Ukubomba Icisuma Ilyo Kwaba Amafya

UMUTUMWA Paulo acincishe ati: “Tubombe icisuma kuli bonse, lelo maka maka ku ba bwananyina mu citetekelo.” (Abena Galatia 6:10) Mwi sonde lyonse, Inte sha kwa Yehova balatukuta ukukonka ici cishinte mu bumi bwabo, ukubombe cisuma kuli bonse, maka maka ku basumina banabo. Ifi e fyo ciba ilingi line nga kwaba amafya. Natumone ifyacitike nomba line mu fyalo fitatu.

Mu December 2002, inkuuka iikalamba nga nshi yapamine icalo ca Guam, iyi nkuuka yalebutuka intamfu bakilomita 300 mwi awala limo. Amayanda ayengi yalibongolweke, yamo yalyonaike nakalya nakalya. Ifilonganino muli cilya calo mu kwangufyanya fyateyenye amabumba ya kwafwilisha ukuwamya no kwafwa indupwa sha baNte abasanshilwe sana kuli ubu busanso. Iofesi lya Nte sha kwa Yehova mu Guam, lyatumine ifisolobelo na bantu ba kuwamya amayanda yabongolweke, kabili iofesi lya ku Hawaii lyalyafwilishe uyu mulimo. Mu milungu fye inono, ibumba lya bakabasa ukufuma ku Hawaii lyalifikile ku kwafwilisha umulimo wa kukuula cipya cipya, kabili bamunyina ba mu Guam bapokele ba cuti ku sha ncito pa kuti bengabombela pamo na bamunyinabo abafumine ku Hawaii. Umupashi balangile uwa kubombela pamo mu nsansa wali bunte kuli bonse muli ilya ncende.

Mu ncende yabela mupepi no musumba wa Mandalay, mu calo ca Myanmar, mwayambwike umulilo mupepi ne Ng’anda ya Bufumu. Lwa mupepi paali ing’anda umwaleikala nkashi no lupwa lwakwe uwalekele ukulongana no kushimikila. Umwela walepuupila ukwali ing’anda ya kwa nkashi, e co abutukile ku Ng’a nda ya Bufumu no kukuuta mutuule. Pali iyi nshita kwali ukuwamya Ing’anda ya Bufumu, kanshi pali bamunyina abengi. Balipapile ukumona nkashi pantu tabaishibe ukuti aleikala muli ilya ncende. Mu kwangufyanya, bamunyina balimwafwile ukutunsha ifipe no kufitwala ukushali umulilo. Ilyo umulume, uushali Nte, aumfwile pa lwa mulilo, abutukile ku ng’anda uko asangile bamunyina balesakamana ulupwa lwakwe. Alitemenwe, kabili alitashishe no kupepemuka pantu ilingi abapuupu baleba ilyo kwaba ifya musango yu. Icikuuku bamunyina balangishe calengele nkashi no mwana wakwe umwaume ukutendeka na kabili ukubishanya ne cilonganino ca Bwina Kristu, kabili pali leelo balasangwa ku kulongana konse.

Mu mwaka wa mulimo uwapwile, abengi mu Mozambique tabakwete ifya kulya pa mulandu wa cilala no kuuma kwa fya kulya. Iofesi lya Nte sha kwa Yehova lyalyangufyenye ukutwala ifya kulya ku baponenwe ne nsala. Balebapeelela  ifya kulya pa Mayanda ya Bufumu, inshita shimo pa numa ya kulongana. Nkashi umo, umufyashi umushimbe atile: “Naishile ku kulongana uwakungumana pantu nshaishibe ifyo nali no kwisapeela abana bandi nga twafuma mu kulongana.” Ukwaafwa kusuma uko bamunyina bacitile kwalimukoseleshe nga nshi. Atile: “Nali nga ne wafuma ku bafwa!”

BaNte na kabili ‘babombe cisuma’ lwa ku mupashi ilyo babilisha ubukombe bwa mu Baibolo ubusansamusha no kupeele subilo. Basumina mu mashiwi umwaume wa mano wa ku kale asuminemo, aya kuti: “Lelo uumfwa kuli ine akekalo mutelelwe, akekale cibote ukubulwo mwenso wa bubi.”—Amapinda 1:33.

[Ifikope pe bula 31]

1, 2. Ukwakanya ifya kulya ku baponenwe no bwafya mu Mozambique

3, 4. Inkuuka mu Guam yaonawile amayanda ayengi

[Abatusuminishe]

Umwana, ku kuso: Andrea Booher/FEMA News Photo; umwanakashi, pa muulu: AP Photo/Pacific Daily News, Masako Watanabe