Bushe Muletonta pa Cilambu?

UBULWELE buleya bulekoselako fye. Bwasuka bwalenga umuntu aleka ukumwenesha. Nga ca kuti ubu bulwele tababundepe, umuntu kuti aleka ukumona kabili kuti asuka apofula. Bushe ubu, bulwele nshi? Ni Glaucoma, ubulwele bwalenga abengi ukupofula.

Nga fintu fye twingaya tulepofula panono panono lwa ku mubili, e fyo cingacitika na ku menso yesu ayacindamisha aya ku mupashi. Kanshi calicindama sana ukutangisha ifya ku mupashi.

Ukutonta Amenso pa Cilambu

Pa fintu “ifishimoneka” ku menso yesu paba ne cilambu cishaiwamina ica bumi bwa muyayaya, ico Yehova atambika ku ba cishinka kuli wene. (2 Abena Korinti 4:18) Kwena, umulandu uukalamba uulenga Abena Kristu ukubombela Lesa ni co balimutemwa. (Mateo 22:37) Lelo, Yehova afwaya ukuti tutonte amenso yesu pa cilambu. Afwaya ukuti tumwishibe ukutila ni Shifwe kapekape ‘uulambula abamufwaisha.’ (AbaHebere 11:6) E co, bonse abaishiba Lesa icine cine kabili abamutemwa, balacindamika amalayo yakwe kabili balafulukisha ukuti yakafishiwepo.—Abena Roma 8:19, 24, 25.

Abengi ababelenga Ulupungu lwa kwa Kalinda na Loleni!, balatemwa sana ukutamba ifikope fye sonde lya Paradaise ilikabweshiwa. Kwena, tatwaishiba bwino bwino ifyo Paradaise wa pe sonde ikalamoneka, kabili ifikope fyaba fye filangililo ifyumfwana na mashiwi ya mu Baibolo pamo nga yaba pali Esaya 11:6-9. Na lyo line, umwanakashi umo Umwina Kristu atile: “Nga namona ifikope fya Paradaise iikabweshiwa mu Ulupungu lwa kwa Kalinda na Loleni!, ndafibebeta sana, nga fintu fye umo engabeebeeta akatabo kalanda pa fifulo fyayemba. Ndelenganya ukuti ndi mulya pantu e mo nsubila ukuba pa nshita yalinga iya kwa Lesa.”

Umutumwa Paulo na o e fyo alemona ‘ubwite’ bwakwe ‘ubwa ku muulu.’ Talemona ngo wabunonka, pantu ali no kuba uwa cishinka ukufika na ku mpela. Lelo atwalilile ‘ukukonkelela ifya ku ntanshi.’ (Abena Filipi 3:13, 14) Yesu na o ashipikishe imfwa ya pa cimuti “pa mulandu wa kusekelela ukwabikilwe pa ntanshi yakwe.”—AbaHebere 12:2.

Bushe mwalitalatwishikapo nga mukengila mu calo cipya? Kwena caliwama ukukaanaishininkisha sana, pantu tukapokelela icilambu lyeka fye lintu twaba aba cishinka ukufika na ku mpela. (Mateo 24:13) Lelo, nga ca kuti tulebombesha apapela amaka yesu ukucita fyonse ifyo Lesa afwaya, kuti twashininkisha ukuti tukapokelela icilambu. Ibukisheni ukuti Yehova “tafwaya umuntu nangu umo ukonaulwa lelo afwaya bonse bafike ku kulapila.” (2 Petro 3:9)  Nga twacetekela Yehova akatwafwa ukufishapo ubuyo bwesu. Cine cine, Yehova tafwailisha ifilubo mu bantu abafwaisha ukumuteemuna pa kuti ebapeela icilambu.—Amalumbo 103:8-11; 130:3, 4; Esekiele 18:32.

Ukwishiba ifyo Yehova amona abantu bakwe kulatupeela isubilo—icintu icacindama nga nshi kwati fye ni fintu icitetekelo cacindama. (1 Abena Korinti 13:13) Ishiwi lya ciGriki ilyapilibulwa ati “isubilo” mu Baibolo lyalola mu “kwenekela ifintu ifisuma.” Ilyo aletontonkanya pali ili subilo, umutumwa Paulo alembele ati: “Tulefwaisha onse uwa muli imwe alange ukucincila kumo kwine ukuti mube abacetekela umupwilapo isubilo ukufika na ku mpela, pa kuti mwiba abanang’ani, lelo mube abapashanya abo abapyanina amalayo mu kutetekela na mu kutekanya.” (AbaHebere 6:11, 12) Moneni ukuti nga twatwalilila ukubombela Yehova mu cishinka, kuti twashininkisha ukuti isubilo lyesu likafishiwapo. Ukupusanako ne fya ku calo ifyo twingasubila, ili subilo “taliseebanya iyo.” (Abena Roma 5:5) E ico kuti twalenga shani isubilo lyesu ukuba ilya cine cine no kulalitontonkanyapo lyonse?

Ifyo Twingawamya Amenso Yesu Aya ku Mupashi

Amenso yesu tayengatonta pa fintu fibili pa nshita imo. Ifi fine e fyo caba na ku menso yesu aya ku mupashi. Ukulatontonkanya pa fintu ifya buno bwikashi kuti kwalenga twalabako ku malayo ya kwa Lesa aya calo cipya. Mu kupita kwa nshita, kuti twasuka twalabililako fye kuli yene. Mwandini ico kuti cabipa nga nshi! (Luka 21:34) Kanshi, calicindama ukusunga ‘ilinso lyesu ilituntulu’—ilitonta fye pa Bufumu bwa kwa Lesa na pa cilambu ca bumi bwa muyayaya!—Mateo 6:22.

Taca-anguka ukusunga ilinso ilituntulu. Amafya ya cila bushiku yafwaikwa ukubombelapo, kabili ifya kupumfyanya—nangu fye mesho—kuti fyatuponena. Ilyo ifi fyatucitikila, kuti twacita shani pa kuti tutwalilile ukulatontonkanya pa Bufumu na malayo ya kwa Lesa aya calo cipya ukwabula ukulekelesha ifintu fimbi ifyacindama? Natumone inshila shitatu.

Mulebelenga Icebo ca kwa Lesa cila bushiku. Ukubelenga Baibolo lyonse ne mpapulo ishilanda pali Baibolo kulatwafwa ukulatontonkanya pa fintu fya ku mupashi. Ca cine, nalimo twalibelenga Icebo ca kwa Lesa pa myaka iingi, lelo tulingile ukutwalilila ukucibelenga, kwati fye ni fintu tukabila ukulya ifya kulya lyonse pa kuti tube abomi. Tatuleka ukulya pa mulandu wa kuti twalilya ifya kulya ifingi nga nshi pa myaka iingi. E co te mulandu ne fyo twaishiba Baibolo, tukabila ukutwalilila ukuibelenga, cila bushiku ukulaliishiwa lwa ku mupashi pa kuti isubilo lyesu libe ilya cine cine ne citetekelo cesu no kutemwa fibe ifyakosa.—Amalumbo 1:1-3.

Etetuleni pa Cebo ca kwa Lesa mu kuba no kutasha. Mulandu nshi ukwetetula kwacindamina? Kwaba imilandu ibili. Uwa kubalilapo,  ukwetetula kutulenga ukumfwikisha ifyo twacilabelenga no kufitesekesha sana. Uwa cibili, ukwetetula kulatwafwa ukukaanalaba Yehova, imilimo yakwe iya kupapusha, ne subilo ilyo atulaya. Natulangilile: Abena Israele abo Mose afumishe mu Egupti bali-imwenene na menso yabo ifyo Yehova alangile amaka yakwe. Balimwene ne fyo alebacingilila mu kutemwa ilyo alebatungulula ku bupyani bwabo. Lelo, lintu bafikile fye mu matololo pa kuya ku Calo Calaiwe batendeke ukuilishanya, ukwalangilile ukuti tabakwete icitetekelo. (Amalumbo 78:11-17) Cinshi calengele?

Abantu balabile kuli Yehova na kwi subilo lishaiwamina ilyo abalaile no kutendeka ukuifwaila ifya bawamine ne fya ku mubili. Te mulandu ne fipesha amano ifyo baimwenene, abena Israele abengi tabali na citetekelo kabili batendeke ukuilishanya. Amalumbo 106:13 yatila: “Balaba bwangu imilimo [ya kwa Yehova].” Umulekelesha wa ilya nkulo uwabulo mwa kulesesha walengele ukuti ilya nkulo ifilwe ukwingila mu Calo Calaiwe.

E ico, ilyo mulebelenga Amalembo nelyo impapulo sha kwafwa ukusambilila Baibolo, muleshako inshita ya kwetetula. Uku kwetetula kwalicindama pa kuba abatuntulu no kukula lwa ku mupashi. Tutile, mulebelenga Amalumbo 106, ayambwilweko panono pa muulu, etetuleni pa fyo Lesa aba. Moneni ifyo atekeenye ne fyo ali no luse ku bena Israele. Moneni ifyo abacitiile pa kubafwa ukufika ku Calo Calaiwe. Moneni na fintu batwalilile ukumupondokela. Elenganyeni ubulanda Yehova ali na bo na fintu akalifiwe ilyo ukutekanya no luse lwakwe fyaeshiwe ukufikapo ku bantu bakose mitima kabili abashitasha. Lyene, ilyo mule-etetula pa fikomo Amalu 30 na 31, ifilanda pa kushipa kwa kwa Finehasi, no kukosa mu kucita icalungama, tulashininwa ukuti Yehova talaba aba cishinka bakwe kabili alabalambula apakalamba.

Bomfyeni ifishinte fya mafunde ya mu Baibolo mu bumi bwenu. Ilyo tulekonka ifishinte fya mafunde ya mu Baibolo, tulaimwena fwe bene ukuti ukupanda amano kwa kwa Yehova kulabomba. Amapinda 3:5, 6 yatila: “Tetekela Yehova umutima obe onse, na ku kwiluka kobe we mwine wishintililako; uko konse wenda umwishibe, na o akatambalike nshila shobe.” Tontonkanyeni pa fyo bucisenene bwalungulusha amatontonkanyo ya bantu abengi, ne nkuntu, e lyo na mafya bwabaletela. Ilyo baitumpa mu musamwe uwa pa kashita kanono, aba bantu balacula pa myaka iingi nelyo fye ubumi bwabo bonse. Lelo, abenda pa ‘musebo wa kamfyemfye’ bena balasonda ifyo ubumi bukaba mu bwikashi bupya, kabili ici cilabakoselesha ukutwalilila ukwenda mu nshila itwala ku bumi.—Mateo 7:13, 14; Amalumbo 34:8.

Ukubomfya ifishinte fya mafunde ya mu Baibolo kuti kwa-afya. Inshita shimo, ukubomfya inshila iishumfwana na malembo nalimo kuti kwamoneka kwati e kwingapwisha bwangu amafya. Limbi tutile muli no bwafya bwa ndalama, nalimo kuti mwatunkwa ukuleka ifya Bufumu ukwise numa mu bumi.  Lelo, aba cishinka kabili abasungilila ilinso lyabo ilya ku mupashi balashininwa ukuti ku ntanshi “kukabo busuma ku batiina Lesa.” (Lukala Milandu 8:12) Umwina Kristu inshita shimo kuti acila pa maawala alingile ukukombokelapo, lelo takabe nga Esau, uwasuulile ifintu fya ku mupashi, ukufikaana kwati fintu fishacindama.—Ukutendeka 25:34; AbaHebere 12:16.

Yesu alilondolwele bwino bwino umulimo wesu fwe Bena Kristu. Tufwile ‘ukulafwaya intanshi ubufumu no bulungami bwa kwa Lesa.’ (Mateo 6:33) Nga twacita ifyo, Yehova, ngo mufyashi akalanga ukutemwa kuli ifwe pa kushininkisha ukuti natukwata ifyo tukabila lwa ku mubili. Tafwaya nangu panono ukuti tulesakamikwa ne fintu ifyo atila akulatupeela. Amasakamika ya musango uyo ayashalinga kuti yaba ngo bulwele bwa menso ubwa ku mupashi—nga bwalekeleshiwa, kuti panono panono bwalenga twalamona fye ifintu fya ku mubili ukufikila twapofula lwa ku mupashi. Nga twatwalilila fye muli uyo wine musango, ubushiku bwa kwa Yehova bukesa pali ifwe “kwati citeyo.” Ala mwandini ico kuti cabipa!—Luka 21:34-36.

Ukupala Yoshua, Tonteni Amenso Pe Subilo

Shi natutonte amenso yesu pe subilo lishaiwamina ilya Bufumu, no kuleka imilimo imbi ukuba mu fifulo fya iko. Nga ca kutila twatwalilila ukubelenga Baibolo, ukwetetula, no kubomfya ifishinte fya mafunde ya mu Baibolo, tukaba ne subilo line line nge lyakweteko Yoshua. Ilyo afishishe abena Israele mu Calo Calaiwe, atile: “Mwaishiba mu mitima yenu yonse na mu myeo yenu yonse ukuti takwashala nangu cimo ca mu fintu fyonse fisuma ifyo Yehova Lesa wenu asosele ulwa imwe; fyonse fyalimoneke kuli imwe, takwashala cintu nangu cimo.”—Yoshua 23:14.

Shi isubilo lya Bufumu nalimukoshe, kabili shi nalilemusansamusha ilyo mulelitontonkanyapo, lintu mulepingula pa fintu, na muli fyonse ifyo mwakulacita.—Amapinda 15:15; Abena Roma 12:12.

[Icikope pe bula 21]

Bushe mwalitalatwishikapo nga mukengila mu calo cipya?

[Icikope pe bula 22]

Ukwetetula kwalicindama sana nga mulebelenga Baibolo

[Ifikope pe bula 23]

Lyonse muletontonkanya pa fya Bufumu