Ilyashi Lya Bakabilisha Ba Bufumu

Ukushimikila ku Bantu Abali pa Ncito

CINSHI cacitikile abatumwa, e kutila Mateo, Petro, Andrea, Yakobo na Yohane? Bonse aba, Yesu abetile ilyo bali pa incito. Petro, Andrea, Yakobo, na Yohane balebomba incito yabo iya bulondo ilyo Yesu abebele ati: “Nkonkeni.” Mateo ali apa kusonkeseshe misonko ilyo Yesu amwitile ku kuba umusambi wakwe.—Mateo 4:18-21; 9:9.

Kuti mwafuma ifisuma mu kushimikila ku bantu abali pa ncito. Ilyo Inte sha kwa Yehova isha mu Japan shailwike fi, shalibombeshe sana ku kushimikila ku bali pa ncito. Cinshi cafuminemo? Mu myeshi fye iinono, ifipempu ifingi nga nshi fyalicitilwe, kabili batendeke ukutungulula amasambililo ya Baibolo nalimo 250. Moneni fimo ifyacitike.

Mu Tokyo, umutumikishi wa mbila nsuma akumenye umukalamba we tuuka bashitishamo ifya kulya uwalandilepo ne Nte imyaka nalimo 30 ku numa ilyo ali pa sukulu. Nelyo ashaumfwikishe ifingi ifyo aumfwile ilyo ali pa sukulu, alefwaisha ukusambilila Baibolo. E co pali iyi nshita alisumine ukulasambilila Baibolo mu citabo ca Ukwishiba Uko Kutungulula ku Mweo wa Muyayaya. * Na kabili, atendeke ukulabelenga Baibolo cila cungulo bushiku ilyo ashilaya mu kulaala.

Painiya waibela aileshimikila mwi ofesi lya mukalamba wa kampani. Nangu ca kuti umukalamba wa kampani talipo, umukashana wa-aswike lamya aipwishe ati, “Bushe teti mutemwe ukulanda na ine?” Ilyo alandile nankwe pa lamya pa nshita inono, umukashana alifumine no kusosa ati alefwaisha ukulabelenga Baibolo. Painiya waibela apekenye ukuti akese na Baibolo kabili alitendeke ukusambilila Baibolo na wene, ne li sambililo lyalebela mu parka wali lwa mupepi kabili lyaletungululwa ulucelo ilyo umukashana ashilaya ku ncito.

Pe ofesi limbi, umwaume umo amwene umwanakashi abomba nankwe apoka bamagazini ba Ulupungu lwa kwa Kalinda na Loleni! lelo pa numa fye Nte aile apoosele bamagazini bwangu bwangu. Ilyo uyu mwaume ainwike, ashimikileko umukashi wakwe, Inte, ifyacitike no kusoso ati nga e o bashimikile, nga alikutikeko panono. Umwana wakwe umwanakashi, uwaumfwileko ifyo alandile, aile-eba Nte uushimikila mu cifulo umwaba amakwebo muli cilya cifulo. Nte alyangufyenye ukutandalila iofesi lya mulume wakwe kabili atendeke ukusambilila na wene Baibolo. Tapakokwele uyu mwaume atendeke ukulasangwa ku kulongana kwa pa Mulungu lyonse.

Mwalifuma ifisuma na fimbi mu kushimikila ku bantu abali pa ncito. Bakasabankanya abengi mu Japan nomba balicenjela sana mu kucita ifipempu fya kubwelelamo mu matuuka, mu mafakitare, na mu maofesi. Ukubomfya iyi nshila na kabili, kwalenga abanaka abengi ukutandalilwa no kutendeka ukusambilila Baibolo. Ifyafumamo fisuma nga nshi. Nomba line, icilonganino cimo mu Tokyo catungulwile amasambililo ya Baibolo 108, impendwa iikalamba nga nshi ukucila ayo batungulwile umwaka wapwile.

[Futunoti]