Amepusho Ukufuma ku Babelenga

Ukulingana na 1 Samwele 19:12, 13, mulandu nshi Davidi umubomfi wa kwa Yehova uwa cishinka alekeele umukashi wakwe Mikali ukukwata icimpashanya nelyo icilubi?

Intanshi, natulandeko pa fyo cali. Ilyo muka Davidi aumfwile ipange lya Mfumu Shauli ilya kwipaya Davidi, apo pene atontonkenye ukucitako fimo. Baibolo itila: “Mikali aishishe Davidi amufumisha mu nsolokoto; na o aliile, afyukile, no kupusuka. Kabili Mikali abuulile icimpashanya [icali ubukulu ngo mwaume no kumoneka], acibikile pa ca kukuwamapo, abikile no musao wa masako ya mbushi ku mitwe, no kufimbako ica kufimba.” Ilyo inkombe sha kwa Shauli shaile mu kwikata Davidi, Mikali abebele ati: “Nalwala.” Aya mano Mikali acitile yalengele Davidi asange inshita iikulu iya kubutuka.—1 Samwele 19:11-16.

Ifyo bashula filanga ukuti kale balesunga ifimpashanya pa kuti balefibomfya mu kupepa na mu milandu ye funde. Filya fine ifikalata ne fyalembwa fya mwi funde filanga ukuti umo e mwine wa cintu e lyo no wa kupeela ifipe fya cishale, e fyo ne fimpashanya fyalebomfiwa kale. Cimoneka kwati limo ukukwata icimpashanya kwalepeela umwina buko mwaume insambu sha kupoka ifipe nga shifyala afwa. Nalimo uyu e mulandu na Rakele asendele ifimpashanya fya kwa wishi na wishi na o asakamikwe sana no kufwaya ukufipokolola. Yakobo muka Rakele, taishibe ifyo umukashi wakwe acitile.—Ukutendeka 31:14-34.

Ilyo abena Israele basangwike uluko, bapokelele Amafunde 10, ifunde lya bubili pali aya mu kulungatika lyakenye ukupanga ifilubi. (Ukufuma 20:4, 5) Mu kuya kwa nshita, ilyo kasesema Samwele alelanda ne Mfumu Shauli, alikumisheko kwi funde line ili. Atile: “Bucintala bwaba ngo lubembu lwa kubuka, kabili imisuula yaba ngo kupepe fya fye no tulubi.” (1 Samwele 15:23) Kanshi uyu e mulandu tushingasosela ukuti icimpashanya calebomfiwa ku fya bupyani mu Israele. Na lyo line, cimoneka kwati uyu musango wa kale uwa kupepelamo imipashi uwa ciYuda walitwalilile mu ndupwa shimo shimo isha bena Israele. (Abapingushi 17:5, 6; 2 Ishamfumu 23:24) Apo Mikali asungile icimpashanya pamo ne fipe fimbi ifyo akwete, kuti twatila umutima wakwe onse tawali kuli Yehova. Nalimo Davidi taishibe nelyo cimo pa lwa cimpashanya atemwa tamukeenye ukuba na co pantu Mikali ali mwana wa Mfumu Shauli.

Amashiwi yali mwi lembo yalelanga ifyo Davidi alemona ukupepa Yehova eka fye, yatila: “Yehova mukulu, uwawaminwo kutashiwa apakalamba, kabili wene ali no kubelwa akatiina ukucile milungu yonse; pantu imilungu yonse ya bantu na bantu ya fye, lelo Yehova acitile imyulu.”—1 Imilandu 16:25, 26.

[Icikope pe bula 29]

Ifunde lya bubili pa Mafunde 10 lyabindile ukupanga ifilubi, nge ci cimpashanya mulemona apa

[Abatusuminishe]

Cifumine mu citabo ca The Holy Land, Vol. II, 1859