Bushe Mipepele Nshi Mufwile Ukusala?

‘IMIPEPELE yalekanalekana ni nshila fye shalekanalekana ishalola kumo kwine. Bushe Lesa taba fye umo?’ Ifi e fyo abengi basosa abatontonkanya ati nangu line calicindama ukuba mwi bumba lya mapepo, kuti waba mu mipepele iili yonse iyo we mwine wasala.

Nga tamutontonkenyepo sana kuti mwatila ifyo balanda fyaliba fye bwino, pantu na cine Lesa wa maka yonse, aba fye umo. (Esaya 44:6; Yohane 17:3; 1 Abena Korinti 8:5, 6) Na lyo line, tatufwile ukusuulako fye ku kupusana no kupilikana kwaba pa kati ka mabumba ya mapepo aya bantu baitunga ukubombela Lesa wa cine. Ifyo bacita, ifyo basuminamo, ifyo basambilisha, ne fyo bafwaya pa kuba mwi bumba lyabo fyonse fyalipusana icine cine. Fingi sana ifyapusana mu mipepele ica kuti ababa mwi bumba lya mapepo limo te kuti bomfwikishe kabili tabengasumina ifyo bambi basambilisha nelyo ifyo basuminamo.

Lelo, Yesu atile: “Lesa Mupashi, na bamupepa bali no kupepela mu mupashi na mu cine.” (Yohane 4:24) Bushe abapepela Lesa mu cine kuti balasambilisha ifisambilisho fyapusana pa lwa kwa Lesa, ubufwayo bwakwe, ne fyo afwaya pa kumupepa? Bushe ca mano ukutontonkanya ukuti Lesa wa maka yonse tapoosako amano ku fyo tumupepa?

Abena Kristu ba Cine aba Kale na ba Nomba

Abena Kristu ba mu mwanda wa myaka uwa kubalilapo inshita shimo balepusana mu fyo baletontonkanya pa fintu. Katulangilile, ilyo umutumwa Paulo alesosa ku Bena Kristu ba mu Korinti, atile: “Naebelwe ulwa imwe, mwe bamunyinane, ku ba mu ng’anda ya kwa Kloe, ukuti mwaba ukukansana muli imwe. Nalosha mu kuti, onse uwa pali imwe atila: ‘Ine ndi wa kwa Paulo,’ ‘Lelo ine ndi wa kwa Apolo,’ ‘Lelo ine ndi wa kwa Kefa,’ ‘Lelo ine ndi wa kwa Kristu.’”—1 Abena Korinti 1:11, 12.

Bushe Paulo amwene uku kupusana ngo kunono? Bushe cila muntu alekonka fye inshila yakwe iya kwi pusukilo? Napacepa! Paulo atile: “Ndemukonkomesha, mwe bamunyinane, mwi shina lya kwa Shikulwifwe Yesu Kristu ukuti bonse musose akanwa kamo kene, kabili peba malekano pali imwe, lelo mwikatane bwino bwino mu mano yamo yene na mu kutontonkanya kumo kwine.”—1 Abena Korinti 1:10.

Ukwabula ukutwishika, ukupatikisha teti kulenge umuntu asumina ifyo bambi basuminamo. Icilenga ukusumina kufwailisha ifishinka e lyo wasumina ico abo bantu na bo basuminamo. E ico, ifikabilwa sana pa  kuipakisha kulya kwikatana Paulo alandilepo, kusambilila Icebo ca kwa Lesa pa lobe no kufwaisha ukubomfya ifyo ulesambilila. Bushe abantu baikatana kuti basangwa? Nga fintu tulandilepo kale mu cipande cifumineko, pa nshita ntali Lesa abomba ne bumba lya bantu abaikatana. Nga pali nomba bushe calyanguka ukwishiba ili bumba?

Ubusuma bwa Kuba pe Bumba Lesa Asenamina

Inshita imo kemba wa malumbo Davidi aipwishe ati: “Mwe Yehova, nani engalebela mwi hema lyenu? nani engekala mu lupili lwenu lwa mushilo?” Kwena ili lipusho lintu lyacindama ililingile umuntu ukutontonkanyapo. Davidi ayaswike ati: “Uwendo wa mpomfu, uucito bulungami, uusose cine mu mutima wakwe.” (Amalumbo 15:1, 2) Ukumfwikisha bwino ico Baibolo ilanda kukafwa umuntu ukwishiba imipepele ikonka ifyo Lesa afwaya. Kabili umuntu nga alebishanya ne li bumba, akaipakisha ukubishanya na bantu baikatana mu kupepa Lesa “mu mupashi na mu cine.”

Inte sha kwa Yehova balilanga ukuti nangu fye ni muli cino calo umwabula ukwikatana, calyanguka ukusumina fimo fine no kucitila ifintu pamo. Pali baNte paba na bantu abafuma mu mipepele ne mishobo iingi. Bamo ilyo bashilaba Inte sha kwa Yehova baletwishika ifingi pali Lesa nelyo ukukanasumina muli wene. Bambi na bo tabapooseleko sana amano ku fya mapepo. Abantu bafuma mu mipepele yalekanalekana, imishobo, na baali kale ba mano ya pano nse e baisaikatana mu kupepa. Uku kwikatana te kuti kusangwe kumbi.

Icebo ca kwa Lesa, Baibolo, e calenga uku kwikatana. Inte sha kwa Yehova balishiba ukuti te kuti bapatikishe bambi ukucita ifyo bashilefwaya. Lelo balatasha pe shuko bakwata ilya kukoselesha bambi ukusambilila Baibolo pa kuti ilyo balesala imipepele ninshi nabeshiba ico Baibolo yalanda. Ukucite fi kulenga na bambi abengi ukuipakisha amapaalo yaba mu kupepa Lesa “mu mupashi na mu cine.”

Pali nomba calyanguka ukuwila mu fibi no kubelelekwa. Calicindama ukusala aba kubishanya na bo abasuma. Baibolo itila, “enda na ba mano e lyo ukabo wa mano” kabili itila “ukubishanya kubi konaule mibele isuma.” (Amapinda 13:20; 1 Abena Korinti 15:33) Ukubishanya na bakapepa bene bene aba kwa Lesa bucingo. Uyu e mulandu Baibolo itucinkwilako ati: “Tutontonkanye ifya kucincishanya ku kutemwa kabili ku kubombe milimo isuma, twiba abaleko kulongana kwesu, filya waba umusango wa bamo, lelo tukoseleshanye, pali bufi apo mulemona ubushiku bulya bulepalama.” (AbaHebere 10:24, 25) Ala mwandini cilawama sana nga ca kuti ifibusa fine fine, bamunyina na bankashi, baleafwana ukubomba imilimo ya kwa Lesa!

BaOttmar basuminishako aya mashiwi. Nangu line bakulile mu lupwa lwalepepa ku Katolika mu Germany, balekele ukuya ku calici. Balondolola ati: “Lyonse nga naya ku calici, nalebwelako fye.” Na lyo line, batwalilile ukutetekela muli Lesa. Lyena bakumenye Inte sha kwa Yehova no kuisuminina abene ukuti e babomfi ba kwa Lesa. Bamwene ifyo cacindeme ukubishanya na bo. BaOttmar batila: “Ifi napimpa mu kuteyanya kwaba mwi sonde lyonse, nshaba na ca kunsakamika kabili na ku mutima wandi kwaba fye tuutu. Balengafwa ukulunduluka mu kwishiba Baibolo bwino bwino. Ici e cintu nacindamika sana.”

Ubwite ku Balefwaya Icine

Abantu babombela pamo balapwisha umulimo wabo bwino ukucila uulebomba eka. Ifipope Yesu aebele abakonshi bakwe pa kubashalikapo filalangilila ici. Atile: “Kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo, mulebasambilisha ukubaka fyonse ifyo namwebele.” (Mateo 28:19, 20) Bushe uyu mulimo nga wabombelwe bwino shani ukwabula ubutungulushi  nelyo ukuteyanya? Bushe umuntu engabela shani ici cipope ca mu Malembo ilyo alefwaya ukubombela Lesa ukwabula ababiye?

Umwaka wapwile, Inte sha kwa Yehova mwi sonde lyonse bashilile abantu ifitabo filanda pali Baibolo, ututabo, na babroshuwa 91,933,280, na bamagazini 697,603,247. Ici calengele imintapendwa ya bantu mu fyalo 235 ukuumfwa ubukombe bwaba mu Cebo ca kwa Lesa. Ala mwandini ubu bushininkisho bwine bwine ubwa kuti abantu baikatana kabili abateyanishiwa bwino balacita ifingi ukucila umuntu uulebomba eka!

Ukulunda pa kushiila abantu impapulo, Inte sha kwa Yehova balasambilisha Baibolo ukwabula ukulipilisha ku kwaafwa abantu ukuumfwikisha ico Lesa afwaya. Umwaka wapwile, amasambililo ya Baibolo 5,726,509 yaletungululwa cila mulungu ku muntu umo na umo nelyo kwi bumba. Aya masambililo ya Baibolo yalyafwa imintapendwa ya bantu ukwishiba ifishinka fine fine ifibaafwa ukusala bwino uko balingile ukupepa. Tulemwita ku kusambilila ifyo Lesa afwaya ifyaba mu Baibolo. E lyo mwe bene kuti mwasalapo.—Abena Efese 4:13; Abena Filipi 1:9; 1 Timote 6:20; 2 Petro 3:18.

Nga mulefwaya ukutemuna Lesa, calicindama ukuba mwi bumba lya mapepo, lelo te mwi bumba fye ilili lyonse nelyo imipepele. Pa kusala ukwa kupepa, mufwile ukwishiba bwino ico Baibolo ilanda, te kukonkelela fye ifyo mushishininkishe nelyo ifya kuumfwa fye. (Amapinda 16:25) Sambilileni ififwaikwa ku mipepele ya cine. Linganyeni ifi ku fyo mwasuminamo. Lyena saleni ukulingana ne fyo mwasanga.—Amalango 30:19.

[Ifikope pe bula 7]

Inte sha kwa Yehova balaipakisha ukubombela pamo mu calo cabulamo ukwikatana