Bushe Ukufwaya kwa kwa Lesa Kulecitwa Pali Leelo?

“Ukufwaya kwenu kucitwe pano isonde nga mu muulu.”—Mateo 6:10.

JULIO na Christina balemonako na menso uko abana babo bane balepya mu mulilo mpaka fye no kufwa, kabili ici calibalungulwishe. Motoka yabo yapunkilwe na namutekenya wakolelwe, no kutendeka ukupya. Umwana wabo uwa busano, Marcos, balimupuswishe, lelo, umulilo wamushile ne fibala umubili onse. Aali ne myaka 9 iya kufyalwa. Bawishi bali no bulanda icine cine. Baleisansamusha no lupwa lwabo abati: “Tufwile ukwishiba ukuti ici cacitika kufwaya kwa kwa Lesa, nampo nga cisuma nelyo cibi.”

Abantu abengi e fyo batontonkanya nga baponenwa ne cabipa nge ci. Batontonkanya ukuti, ‘Apo Lesa wa maka yonse kabili alatusakamana, muli conse cacitika mufwile ukubamo ubusuma bumo fi kuli ifwe.’ Bushe na imwe mulesumina?

Ilingi ico abantu basosela ati fyonse ificitika, nampo nga fisuma nelyo fibi kufwaya kwa kwa Lesa, mashiwi yalandile Yesu mwi pepo lya We Shifwe, ayo twambwile pa mubalo. Ukufwaya kwa kwa Lesa kulecitwa mu muulu, bushe te ifyo? Nga tulepepa ati, ‘ukufwaya kwenu kucitwe pano nse,’ bushe ninshi tatulesumina ukuti ificitika pe sonde kufwaya kwa kwa Lesa?

Abengi balatwishike co. Batila nga ni fyo ninshi Lesa ta-angwa ku fyo abantunse bayumfwa. Bepusha ati: ‘Bushe Lesa wakwata ukutemwa kuti afwaya shani ifyabipa ukucitikila abantu ba kaele? Nga Lesa afwaya ifwe ukusambililako fimo ku fyabipa ifituponena, ninshi finshi ifyo fine afwaya tusambilile?’ Limbi na imwe e fyo mutontonkanya.

Yakobo, munyina kwa Yesu, alembele pali ici ati: “Ilyo umuntu aeshiwa, etila: ‘Ni Lesa e ulenjesha.’ Pantu Lesa te kuti eshiwe ku bubi, kabili umwine tesha muntu iyo.” (Yakobo 1:13) Lesa te ulenga ifyabipa ukucitika. E ico kanshi, te fyonse ificitika pe sonde pali leelo ifyaba kufwaya kwa kwa Lesa. Amalembo yalanda na pa kufwaya kwa muntu, ukwa nko, no kufwaya kwa kwa Kaseebanya. (Yohane 1:13; 2 Timote 2:26; 1 Petro 4:3) Bushe tamulesumina ukutila ifyacitikile ulupwa lwa kwa Julio na Christina te kufwaya kwa kwa Shifwe wa ku muulu uwatutemwa?

Bushe ninshi Yesu aloseshe mwi ilyo asambilishe abasambi bakwe ukupepa ati: ‘Ukufwaya kwenu kucitwe’? Bushe kulomba fye Lesa ukutupokolola mu milandu imo imo, nelyo bushe Yesu aletusambilisha ukupepela pali cimbi icacila apa, ukupepela ukwaluka uko bonse bengasubilamo? Natubebete na fimbi ifyo Baibolo yalanda pali ci.

[Abatusuminishe Ukubomfya Icikope pe bula 3]

Motoka: Dominique Faget-STF/AFP/Getty Images; umwana: FAO photo/B. Imevbore