa mipepele uko akonkomeshe abakonshi bakwe ukusefya. Kwali Mulaalilo wa kwa Shikulu.

Elenganyeni ukuti mulemonako Ifilecitika ilyo inshita ya uku kusefya ileya ilepama. Yesu na bakonshi bakwe nabalongana mu muputule wa pa muulu mu Yerusalemu ku kusefya ica Kucilila ica baYuda. Bapwa ukulya ica kulya balelya lyonse pa ca Kucilila. Pali uku kusefya balelya impanga iyaocewa, imisalu iyalula, umukate uushatutumuka no kunwa umwangashi wakashika. Yuda Iskariote umusambi uushali uwacishinka nabamutamfya kabili mu kwangufyanya alafutuka Shikulu wakwe. (Mateo 26:17-25; Yohane 13:21, 26-30). Yesu ashala eka na basambi bakwe aba cishinka 11. Mateo na o epo ali.

Ukulingana ne calembwa ca kwa Mateo uwamweneko, ifi e fyo Yesu atendeke Umulaalilo wa kwa Shikulu: “Yesu abuulile umukate [umukate uushatutumuka], kabili ilyo apaalile, aliumokawile, no kupeela abasambi, ati: ‘Buuleni ,mulye. Uyu mubili wandi.’ Kabili abuulile ulukombo [umwangashi], kabili ilyo atootele, alibapeele, ati: ‘Nwenimo imwe bonse; pantu lwene ‘mulopa wandi uwa cipingo,’ uulesuumina pa mulandu wa bengi ku kulekelelwa imembu.’”—Mateo 26:26-28.

Mulandu nshi Yesu abikileko uku kusefya ukwa Mulaalilo wa kwa Shikulu? Lintu alesefya, mulandu nshi abomfeshe umukate uushatutumuka no mwangashi wakashika? Bushe bonse abakonshi ba kwa Kristu bali no kulyako ifi fimpashanya? Miku inga uku kusefya kulingile ukucitwa? Na kabili bushe kwalicindama kuli imwe?