Bushe Ukukanaitumpa mu fikansa fya Calo Kulenga umo Ukukanaba no Kutemwa?

UKUBA Umwina Kristu kwalicila pa kubelenga fye Baibolo, ukupepa, no kwimba inyimbo sha mapepo pa nshiku ya Mulungu. Kusanshamo ukubomba imilimo, kuli Lesa na ku bantu. Baibolo itila: “Twitemwa, mu cebo nangu ku lulimi, lelo mu milimo na mu cine.” (1 Yohane 3:18) Yesu alyangilwe bambi icine cine, e co Abena Kristu bafwile ukumupashanya. Umutumwa Paulo acincishe abasumina banankwe ukuba “abacincila pe mu mulimo wa kwa Shikulu.” (1 Abena Korinti. 15:58) Lelo bushe umulimo wa kwa Shikulu cinshi? Bushe  kwesha ukwalula imitekele pa kuti abapiina na batitikishiwa bamwenemo? Bushe ifyo e fyo Yesu acitile?

Nelyo ca kuti abantu bapamfishe Yesu ukuti acite fyo, alikeene ukuitumpa mu fikansa fya calo. Alikeene ilyo Satana amutambike ukuteeka amabufumu ya pe sonde, alikeene no kuitumpa mu fikansa pa lwa kulipila umusonko, kabili alifulumwike ilyo abantu bafwaile ukumucite mfumu. (Mateo 4:8-10; 22:17-21; Yohane 6:15) Ukukanaipoosa mu fikansa fya calo takwamulengele ukukana-afwako bambi.

Yesu apoosele amano ku fyali no kulenga abantu ukumwenamo umuyayaya. Nelyo ca kuti ukuliisha abantu 5000 no kuposha abalwele kwalengele abantu abanono ukwilulukwa pa nshita inono, ifyo alesambilisha fyaletele amapaalo yabelelela ku bantunse bonse. Yesu taishibikwe nga kateyanya wa fya kukumbusuka, lelo aishibikwe ukuti “Kasambilisha.” (Mateo 26:18; Marko 5:35; Yohane 11:28) Atile: “Ici e co nafyalilwe, kabili ici e co naishile pano calo, ukuti nshimike icine ubunte.”—Yohane 18:37.

Ukubila Ifyawama Ukucila Ukuitumpa mu Fikansa fya Calo

Icine ico Yesu alesambilisha tacalelanda pa fikansa fya calo. Ukucila, cali cine pa lwa Bufumu ubo ali no kubapo Imfumu. (Luka 4:43) Ubu Bufumu buteeko bwa mu muulu, kabili bukapyana imitekele yonse iya bantunse no kuleta umutende ubelelela. (Esaya 9:6, 7; 11:9; Daniele 2:44) Kanshi, Ubufumu e subilo lyeka fye ilya cine cine ilya bantunse. Bushe ukubila ulwe subilo lyashininkishiwa ilya ku ntanshi takulanga sana ukutemwa ukucila ukukoselesha abantu ukutetekela mu bantu ukuti e bengabawamisha imikalile ku ntanshi? Baibolo itila: “Mwitetekela bakankaala, nangu mwana wa muntu uo takuli ukupususha muli wene; wafumo mupu wakwe, abwelela ku mushili wakwe, ubushiku bulya bwine yaloba amatontonkanyo yakwe. Alishuka uo Lesa wa kwa Yakobo e kwafwa kwakwe, uo icilolelo cakwe cili kuli Yehova Lesa wakwe.” (Amalumbo 146:3-5) E co Yesu tatumine abasambi bakwe ukuya mu kubilisha ifya kuwamya imitekele, lelo, abasambilishe ukushimikila “imbila nsuma iya bufumu.”—Mateo 10:6, 7; 24:14.

Kanshi uyu e “mulimo wa kwa Shikulu” uo bakashimikila ba Bwina Kristu baebwa ukubomba. Apo abateekwa ba Bufumu bwa kwa Lesa baebwa ukutemwana, Ubufumu bukatunguluka ukufumyapo ubupiina no kupeela abantunse ifyo bakabila ukwabula akapaatulula. (Amalumbo 72:8, 12, 13) Iyi ni mbila nsuma kabili nailinga ukubilisha.

Pali leelo, Inte sha kwa Yehova baliteyanishiwa ukubomba uyu “mulimo wa kwa Shikulu” mu fyalo 235. Balakonka ifunde lya kwa Yesu ilya kucindika amabuteko yonse. (Mateo 22:21) Lelo na kabili balomfwila amashiwi alandile ku basambi bakwe aya kuti: “Tamuli ba pano calo, lelo ine nalimusala mu ba pano calo.”—Yohane. 15:19.

Bamo abaitumpile mu fya fikansa fya calo kale balyaluka pa numa ya kusambilila Baibolo bwino bwino. Politishani wa ku Italy uwali membala wa kabungwe ka Catholic Action, akabungwe kaletungululwa ne calici, atile: “Naingile mu fikansa fya calo, pantu naleyumfwe fyo umuntu afwile ukucitako fimo pa kuti pabe ubuyantanshi mu mitekele ne mikalile ya bantu.” Pa numa ya kuleka incito alebomba  ngo mukalamba we tauni, pa kuti aleshimikila Ubufumu bwa kwa Lesa apo aali ni Nte ya kwa Yehova, alondololwele ico mu matukuto ya baitumpa mu fikansa fya calo abafwaya ukuwamya ifintu mushifumina fisuma. Atila: “Ifi isonde lyaba, te mu kuti abantu aba mibele isuma tabaesha ukuwamya imikalile, lelo, ni pa mulandu wa kuti abantu abacita ifyabipa balifula ukucila abacita ifisuma.”

Ukukanaitumpa mu fikansa fya calo pa mulandu wa kushimika pe subilo line line lyeka ilya bantunse takulenga Abena Kristu ba cine ukukana-afwa bambi. Abo baafwa ukwisaba abateekwa ba Bufumu bwa kwa Lesa balasambilila ukuleka ukucita ifyabipa, ukucindika abalashi, ukuwamyako ubumi bwabo ubwa lupwa, no kukanatemwisha ifyuma. Ne cacilapo, Inte sha kwa Yehova balaafwa abantu ukuipakisha bucibusa bwa pa mutima na Lesa.

Bakashimikila ba Bufumu bwa kwa Lesa balanonsha aba mu bwikashi umo bekala. Lelo icacilapo, balasambilisha abantu ukucetekela mu buteeko ubwa cine cine kabili ubukaleta umutende ubelelela kuli bonse abatemwa Lesa. Pa mulandu wa kukanaipoosa mu fikansa fya calo, Abena Kristu balaitemenwa ukucitila abantu ifingabafwa pa nshita ntali kabili ifibomba bwino sana pali leelo.

[Akabokoshi ne Cikope pe bula 7]

Nalekele Ukuitumpa mu Fikansa fya Calo no Kutendeka Ukushimikila pa Bufumu bwa kwa Lesa

Ilyo ali umulumendo, Átila asambilile icisumino ca kuti Abena Kristu balingile ukuwamya ubwikashi. Asambilile ici kuli bashimapepo be calici aleyako mu Belém, ku Brazil. Aleipakisha ukukutika pa kulubulwa kwa bantunse ukufuma ku kutitikishiwa, e mulandu wine ailundile ku kabungwe ka bafwaya ukwalule fintu, uko asambilile ifya kuilishanya mu musebo mwi bumba no kukaana ukukonka amafunde.

Lelo Átila na kabili aleipakisha ukusambilisha abaice ba mu kabungwe kaiminine pa kwalule fintu, ukubomfya icitabo apeelwe ica Ukukutika kuli Kasambilisha Mukalamba. * Ici citabo calelanda pa mibele isuma na pa kumfwila abalashi. Ici calengele Átila ukupapa umulandu abatungilila icisumino ca kuti Abena Kristu bafwile ukuwamya ubwikashi bashikonkela imibele isuma iyo Yesu asambilishe no mulandu bamo balabilako ku batitikishiwa nga baba mu bulashi. Alilekele ukubombako imilimo ya mu bwikashi. Pa numa, Inte sha kwa Yehova balishile pa mwakwe no kulanda nankwe pa Bufumu bwa kwa Lesa. Atendeke ukusambilila Baibolo no kusambilila icikapwisha amafya yatitikisha abantu.

Mu nshita ilya ine alesambilila Baibolo, Átila asangilwe ku kukumana kwa baKatolika ukwalelanda pa Mipepele ne fikansa fya calo. Kafundisha alondolwele ati: “Imipepele ne fikansa fya calo ni nshila shibili ishakupwishishamo icintu cimo.” Kabili asangilwe na ku kulongana ku Ng’anda ya Bufumu. Paali ubupusano ubukalamba nga nshi! Takwali ukupeepa, ukukolwa, nelyo imipuulwe ya nsoni. Apingwilepo ukuilunda ku Nte sha kwa Yehova mu mulimo wabo uwa kushimikila, na pa numa alibatishiwe. Pali leelo alimona umulandu icisumino ca kuti Abena Kristu balingile ukwalula ubwikashi cishingapwishisha amafya yonse aya bapiina.

[Futunoti]

[Ifikope pe bula 6]

Ukukanaipoosa mu fikansa fya calo takulenga abatumikishi ba Bwina Kristu ukukana-afwa bambi