Abapwishishe Isukulu lya Gileadi Baya Abapimpa mu Mulimo wa Kulobolola!

“UKULOBOLOLA kukalamba, lelo ababomfi bena banono. E ico, lombeni Umwine wa kulobolola ukuti atume ababomfi mu kulobolola kwakwe.” (Mateo 9:37, 38) Aya mashiwi yaali ayacindama sana ku bapwishishe ikalasi lyalenga 116 mwi Sukulu lya Baibolo ilya Gileadi ilya Watchtower pa kubateyanya ukuti baye mu mulimo wabo uwa bumishonari.

Pa Cibelushi pa March 13, 2004, abantu bonse pamo 6,684 balongene pa Watchtower Educational Center mu Patterson, ku New York, ne ncende shimbi isha pa Bethel pa kuti basangwe kuli programu wa balepwisha isukulu lya Gileadi. Iyi yali ni nshita aba mu kalasi balebafunda umuku wa kulekeleshako no kubakoselesha. Ifwe bonse kuti twamwenamo muli uku kufunda ilyo tuli abapimpa mu mulimo wa kulobolola kwa ku mupashi.

Pa kutendeka programu, baTheodore Jaracz, ababa mwi Bumba Litungulula kabili abaali na mwi kalasi lya Gileadi ilyalenga 7, bakomaile sana pa mashiwi ya kwa Yesu aya kuti: “Kabiyeni, kalengeni aba nko shonse ukuba abasambi.” (Mateo 28:19, 20) Aya mashiwi yaali ayalinga sana pantu abapwishishe isukulu babatumine mu fyalo 20! Bacinkwileko abasambi ukuti ifipope fyaba mu Cebo ca kwa Lesa nafibapangasha sana ukuba abapimpa mu mulimo wacindamisha uwa kulobolola kwa ku mupashi.—Mateo 5:16.

Ifya Kulunduluka mu Mulimo wa Kulobolola

Abalandile ilyashi lya kubalilapo ni baRobert Wallen, ababomba imyaka iingi pe Sukulu lya Gileadi. Mu lyashi lyabo ilyaleti: “Inkumbu Mibele Yawamisha,” baebele abasambi ukuti: “Inkumbu mibele iyo na bankomamatwi bengomfwa kabili ne mpofu kuti yamona iyi mibele.” Yesu alishibe ukucula kwa bantu bambi kabili alefwaya ukubaafwa mu mafya yabo. (Mateo 9:36) Abasambi bakasanga inshila ishingi isha kwafwilamo bambi nga filya cali kuli Yesu. Inshila abasambi bengafwilamo bambi kupitila mu kushimikila, mu cilonganino, mu mayanda ya bamishonari, na mu fyupo fyabo fine. Kalanda abakoseleshe ati: “Lekeni imibele yawamisha iya kuba ne nkumbu imoneke mu mikalile yenu ilyo mulebombela bambi. Imisango isuma ilakabilwa sana pa kutwalilila ukwikala mu ng’anda ya bamishonari. E ico, pampamineni pa kufwala imibele ya nkumbu.”—Abena Kolose 3:12.

BaGerrit Lösch, ababa mwi Bumba Litungulula kabili baali na mwi kalasi lya Gileadi ilyalenga 41, balandile ilyashi lyakonkelepo, ilyaleti: “Ababila Ipusukilo.” (Esaya 52:7) Pa kuti abantu bakesepusuka ilyo ubwikashi buno bukonaulwa, bafwile ukunonka ukwishiba kwine kwine ukwa Cebo ca kwa Lesa, ukulumbulula icitetekelo cabo, no kubatishiwa. (Abena Roma 10:10; 2 Timote 3:15; 1 Petro 3:21) Lelo,  icikalamba ico tubilila ukupusuka kulumbanya Lesa, te kupususha abantu. E ico, Munyinefwe Lösch akoseleshe abali no kuba bamishonari ukuti: “Twaleni ubukombe bwa Bufumu ku mpela she sonde, kabili mube abapimpa pa kubilisha ukupusuka, akuciteni fyonse ku kulumbanya Yehova.”—Abena Roma 10:8.

BaLawrence Bowen, bakafundisha ba pa Gileadi baipwishe ilipusho lyaleti: “Bushe mulanga shani ulubuuto lwa ku mupashi?” Balandile amashiwi ya kwa Yesu ayaba pali Mateo 6:22 no kukoselesha abasambi ukuba ne linso “ilituntulu” pa kuti “bengalanga ukubengeshima kwabo ukwa ku mupashi no kucindika Yehova ilyo baleafwa abantu banabo.” Ilyo fye Yesu atendeke ubutumikishi bwakwe, abikile amano ku kucita ukufwaya kwa kwa Lesa. Ici ca kumwenako cisuma ico atushilile. Ukutontonkanya pa fintu ifisuma ifyo Wishi amusambilishe mu muulu kwayafwile Yesu ukushipikisha amesho ya kwa Satana mu matololo. (Mateo 3:16; 4:1-11) Yesu alangile ukuti alicetekele Yehova ukupitila mu kupwisha umulimo uo Lesa amupeele. Pa kuti bamishonari na bo bakashipikishe amafya ku ntanshi, balingile ukubika amano ku kusambilila Baibolo no kucetekela Yehova.

BaMark Noumair, bakafundisha ba pe sukulu lya Gileadi kabili abaali na mwi kalasi lya Gileadi ilyalenga 77, balandile ilyashi lya kulekelesha  pali aya malyashi ya kukonkana. Umutwe wa lyashi lyabo waleti: “Tuli mu Minwe Yenu.” (Yoshua 9:25) Bakoseleshe abasambi ukuba ne mibele nge ya bena Gibeone ba ku kale. Nangu line Gibeone wali ‘mushi ukalamba, na baume bonse ba uko bali ni mpalume,’ tabalefwaya ukulumbuka nelyo cila muntu ukucita ico alefwaya. (Yoshua 10:2) Baitemenwe ‘ukutebe nkuni no kutapa amenshi.’ Baitemenwe no kutungululwa na bena Lebi mu kutungilila ukupepa kwa kwa Yehova. (Yoshua 9:27) Cali kwati, abalepwisha ikalasi balyeba kale Yoshua Mukalamba Yesu Kristu ukuti, “tuli mu minwe yenu.” Nomba, ilyo bakatendeka umulimo wabo mu fyalo fimbi, bafwile ukusumina imilimo yonse iyo bapeelwa kuli Yoshua Mukalamba.

Ifya Kukumanya no Kulanshanya

BaWallace Liverance, abaali mwi kalasi lya Gileadi ilyalenga 61 kabili ni bakafundisha pali ili line sukulu, balandile ilyashi lyali no mutwe waleti: “Kupukuleni Amalembo.” Muli ili lyashi mwali no kulanshanya na basambi. Abasambi bashimike ifisuma ifyo baipakishe ilyo bali mwi bala pa nshita bali pa sukulu kabili bacitileko ne filangililo pa fyalecitika mwi bala. Calimoneke fye apabuta ukuti Amalembo basambilile pa myeshi isano yalibafikile pa mitima kabili yabalengele ukuti bashimikileko bambi ifyo basambilile. (Luka 24:32) Pali iyi myeshi isano basambilile isukulu, umusambi umo ashimikile umwaice wakwe ifyo alesambilila. Ifyo ashimike fyakoseleshe umwaice wakwe ica kuti aile alefwaya ukwabela icilonganino mupepi no ko ekala kabili atendeke ukusambilila Baibolo. Pali ndakai ni kasabankanya ushabatishiwa.

Pa numa ya fya kukumanya, baRichard Ashe na baJohn Gibbard balanshenye na babomfi ba cishinka ababombela Yehova pa myaka iingi, pali aba paali na bakangalila benda abaile mu kukanshiwa kwaibela pa Watchtower Educational Center. Balipitileko na mu makalasi ye Sukulu lya Gileadi. Bamo baibwishe ifyo Munyina Knorr abebele ilyo baali mu kalasi, atile: “Muli no kusambilila ifingi pano pa Gileadi. Lelo nga mwakule mitwe, ninshi tapali ico twacita. Tulefwaya mukafume pano ne mitima isuma.” Bamunyina baba mu mulimo wa kwenda baebele abaali mwi kalasi ukutemwa abantu, nga filya Yesu ali ku bantu, no kusumina umulimo onse uo bapeelwa. Ukwabula ukutwishika, ukubomfya uku kufunda kukafwa bamishonari bapya ukulunduluka mu milimo yabo.

Kabiyeni Abapimpa mu Mulimo wa Kulobolola!

Abasangilweko balikwete ishuko lya kumfwa ilyashi lya baStephen Lett, ababa mwi Bumba Litungulula. Balandile ilyashi likalamba ilyaleti, “Kabiyeni Abapimpa mu Mulimo wa Kulobolola!” (Mateo 9:38) Mu kulobolola kwa cine, inshita ya kulobolola yalipimwa. Abalelobolola balinga ukubombesha. Uyu mulimo walicindama sana muli ino nshita ya kulekelesha iya buno bwikashi! Muli uku kulobolola kukalamba ukwa ku mupashi, imyeo ya bantu ili mu bwafya. (Mateo 13:39) Munyina Lett akoseleshe abalepwisha isukulu, ‘ukukanashingashinga mu mulimo wabo,’ lelo ukuba “ababilima ku mupashi” no ‘kubombela Yehova’ umulimo ushakabwekeshiwepo. (Abena Roma 12:11) Kalanda ayambwile amashiwi ya kwa Yesu aya kuti: “Inuneni amenso yenu no kumona amabala, ukuti yabuutila ukulobolola.” (Yohane 4:35) Lyena acincishe abalepwisha isukulu ukuba abapimpa mu mulimo wa kulobolola no kubombesha ukufika ku bantu ilyo bengasangwa ne fifulo bengasangwako no kubomfya inshila shonse isha kucitilamo ubunte bwa mu lyashi. Ukufwayako inshila sha kushimikilamo kuti kwalenga ubunte ukuba ubusuma. Yehova ni Lesa wapimpa, kabili enekela ifwe bonse ukumupashanya no kubombesha umulimo wa kulobolola kwa ku mupashi.—2 Ishamfumu 19:31; Yohane 5:17.

Pa kusondwelela uyu programu, Munyina Jaracz uwali e ceyamani, abelengele amakalata ya batumine imitende ukufuma ku maofesi ayengi no kupeela abasambi badiploma. Umusambi umo abelengele kalata walembele aba mwi kalasi uwa kutasha sana pa fyo basambilile. Cine cine, programu wa balepwisha ikalasi lyalenga 116 alengele bonse abasangilweko ukupampamina sana pa kuba bakabomba bapimpa aba kulobolola.

[Akabokoshi pe bula 25]

UKULONGANIKA IFIPENDO FYA BALI MU KALASI

Bafumine mu fyalo: 6

Bakayabombela mu fyalo: 20

Abasambi bonse pamo baali: 46

Imyaka ya kufyalwa nga kwakanya pali umo: 34.2

Imyaka baba mu cine nga kwakanya pali umo: 17.2

Imyaka babomba umulimo wa nshita yonse nga

kwakanya pali umo: 13.9

[Icikope pe bula 26]

Ikalasi Lyalenga 116 Lyapwisha Isukulu lya Baibolo Ilya Gileadi Ilya Watchtower

Mu mutande uli pe samba, ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Ceansu, R.; Romanian; Sparks, T.; Piña, C.; Turner, P.; Cheney, L. (2) Suardy, M; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.