Amepusho Ukufuma ku Babelenga

Mulandu nshi Baibolo pali 1 Abena Korinti 10:8 isosela ati abena Israele 23,000 bawile mu kasuba kamo pa mulandu wa kucito bulalelale, ilyo pa Impendwa 25:9 pena yatila bali 24,000?

Kwaba imilandu iingi iilenga ukuti ishi mpendwa ishaba mu fikomo fibili shipusane. Umulandu umo uwa-anguka kuti waba wa kuti impendwa yaba pa kati ka 23,000 na 24,000, ne ci kuti calenga umuntu ukuilanda fye mu cipendo cakumanina, e kutila 23,000 nelyo 24,000.

Moneni umulandu na umbi. Umutumwa Paulo alandile pa fyacitikile abena Israele pa Shitimu ukuti kusoka ku Bena Kristu aba mu Korinti wa pa kale, umusumba uwaishibikilwe kuli bucisenene. Alembele ati: “Kabili twilacita bulalelale, filya bamo aba muli abo bacitile, na mu kasuba kamo aba muli bene bawile amakana amakumi yabili na yatatu (23,000).” Ukufumyako abaipaiwe na Yehova pa mulandu wa kucito bulalelale, Paulo atile impendwa yali 23,000.—1 Abena Korinti 10:8.

Lelo, mu Impendwa icipandwa 25, Baibolo itweba ati “Israele aliilundila kuli Baali-peore: no bukali bwa kwa Yehova bwaimiine Israele.” Lyene Yehova aebele Mose ukwipaya “bakasomo bonse ba aba bantu.” Mose na o aebele abapingushi ukucita ifyo Yehova amwebele. Mu kulekeleshako, ilyo Finehasi aipeye umwina Israele uwaletele umwanakashi umwina Midiani mu nkambi, ‘caliputwike icikuko.’ Icalembwa calekelesha na ya mashiwi: “Kabili abafwa ku cikuko bali amakana amakumi yabili na yane [24,000].”—Impendwa 25:1-9.

Kanshi impendwa yaba mwi buuku lya Impendwa isanshamo “bakasomo bonse ba aba bantu” abo abapingushi baipeye lyene na bo Yehova umwine akandile. Ukwabula no kutwishika bakasomo ba bantu abaipaiwe na bapingushi bali 1,000, ne mpendwa ninshi yaba 24,000. Nampo nga aba bakasomo, nelyo bacumyalutwe, bacitile ubucende, ukusefyako imitebeto, nelyo basuminishe fye abacitile ifyo, bali no mulandu wa ‘kuilunda kuli Baali-peore.’

Icitabo cimo icilanda pali Baibolo calondolola ukuti ishiwi “aliilundila” lyalola mu “kutemwa sana umuntu.” Abena Israele bali-ipeele kuli Yehova, lelo ilyo ‘bailundile kuli Baali-peore,’ baipaatwile kuli bucibusa bwabo na Lesa. Ilyo papitile imyaka 700, ukupitila muli Hosea, Yehova atile ku bena Israele: “Bene baishile ku Baali-peore, e lyo baipaatwilile kuli Baali wa Nsoni, no kube ca makankamike nge co batemenwe.” (Hosea 9:10) Calilingile ukuti bonse abacitile ifyo bakandwe na Lesa. E mulandu wine Mose acinkwilile abana ba kwa Israele ukuti: “Amenso yenu yamona ico Yehova acitile mu Bete-peore; pantu abaume bonse abaile ku numa ya kwa Baali-peore, Yehova Lesa wenu alibafitile ukubafumya mu kati ka imwe.”—Amalango 4:3.