Ifyo Mwingasanga Ubumi Bubelelela Kabili Ubwa Nsansa

ABANTU bamo basoso kuti umuntu onse afwaya ukwikalilila, lelo, takwaba nelyo umo uufwaya ukukota. Ilyo abengi bafika pa mushinku wa kuleke ncito, balafwaisha ukukwata inshita iikalamba iya kucita ifyabo no kukanashingamwa imilimo iingi. Na lyo line, tabafwaya ukulaikala fye ukwabula ifya kucita. Na kabili, balatiina ukuba beka, ukukanakwate nsansa, no kukanakwata ubumi ubusuma.

Cinshi, lyene, cingalenga bakwata ubumi bwa nsansa? Ifibusa fisuma na balupwa ababa ne citemwishi balalenga abaice na bakalamba ukuba ne nsansa. Lelo ifyo bambi bengacita ku kuwamyako ubumi bwa mukalamba te fyacindama. Icacilapo ukucindama cintu umukalamba engacitila bambi.

Ukusapika kwacitilwe pa nshita ntali pa bakalamba abaupana 423 kulangilila ukuti “ukwafwa bambi kuti kwalenga ubumi bwesu bwine ukutantalilako.” Stephanie Brown, uwacitile uku kusapika, alondololo kuti: “Ifyo twasangile filelangilila ukuti ifyo tupokelela ukufuma kuli bambi te filenga ukuti tumwenemo; lelo fintu ifyo tupeela.” Ukupeela kwa musango yo kuti kwasanshamo ukwafwako bambi incito sha pa ng’anda, ukusakamana abana, ukushitilako bambi ifya kushitashita, ukubapayanishisha imyendele nelyo ukukutika ku ulefwaya ukulanda na ifwe.

Mupepi ne myaka 2,000 iyapita, Yesu Kristu atile: “Mwaba insansa ishingi mu kupeela ukucila ishaba mu kupokelela.” (Imilimo 20:35) Ifingalenga twaba no bumi bubelelela kabili ubwa nsansa te kukwata indalama ishingi, ukubomfya imiti ilenga twilakota bwangu, atemwa imiliile. Lelo, kutwalilila ukuba abacincila no kubomfya inshita, amaka, no bukose mu kuwamya imikalile ya bambi.

Lelo, ukupeela fye ifi fintu te kuti kutulubule ku kukota, ukulwala, ne mfwa. Bufumu bwa kwa Lesa epela e bukafumyapo ifi fintu. Ilyo bukalateeka, ukulwala takwakabeko, nangu fye ni “mfwa tayakabeko.” (Ukusokolola 21:3, 4; Esaya 33:24) Na kuba, abantunse aba cumfwila bakekala umuyayaya mu nsansa pe sonde lya paradaise. (Luka 23:43) Inte sha kwa Yehova bali-itemenwa ukwebako bambi ifingalenga baba no bumi bubelelela kabili ubwa nsansa. Ne fi fisangwa muli Baibolo.