Mu Liberia—Inte sha kwa Yehova Shilelunduluka te Mulandu ne Nkondo

INKONDO ya bana calo mu Liberia yalilwikwa pa myaka ukucila 10. Pa kati ka mwaka wa 2003, utupondo twaingilile umusumba ukalamba, Monrovia. Inte sha kwa Yehova ishingi shalefulumuka mu mayanda, inshita shimo ici calecitika imiku iingi. Imiku iingi, balebasampila ifipe.

Ku ca bulanda, ilyo balelwa mu musumba ukalamba, abantu abengi balipaiwe. Pa baipaiwe pali na baNte, munyinefwe umo na nkashi yesu umo. Bushe bamunyinefwe bacitile shani ilyo bali no bu bwafya, kabili cinshi cacitilwe ku kubafwa?

Ukwafwa Abali mu Kukabila

Mu nshita ya nkondo, aba pa maofesi ya Nte sha kwa Yehova mu Liberia bateyenye ifya kwafwilisha abali mu kukabila. Balepeela ifya kulya, ifipe fya mu ng’anda ifikabilwa sana, no muti. Pa nshita utupondo twali na maka pa ncende yabamo icabu, ifya kulya fyalicepele. Aba pa maofesi ya Nte baliibukile ukutila ifi kuti fyacitika kabili balilonganike ifintu ifingi ifya kupeela Inte shali 2,000 ishabutukiile mu Mayanda ya Bufumu aya mu musumba. Bamunyinefwe balyakenye bwino ifya kulya ica kuti tafyapwile ukufikila ilyo baiswile icabu na kabili. Amaofesi ya Nte aya ku Belgium na ku Sierra Leone yalebomfya indeke ukutwala umuti, kabili amaofesi ya Nte aya ku Britain na France yena yaletwala ifya kufwala.

Te mulandu ne fyo ifintu fya-afishe, bamunyinefwe batwalilile fye ukuba ne citetekelo kabili aba nsansa. Ifyasosele munyinefwe umo uwafulumwike pa ng’anda imiku itatu, e fyo na bengi baletontonkanya. Atile: “Iyi e nshita tulandapo ilyo tuleshimikila; tuleikala mu nshiku sha kulekelesha.”

Ifyo Abantu Bankulako ku Mbila Nsuma

Te mulandu ne fimfulunganya fyaba mu calo ca Liberia, Inte shilaba ne fya kufumamo fisuma nga shaya mu kushimikila. Mu January 2003, kwali impendwa iyakulisha iya bakasabankanya. Bafikile 3,879, kabili mu February batungulwile amasambililo ya pa ng’anda 15,227.

Abantu balankula bwangu ku mbila nsuma. Ifyacitike mu mushi uwaba pa kati ka kapinda ka ku kulyo na kabanga ka cilya calo e filangilila ifi. Icilonganino cateyenye ukusefya Icibukisho ca mfwa ya kwa Kristu mu mushi ukalamba uwa Bewahn, ukwenda ama-awala 5 ukufuma pa cifulo balonganina lyonse. Ilyo bamunyinefwe bashilaya mu kulaalika abantu ba mu mushi ukwisasangwa ku Cibukisho, babalile balaalika umukalamba wa mushi wa Bewahn. Ilyo apokelele kalata bamulaalikilepo, abulile Baibolo yakwe, aile ku bekalamushi, kabili abelengele ilembo lyali pali kalata, ilyalebakoselesha ukusangwa ku Cibukisho. Kanshi ilyo bakasabankanya balefika, basangile ukuti umulimo bali no kubomba naubombwa kale! Umukalamba wa mushi alisangilwe ku Cibukisho pamo na bana bakwe, e lyo na bakashi bakwe babili. Abasangilweko bonse pamo bali 27. Ukutula ilyo, umukalamba  wa mushi alileka ukupepa ku Methodist, atendeke ukusambilila Baibolo na baNte, kabili abapeele ne mpanga iya kukuulapo Ing’anda ya Bufumu.

Ukwalula Imisango

Imisango isuma iya bamunyinefwe na yo yalyalula sana amatontonkanyo ya balekaanya icine. Moneni icacitike kuli Opoku. Ilyo painiya waibela aleshimikila, akumenye Opoku kabili amutambike Ulupungu lwa kwa Kalinda. Opoku alitemenwe ilyashi limo ilyali muli magazini lelo takwete indalama. Ilyo painiya amulondolwele ukuti taleshitisha, amushiilile magazini no kumweba ukuti akabwela na kabili. Ilyo abweleleko, Opoku amwipwishe ati: “Bushe walinjishiba? BaNte abengi abekala mu Harper balinjishiba. Naletamfya abana benu amasukulu!” Lyene alondolwele ukuti ali umukalamba we sukulu lya mu musumba wa Harper kabili alepakasa abana ba Nte sha kwa Yehova pantu tabalepika sulupu ku mendela.

Lelo, ifilangililo fitatu ifya kutemwa kwa Bwina Kristu ukwa Inte sha kwa Yehova fyalengele Opoku aalule imisango yakwe. Pa kubala, amwene ifyo Inte shalesakamana munyinabo wa ku mupashi uwalwele nga nshi. Inte shateyenye no kuti ayeundapwa ku calo cimbi ica mu bwina mupalamano. Opoku aletontonkanya ukuti munyinefwe uwalwele ali “mukalamba” mu cilonganino ca Nte sha kwa Yehova. Lelo aishileishiba ukuti tapuseneko ne Nte shonse. Ica bubili, muli ba1990, Opoku ali imbutushi mu Côte d’Ivoire. Bushiku bumo ilyo ali ne cilaka, aile mu kushita amenshi ku mulumendo. Opoku akwete indalama iikalamba ica kuti umulumendo takwete cenji, e co apeele Opoku amenshi ukwabula ukumulipilisha. Ilyo amupeele amenshi, umulumendo amwipwishe ati: “Bushe kuti kwabako inshita ilyo abantu pamo nga imwe na ine bakalapeelana ifintu ukwabula ukulipilisha?” Opoku atungenye ukuti umulumendo ali ni Nte ya kwa Yehova, kabili umulumendo alisumine ukuti ali Nte. Bukapekape ne cikuuku ca uyu munyinefwe fyateemwine Opoku. Na mu kulekelesha, filya painiya waibela aitemenwe ukumushiila magazini ukwabulo kumulipilisha kwamushinine ukuti ifyo aletontonkanya ukuti Inte e fyo shaba fyalilubene kabili alekabila ukwaluka. Alilundulwike lwa ku mupashi kabili nomba ni kasabankanya uushabatishiwa.

Nangu bamunyinefwe ba mu Liberia balitwalilila ukuba mu mafya, balitetekela muli Lesa kabili muli bucishinka balabila imbila nsuma pa lwa nshita isuma iikabako ilyo Ubufumu bwa kwa Lesa ubwalungama bukalateka. Yehova takalabe ukubombesha kwabo no kutemwa uko balanga kwi shina lyakwe.—AbaHebere 6:10.

[Amamapu pe bula 30]

(Nga mulefwaya ukumona mapu, moneni mu citabo)

MONROVIA

[Ifikope pe bula 31]

Mu nshita sha-afya, abantu ba kwa Yehova balafwilisha abali mu kukabila lwa ku mubili na lwa ku mupashi