Bushe Mulakoshiwa ku Cebo ca kwa Lesa?

BUSHE mucita shani ilyo mwaponenwa na mafya? Yesu wena aibukishe ilembo lyakumine ubwafya akwete kabili lyamwafwile ukukaana amatunko ya kwa Satana. (Mateo 4:1-11) Imfumu Davidi na o ilyo akwete amafya, Icebo ca kwa Lesa e camukoseshe. Atile: “Pa kuba ayengi muli ine amatontonkanyo ya kunsakamika, ifya kusansamusha fyenu finengo kupekwa.”—Amalumbo 94:19.

Ukwibukisha ilembo twatemwisha kuti kwatusansamusha nelyo ukutukosha na ifwe ilyo twaba na mafya. Ku kulangilila, baRex abali ne myaka 89 nomba, balibomba bukabila bwa mbila nsuma ubwa nshita yonse ukutula mu 1931. Na lyo line batila: “Ilingi naleyumfwa ukukanafikapo ilyo bampeela umulimo waibela mu mulimo wa kwa Lesa.” Bushe baalecita shani? Batila: “Naleibukisha ilembo natemwa, ilya Amapinda 3:5, ilitila: ‘Tetekela Yehova umutima obe onse, na ku kwiluka kobe we mwine wishintililako.’ Ukwibukisha no kuumfwila ico ilembo ili lisosa, e cangafwile ukubomba umulimo ukwabula ubwafya.”

Na baice bene balomfwa bwino ukwambula ilembo batemwa. Jack uuli ne myaka 6 atila ilembo atemwa ni Mateo 24:14. Ili line lembo e limucincisha ukuya mu kubila imbila nsuma na bafyashi bakwe. Atila: “Nalitemwa ukuya mu kushimikila lyonse pa Cibelushi na bamayo, batata, na nkashi yandi.”

Bushe limo limo mulaponenwa amafya ayesha icitetekelo cenu filya caleba na kuli Yesu? Ninshi ilembo lya Abena Filipi 4:13 kuti mwalitemwa sana. Bushe mulacushiwa ku ‘matontonkanyo ya kusakamika’ nga filya Imfumu Davidi aculile? Kanshi ukwibukisha ilembo lya Abena Filipi 4:6, 7 kuti kwamwafwa ukucimfya ubwafya. Bushe limo limo mulasakamana ati umulimo wenu kuli Lesa wa fye? Lyene ukwibukisha 1 Abena Korinti 15:58 kuti kwamukosha.

Ilyo twaibukisha ilembo ilikumine ubwafya bwesu, tulenga Icebo ca kwa Lesa ukuba na maka muli ifwe. (AbaHebere 4:12) Amalembo ya musango yo kuti yatukosha no kutusansamusha.—Abena Roma 15:4.