Bushe Muleibukisha?

Bushe mwalyumfwile bwino bwino ifyo mwabelengele muli bamagazini ba nomba line aba Ulupungu lwa kwa Kalinda? Cisuma, moneni ifyo mwalayasuka amepusho yakonkapo:

• Cinshi cilangilila ukutila Yesu alikwete bamunyina na bankashi yakwe?

Baibolo e fyo isosa pali Mateo 13:55, 56 na pali Marko 6:3. Ishiwi lya ciGriki (adelphos) ilisangwa muli ifi fikomo libomfiwa ku kulangilila “bulupwa nelyo ukwampana kwa mwi funde [kabili] lilosha fye kuli munyina uo mwafyalwa nankwe ku bafyashi bonse babili nelyo ku mufyashi fye umo.” (The Catholic Biblical Quarterly, January 1992)—12/15, ibula 3.

• Kwaluka nshi kwamonekesha mu nkondo sha pali leelo, kabili ilingi line cinshi cilenga ishi nkondo?

Ino myaka inkondo shacusha abantu ilingi line ni nkondo sha bana calo—abekala calo ukulwa na bekala calo banabo. Ukupatana kwa bapusana imishobo ne mitundu, ukupusana kwa mipepele, ulufyengo, ne cimfulumfulu ciba mu buteko e filenga inkondo. Icilenga cimbi kufwaisha ukuteeka e lyo no kufunukila indalama.—1/1, amabula 3-4.

• Twaishiba shani ukutila Yesu tafwaile Abena Kristu ukusungila ku mutwe amashiwi ye pepo lya We Shifwe?

Yesu alangilile ifya kupepa ili pepo mu lyashi lyakwe ilya pa Lupili. Pa numa ya myeshi 18, abwekeshepo ifishinka fikalamba ifyo abafundile pa fya kupepa. (Mateo 6:9-13; Luka 11:1-4) Icishinka ca kuti, Yesu tabwekeshepo amashiwi yamo yene, ne ci cilelangilila ukuti talebasambilisha ukupepa amapepo ya kubwekeshabwekeshapo aya kusungila fye ku mutwe.—2/1, ibula 8.

• Bushe ni kwi inkunda yafumishe ibula lya muolife ilyo yaletele ku cibwato, pa numa ya Lyeshi?

Tatwaishiba ifyo amenshi yakawike nangu ifyo yakabile nelyo ukutalala. Lelo imiti ya muolife yaishibikwa ukuti ilapuuka na kabili nga baitema. E ico imiolife imo ifwile tayafwililile ku lyeshi kabili amabula ya iko yalilembele bwangu bwangu pa numa ya lyeshi.—2/15, ibula 31.

• Ilyo mu Nigeria mwabukile nkondo ya bana calo, babinda no kutwala impapulo mu Biafra, Inte sha kwa Yehova aba kuli ilya ncende balepokelela shani ica kulya ca ku mupashi?

Umubomfi wa buteko bamutumine ukuyabombela ku Bulaya, umbi alebombela pa cibansa ca ndeke mu Biafra. Bonse baali ni baNte. Baipeeleshe ukubomba umulimo wingabaletelela uwa kutwala ifilyo fya ku mupashi mu Biafra. E co banonseshe bamunyinabo abengi mpaka ne fyo inkondo yaputwike mu 1970.—3/1, ibula 27.

• Bushe cinshi Icipangano ca Mutende ica ku Westphalia capwishishishe, kabili cakumine shani imipepele?

Imipepele ya Reformation yalengele Ubuteko bwa ciRoma ukwakanikana mu macalici yatatu—ilya baKatolika, ilya baLutheran, ne lya baCalvinist. Akabungwe ka Protestant Union na ka Catholic League twalipangilwe ku kutendeka kwa ba1600. Lyene ukukansana ukwatendekele mu mipepele ya mu Bohemia kwasangwike inkondo iya kulwila ukuteeka ifyalo fimbi. Bakateeka balepepa ku Katolika na ba ku Protestanti batampile ukulwila ukuteeka ifyalo no kukwata amaka pa makwebo. Kwi pele pele, batampile ukulanshanya ulwa mutende ku Germany mu citungu ca Westphalia. Ilyo myaka 5 yalekumana, basaine Icipangano ca Mutende ku Westphalia mu 1648, ne ci calengele Inkondo Balwile pa Myaka 30 ukupwa kabili calengele ifyalo fya ku Bulaya ukutendeka ukuiteeka.—3/15, amabula 20-3.

• Ni mwi mwalola icishibilo, nelyo ishina lya “ciswango,” e kuti, inambala 666?

Ici cishibilo calumbulwa pa Ukusokolola 13:16-18. Iciswango, mitekele ya bantunse, kabili ifi iciswango cakwata “inambala ya muntu” cilangililo ca kuti imitekele tayapwililika filya fine umuntu ashapwililika. Inambala 600 ukulundapo 60 e lyo na 6 ilangilila ukuti imitekele yalifilwa umupwilapo mu menso ya kwa Lesa. Abapeelwa ici cishibilo balapepa Ubuteko bwa mapolitiki, nelyo e bo bashintililapo ukuti e bwingabapususha.—4/1, amabula 4-7.